އާސެނަލްގެ މިޑްފީލްޑާ ހެންރިކް މިކިތަރިޔާން ލޯނު އެއްބަސްވުމެއްގެ ދަށުން އިޓަލީގެ އޭއެސް ރޯމާއަށް ބަދަލުވެއްޖެއެވެ.
ADS BY CANDIDATE
އާސެނަލްއަށް 59 މެޗް ކުޅެދީ 9 ގޯލް ޖަހައިދީފައިވާ މިކިތަރިޔާން ވަނީ ޕްރިމިއާ ލީގުގައި އާސެނަލް އެންމެ ފަހުން ޓޮޓެންހަމްއައި ދެކޮޅަށް ކުޅުނު މެޗުގައިވެސް ކުޅެފައެވެ.
ކޯޗް އެމެރީގެ ފުރަތަމަ އެގާރައިން ގަވައިދުން ޖާގަ ނުލިބޭކަން ފާހަގަވެފައިވާ މިކިތަރިޔާން އާސެނަލްއަށް ބަދަލުވީ މެންޗެސްޓާ ޔުނައިޓެޑް ދޫކޮށް ޖެނުއަރީ 2018 ގައެވެ. އާސެނަލް އަދި ޔުނައިޓެޑައި ދެމެދު ވެވުނު އެއްބަސްވުމުގެ ދަށުން މިކިތަރިޔާން އާސެނަލްއަށް ބަދަލުވިއިރު އެލެކްސިސް ސަންޗޭޒް ބަދަލުވީ ޔުނައިޓެޑަށެވެ.
ރޯމާއިން މިކިތަރިޔާންގެ މުސާރަ ދިނުމަށް ހަމަޖެހިފައިވާއިރު އޭނާ ދާއިމީކޮށް ގަތުމާ ބެހޭ އެއްވެސް ވާހަކައެއް އާސެނަލްއައި ދެމެދު ވެވުނު އެއްބަސްވުމުގައި ހިމެނިފައެއް ނުވެއެވެ.
މިކިތަރިޔާންގެ އިތުރުން އާސެނަލް އޮތީ ޑިފެންޑަރ މުސްތާފީ ދޫކޮށްލަންވެސް ތައްޔާރަށެވެ. ނަމަވެސް އޭނާއަށް އެކަށީގެންވާ ހުށަހެޅުމެއް ލިބިފައިނުވާ ކަމަށް އިނގިރޭސި މީޑިއާތަކުން ވަނީ ރިޕޯޓް ކޮށްފައެވެ.
