ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި އޮސްޓްރޭލިއާގެ ޔުނިވަރސިޓީ އޮފް މެލްބަންއާ ދެމެދު އޮތް އެކަޑަމިކް ޕާޓްނަރޝިޕްގެ ދަށުން ހިންގާ ޚާއްޞަ ޕްރޮފެޝަނަލް ޕްލޭސްމަންޓް ޕްރޮގްރާމެއްގައި ބައިވެރިވުމަށް މެލްބަން ޔުނިވަރސިޓީގެ 13 ދަރިވަރަކު ރާއްޖެ އަތުވެއްޖެއެވެ.

މި ޕްރޮގްރާމް ކުރިއަށްދާނީ 2026 އޮގަސްޓް 24 އިން ސެޕްޓެމްބަރ 11 ގެ ނިޔަލަށެވެ.

އެމްއެންޔޫއިން ނެރުނު ނޫސްބަޔާނެއްގައި ހާމަކޮށްފައިވާ ގޮތުގައި، މި ޕްލޭސްމަންޓް ޕްރޮގްރާމަކީ މެލްބަން ޔުނިވަރސިޓީގެ ދަރިވަރުންނަށް ރާއްޖޭގެ ތަޢުލީމީ މާޙައުލުގެ ތެރެއިން ޢަމަލީ ތަޖުރިބާ ހޯދުމަށާއި، ކިޔަވާފައިވާ ތިއަރީތައް ޢަމަލީ މައިދާނުގައި ބޭނުންކުރުމުގެ ފުރުޞަތު ފަހިކޮށްދިނުމަށް ކުރިއަށްގެންދާ ޕްރޮގްރާމެކެވެ. މީގެއިތުރުން، އެމްއެންޔޫގެ ދަރިވަރުންނާއި މުދައްރިސުން އަދި މުޖުތަމަޢުގެ އެކި ފަރާތްތަކާ ގުޅިގެން މަސައްކަތްކޮށް، އެ ދަރިވަރުންގެ ފަންނީ ހުނަރުތައް އިތުރަށް ތަރައްޤީކުރުމުގެ ފުރުޞަތު މިކަމުގެ ސަބަބުން ލިބިގެންދާނެއެވެ.

މި ޕްރޮގްރާމުގެ ތެރެއިން ދަރިވަރުން ރާއްޖޭގެ ތަޢުލީމީ ނިޒާމާއި އިޖުތިމާޢީ ޙާލަތްތައް ދަސްކޮށް، ކުދި ޖަޒީރާ ޤައުމެއްގެ ތަޢުލީމީ ދާއިރާގައި ހުރި ފުރުޞަތުތަކާއި ގޮންޖެހުންތަކުގެ މަޢުލޫމާތު ހޯދާނެއެވެ. އަދި ދެ ޔުނިވަރސިޓީގެ ދަރިވަރުންގެ މެދުގައި އެކަކު އަނެކެއްގެ ކިބައިން އުނގެނުމާއި، ސަގާފީ ބަދަލުވުންތަކާއި، މަޢުލޫމާތާއި ޢިލްމު ޙިއްޞާކުރުމުގެ އިތުރުން ފަންނީ ގުޅުންތައް ބަދަހިކުރުމަށް މަގުފަހިވެގެންދާނެއެވެ.

މި އިސްނެގުމަކީ ބައިނަލްއަޤްވާމީ ފެންވަރުގައި ތަޢުލީމީ ގުޅުން ބަދަހިކުރުމާއި ތަޖުރިބާގެ އަލީގައި އުނގެނުމުގެ ތެރެއިން އދ. ގެ ދެމެހެއްޓެނިވި ތަރައްޤީގެ ލަނޑުދަނޑިތަކަށް (އެސްޑީޖީތަކަށް) އެއްބާރުލުން ދިނުމުގެ ގޮތުން ކުރިއަށްގެންދާ ޕްރޮގްރާމެކެވެ. އެގޮތުން، ފެންވަރު ރަނގަޅު ތަޢުލީމު ފޯރުކޮށްދިނުމާއި (އެސްޑީޖީ 4)، ތަފާތު ސަގާފަތްތައް ދެނެގަނެ ހަމަހަމަކަން ޤާއިމުކުރުމާއި (އެސްޑީޖީ 10)، ޖަޒީރާވަންތަ ދެމެހެއްޓެނިވި މުޖުތަމަޢުތައް ބިނާކުރުމުގެ ވިސްނުން ފުޅާކުރުމާއި (އެސްޑީޖީ 11)، އަދި ބައިނަލްއަޤްވާމީ ތަޢުލީމީ ގުޅުންތައް ވަރުގަދަކުރުމަށް (އެސްޑީޖީ 17) މި ޕްރޮގްރާމުގެ ސަބަބުން ބޮޑު އެހީތެރިކަމެއް ލިބިގެންދާނެއެވެ.

ދަރިވަރުންނާއި، ތަޢުލީމީ ދާއިރާގެ ބޭފުޅުން އަދި މުޖުތަމަޢުގެ މެދުގައި އޮންނަ މިފަދަ ގުޅުންތަކުގެ ސަބަބުން، ދުނިޔޭގެ ރައްޔިތެއްގެ ގޮތުގައި ވިސްނުން ބައްޓަންކުރުމަށާއި ސަގާފީ އެއްބައިވަންތަކަމަށް ބާރުއެޅިގެންދާނެ ކަމަށް އެމްއެންޔޫއިން ފާހަގަކުރެއެވެ. އަދި މި ޕްރޮގްރާމަކީ އެމްއެންޔޫ އާއި މެލްބަން ޔުނިވަރސިޓީއާ ދެމެދު އޮތް ބަދަހި ގުޅުން އިތުރަށް ވަރުގަދަކޮށް، ކުރިމަގުގައި ދިގުމުއްދަތުގެ ގިނަ ފުރުޞަތުތަކަކަށް މަގުފަހިކޮށްދޭނެ މުހިންމު ފިޔަވަޅެކެވެ.