މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ވިލާ އިންޓަރނޭޝަނަލް ހައި ސްކޫލް (ވީއައިއެޗްއެސް) އާ ދެމެދު ދަރިވަރުންނަށް ޢަމަލީ ތަޖުރިބާ ހޯދައިދިނުމުގެ އިންޓާންޝިޕް ޕްރޮގްރާމެއް ހިންގުމާ ގުޅޭ ފަހުމުނާމާއެއްގައި މިއަދު ސޮއިކޮށްފިއެވެ.

އެމްއޭސީއެލްގެ ފަރާތުން މި ފަހުމުނާމާގައި ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިންގ ޑިރެކްޓަރ އިބްރާހީމް ޝަރީފް މުޙައްމަދެވެ. ވީއައިއެޗްއެސްގެ ފަރާތުން ސޮއިކުރެއްވީ އެ ސްކޫލުގެ ޕްރިންސިޕަލް ޢަލީ މުޞްޠަފާއެވެ. މި ރަސްމިއްޔާތުގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ މުޖުތަބާ ލަޠީފާއި ސީނިއަރ ޖެނެރަލް މެނޭޖަރ ޢަލީ ޙުޒައިމް އަދި ލާރނިންގ އެންޑް ޑިވެލޮޕްމަންޓް ޓީމުގެ އިސް ބޭފުޅުން ބައިވެރިވެވަޑައިގެންނެވިއެވެ.

އެމްއޭސީއެލް އިން މައުލޫމާތުދޭގޮތުގައި މި ޕްރޮގްރާމުގެ ޒަރީޢާއިން ވެލާނާ އިންޓަރނޭޝަނަލް އެއަރޕޯޓުގެ އޮޕަރޭޝަންސް އިންޖިނިއަރިންގ އައިޓީ ކަސްޓަމަރ ސަރވިސް ލޮޖިސްޓިކްސް ކޯޕަރޭޓް ސަރވިސަސް އަދި ސޭފްޓީ އެންޑް ސެކިއުރިޓީ ފަދަ ދާއިރާތަކުން ކުދިންނަށް ތަޖުރިބާ ލިބޭނެއެވެ. ކްލާސްރޫމުގައި ކިޔަވައިދޭ ޢިލްމީ ބައިތައް ޢަމަލީ ގޮތުން ބޭނުންކުރަން ދަސްކޮށްދީ ވަޒީފާގެ މާޙައުލަށް ތައްޔާރުކުރުމަކީ މި ފަހުމުނާމާގެ މައިގަނޑު ބޭނުމެވެ.

ރަސްމިއްޔާތުގައި ވާހަކަފުޅު ދައްކަވަމުން ސީއީއޯ އިބްރާހީމް ޝަރީފް ވިދާޅުވީ މި ޕްރޮގްރާމަކީ ކުންފުނީގެ "އެމްޕަވަރ އެންޑް ޑިވެލޮޕް އަވަރ ޕީޕަލް" ސިޔާސަތުގެ ތެރެއިން ހިންގާ މުހިންމު ހަރަކާތެއް ކަމަށެވެ. ވައިގެ ދަތުރުފަތުރާ ގުޅުންހުރި ދާއިރާތަކުން ކުރިއެރުމަށް އެދޭ ޒުވާނުންނަށް މީގެ ސަބަބުން އަގުހުރި ފުރުޞަތުތަކެއް ފަހިވެގެންދާނެ ކަމަށް ވިދާޅުވިއެވެ.

މި އެއްބަސްވުމުގެ ދަށުން މުޢާމަލާތުކުރުމާއި ގުޅިގެން މަސައްކަތްކުރުމާއި މައްސަލަ ޙައްލުކުރުން ފަދަ ހުނަރުތައް ދަރިވަރުންގެ ކިބައިގައި އަށަގެންނެވުމުގެ އިތުރުން ކެރިއަރާ ގުޅޭ މަޢުލޫމާތު ފޯރުކޮށްދިނުމާއި މެންޓަރޝިޕް ދިނުމުގެ ފުރުޞަތުތައް ވެސް ލިބޭނެއެވެ.