ރައްޔިތުންގެ މަޖިލީސް ތަމްސީލުކުރައްވައި، އެމްޑީޕީއަށް ނިސްބަތްވާ ތިން މެންބަރަކާއި މިނިވަން މެންބަރަކު އިދިކޮޅު ކޯލިޝަނާއި ގުޅެން ނިންމައިފިއެވެ.

''ވޮއިސް'' އަށް މައުލޫމާތު ދެއްވަމުން ޕީއެންސީގެ ޕީޖީ ލީޑަރު މަޑުއްވަރީ ދާއިރާގެ މެންބަރު އާދަމް ޝަރީފު އުމަރު މިއަދު ވިދާޅުވީ، ކުރިޔަށް އޮތް ދެ ދުވަސްތެރޭގައި އެމްޑީޕީގެ ތިން މެންބަރަކާއި މިނިވަން މެންބަރު އިދިކޮޅާއި ގުޅިވަޑައިގަންނަވާނެ ކަމަށެވެ.

އާދަމް ޝަރީފު ވިދާޅުވީ، އެބޭފުޅުން އިދިކޮޅާއި ގުޅިވަޑައިގަތުމަށް މަޝްވަރާތައް ކޮށްފައިވާ ކަމަށާއި އެބޭފުޅުން އިދިކޮޅާ ގުޅިވަޑައިގަންނަވަނީ އިދިކޮޅުގެ ސިޔާސީ ކަންކަން ރަގަޅުވެ، އެކަމަށް ހިތްހަމަޖެހޭތީ ކަމަށް ވިދާޅުވި ކަމަށެވެ.

''އެބޭފުޅުން ވަރަށް ހިތްހަމަޖެހޭ އަޅުގަނޑުމެންގެ ޕާޓީގެ މަސައްކަތްތައް ގެންގޫޅޭ ގޮތާމެދު. ހާއްސަކޮށް މަޖިލީހުގެ މަސައްކަތްތައް. ގެންގުޅޭ އުސޫލުތަކާމެދު ވަރަށް ހިތްހަމަޖެހޭ ކަމަށް ވިދާޅުވި. އިރާދަކުރެއްވިއްޔާ ވަރަށް އަވަހަށް އެކަން ހަމަޖެހޭނެ.'' އާދަމް ޝަރީފު ވިދާޅުވިއެވެ.