ދައުލަތަށް ދައްކަންޖެހޭ ޓެކުހުގެ ފައިސާގެ ތެރެއިން އެއް މިލިއަން ރުފިޔާއަށްވުރެ ބޮޑު ޢަދަދެއް ނުދައްކައި ހުރި 33 ފަރާތެއްގެ މަޢުލޫމާތު މީރާއިން ހާމަކޮށްފިއެވެ.

މި ލިސްޓުގައި ކޮރަޕްޝަންގެ ކުށް ސާބިތުވެ 32 އަހަރުގެ ޖަލު ޙުކުމެއް ތަންފީޒުކުރަމުންދާ އެފްއޭއެމްގެ ކުރީގެ ރައީސް ބައްސާމްވެސް ހިމެނެއެވެ.

އޭގެ އިތުރުން ކޮންސްޓްރަކްޝަން ދާއިރާގައި ހަރަކާތްތެރިވާ އޭކޭޑީއޭ އިންޖިނިއާސް އިންޓަނޭޝަނަލް ޕްރައިވެޓް ލިމިޓެޑާއި، ޗީބޯ ކެފޭގެ ކުންފުނި ކަމަށްވާ ޗީބޯ އިންވެސްޓްމަންޓް ޕްރައިވެޓް ލިމިޓެޑާއި، ޑުބްލެކްސް ޕްރައިވެޓް ލިމިޓެޑާއި، މެދުފުށި އިންވެސްޓްމަންޓް ފަދަ ނަންތައް ވެސް އެ ލިސްޓުގައި ހިމެނެއެވެ.

ޓެކުސް ބަޔާން ހުށަނާޅާ ނުވަތަ ފައިސާ ނުދައްކާ ފަރާތްތަކުގެ ނަން ޢާންމުކުރުމާ ބެހޭ އުސޫލުގެ ދަށުން މީރާއިން ހާމަކުރި ލިސްޓުގައި ހިމެނެނީ ދައްކަންޖެހޭ ޓެކުހުގެ މިންވަރު ކަނޑައަޅައި އެންގުމާ އެއްގޮތަށް ފައިސާ ހަމަޖައްސައިފައިނުވާ ފަރާތްތައް ކަމަށް މީރާއިން ބުނެއެވެ.

އެ ފަރާތްތަކުގެ ނަން ޢާންމުކުރުމުގެ ކުރިން ފޯނު މެދުވެރިކޮށް ގުޅައި ޓެކުސް ނުދެއްކުމުން ޤާނޫނުގައި ކަނޑައެޅިފައިވާ އަދަބުތަކާއި އެޅޭނެ ފިޔަވަޅުތަކުގެ ތަފްސީލް ދީފައިވާނެ ކަމަށް މީރާއިން ބުނެއެވެ. އެއާ އެކު އެސްއެމްއެސް މެދުވެރިކޮށް ވެސް އެ ފަރާތްތަކަށް އެ ކަން އަންގައިފައިވާނެ ކަމަށް އެ އޮތޯރިޓީން ބުނެއެވެ.

ނުދައްކައި ހުރި ޓެކުހުގެ ފައިސާ ހޯދުމަށް މީރާގެ އެންފޯސްމަންޓް ޕޮލިސީގެ ދަށުން ކަނޑައެޅިފައިވާ އެހެނިހެން ފިޔަވަޅުތައް ވެސް އަޅާނެ ކަމަށް މީރާއިން ބުނެއެވެ.

ޓެކްސް ނުދައްކާ މީހުންގެ ލިސްޓް: https://www.mira.gov.mv/extended/NonCompliers?act=8