ދިވެހި ވަތަނީ ޚިދުމަތުގެ ތަމްރީނު ޕްރޮގްރާމްގެ ތިންވަނަ ބެޗުގެ ބައިވެރިންގެ ދަސްވެނިވުމުގެ ރަސްމިއްޔާތު ބާއްވައިފިއެވެ.

މިކަމަށްޓަކައި ސިފައިންގެ ތަމްރީނުތައް ކުރިއަށްގެންދާ ޅ. މާފިލާފުށީގައި ބޭއްވި މި ކުލަގަދަ ރަސްމިއްޔާތު ޝަރަފްވެރިކޮށްދެއްވީ ދިފާޢީ ވަޒީރު ޙަސަން ރަޝީދެވެ.

މިފަހަރުގެ ބެޗުގައި ޖުމްލަ 352 ބައިވެރިން ބައިވެރިވި އިރު، އޭގެ ތެރެއިން 341 ދަރިވަރަކު ވަނީ ތަމްރީނު ފުރިހަމަކޮށް  ދަސްވެނިވެފައެވެ. ވަތަނީ ޚިދުމަތުގެ ތިންވަނަ ބެޗުގެ ތަމްރީނުތަކަށް ދަރިވަރުން މާފިލާފުއްޓަށް ދިޔައީ މިއަހަރުގެ ޖޫން މަހުގެ 8 ވަނަ ދުވަހުއެވެ.

މާފިލާފުށީގައި ތިން މަސް ދުވަހުގެ މުއްދަތަށް ކުރިއަށް ގެންދިޔަ މި ތަމްރީނު ޕްރޮގްރާމަކީ ޒުވާނުން ބާރުވެރިކުރުވައި، ޤައުމަށް ފައިދާހުރި ރައްޔިތުންތަކެއް ބިނާކުރުމުގެ މަޤްޞަދުގައި ހިންގުނު މުހިންމު ޕްރޮގްރާމެކެވެ. އެގޮތުން މި ތަމްރީނުގައި، ދިވެހި ޤައުމިއްޔަތާއި، ޒިންމާދާރު ރައްޔިތުކަމާއި، ދީނީ ތަރުބިއްޔަތާއި އަޚްލާޤާއި ސުލޫކު ދަސްކޮށްދީފައިވެއެވެ. މީގެ އިތުރުން ލީޑަރޝިޕް ހުނަރުތަކާއި، ހަށިހެޔޮކަމުގެ ތަމްރީނުތަކުގެ އިތުރުން ޢަމަލީ ދިރިއުޅުމުގެ މައިދާނުގައި ބޭނުންވާނެ ތަފާތު އެތައް ދާއިރާއަކުން މި ޒުވާނުންނަށް ވަނީ ފުރިހަމަ ތަމްރީނުތަކެއް ފޯރުކޮށްދީފައެވެ.

މި ރަސްމިއްޔާތުގައި ދަސްވެނިވި ދަރިވަރުންނަށް ސެޓްފިކެޓާއި، އެކި ގޮތްގޮތުން ފާހަގަކޮށްލެވުނު މޮޅު ދަރިވަރުންނަށް އިނާމު ދެއްވުން ވެސް އޮތެވެ.