ހަމާސް ޖަމާއަތުން ހަތިޔާރު ނުބަހައްޓަނީސް، އިޒްރޭލުގެ ހަމަލާތަކުގައި ސުންނާފަތިވެފައިވާ ޣައްޒާ އަލުން އާރާސްތުކުރުމުގެ އެއްވެސް މަސައްކަތެއް ކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ފުރުސަތު ނުދޭނެ ކަމަށް އެމެރިކާގެ މަންދޫބު ޖެރެޑް ކުޝްނަރ ބުނެފިއެވެ.

ޓްރަމްޕްގެ ދަނބިދަރި ކުޝްނަރ މިހެން ބުނީ ހޯމަ ދުވަހު އިޒްރޭލުގެ ބޮޑުވަޒީރު ބެންޖަމިން ނަތަންޔާހޫއާ އެކު ބޭއްވި މަޝްވަރާތަކަށް ފަހު، "ފޮކްސް ނިއުސް" އަށް ދިން އިންޓަވިއުއެއްގައެވެ. ހަމާސްއިން މިހާރުވެސް އެއްބަސްވެފައިވާ ރޯޑްމެޕެއް ތަންފީޒުކުރުމަށް މި ބައްދަލުވުމުގައި އެދެވޭ ކުރިއެރުމެއް ލިބިފައެއް ނުވެއެވެ.

ކުޝްނަރ ބުނީ ޣައްޒާ އަލުން އާރާސްތުކުރުމުގެ ޕްލޭނެއް އެބައޮތް ކަމަށާއި ނަމަވެސް އެކަން ކުރަން ހުއްދަ ދެވޭނީ އެ ސަރަހައްދު ފުރިހަމައަށް ހަތިޔާރުން ސާފުކުރުމުން (ޑީމިލިޓަރައިޒް ކުރުމުން) ކަމަށެވެ. އަދި އަނެއްކާވެސް ހަމާސްގެ ބާރުގެ ދަށަށް ގޮސް ގޮއްވާލާނެ ތަނަކަށް އިތުރަށް ފައިސާ ހަރަދުކުރަން އެއްވެސް ފަރާތަކުން ބޭނުންނުވާނެ ކަމަށް އޭނާ ބުންޏެވެ.

އެމެރިކާގެ އެހީތެރިކަމާއެކު ހުށަހެޅުނު އެއްބަސްވުމުގެ ދަށުން، އިޒްރޭލު ސިފައިން ޣައްޒާއިން ފޭބުމަށާއި ހަމަލާތައް ހުއްޓާލުމުގެ ބަދަލެއްގެ ގޮތުން ހަތިޔާރު ބަހައްޓަން ހަމާސްއިން ވަނީ އެއްބަސްވެފައެވެ. އެހެންނަމަވެސް، ޣައްޒާ އެއްކޮށް ހަތިޔާރުން ސާފުނުވަނީސް އެއްވެސް ދުލެއް ނުދޭނެ ކަމަށް ބުނެ އިޒްރޭލުން ވަނީ މި މަހުގެ ކުރީކޮޅު އެ ހުށަހެޅުން ދެކޮޅު ހަދާފައެވެ.

ނަތަންޔާހޫގެ އާއިލާއާ ގާތް ގުޅުމެއް އޮންނަ ކުޝްނަރގެ ވާހަކައިގައި ބޮޑަށް ބުރަވެފައިވަނީ އިޒްރޭލުގެ ވިސްނުމަށެވެ. އެގޮތުން، އިޒްރޭލަށް ނުރައްކަލެއް ކުރިމަތިވެދާނެ ހާލަތެއްގައި އަމިއްލަ ދިފާއުގައި ފިޔަވަޅު އެޅުމުގެ ހައްގު ހަނިނުކުރާނެ ކަމަށް އޭނާ ބުންޏެވެ.

އިޒްރޭލުން ދަނީ ޣައްޒާއަށް ކޮންމެ ދުވަހަކު ކަހަލަ ގޮތަކަށް ހަމަލާތައް ދެމުންނެވެ. އެގޮތުން، މިދިޔަ އަހަރު އަމަލުކުރަން ފެށި "ގަތުލްއާއްމު ހުއްޓާލުމުގެ" އެއްބަސްވުމަށް ފަހުވެސް އިޒްރޭލުން ވަނީ ފަލަސްތީނުގެ 1,265 މީހުން ޝަހީދުކޮށްލާފައެވެ. އަދި އޮކްޓޯބަރު 2023 އިން ފެށިގެން އިޒްރޭލުން ހިންގަމުންދާ ގަތުލުއާންމުގައި މިހާތަނަށް 73,399 އަށް ވުރެ ގިނަ ފަލަސްތީނު ރައްޔިތުން ވަނީ ޝަހީދުވެފައެވެ.

ހޯމަ ދުވަހުގެ ކުރީކޮޅު ރައީސް ޓްރަމްޕް ވަނީ ހަމާސްއިން ހަތިޔާރު ބަހައްޓަން އެއްބަސްވެފައިވާތީ، އިޒްރޭލުން ދެން ހަމަލާދީގެން ނުވާނެ ކަމަށް ބުނެފައެވެ.

ޓްރަމްޕް މިހެން ބުނެފައިވާއިރު ފާއިތުވި ތިން އަހަރު ދުވަހުގެ ތެރޭގައި އެމެރިކާއިން ވަނީ އިޒްރޭލަށް އަސްކަރީ އެހީގެ ގޮތުގައި ގާތްގަނޑަކަށް 25 ބިލިއަން ޑޮލަރު ދީފައެވެ. އަދި ބައިނަލްއަގުވާމީ މައިދާނުގައި އިޒްރޭލު ދިފާއުކޮށް، ޣައްޒާގެ ޖަރީމާތައް ތަހުގީގުކުރާ އިންޓަނޭޝަނަލް ކްރިމިނަލް ކޯޓް (އައިސީސީ) ގެ އޮފިޝަލުންނަށް ދަތިކުރުމުގެ ފިޔަވަޅުތައްވެސް އެމެރިކާއިން ވަނީ އަޅާފައެވެ.