ކުޑަކުއްޖަކާއެކު ބަދުއަޚްލާގީ އަމަލު ހިންގި ކަމުގެ ކުށް ސާބިތުވެގެން 10 އަހަރުގެ ޖަލު ހުކުމެއް އިއްވާފައިވާ އބްރާހީމް ރަޝީދު (ހޯރަ އިއްބެ) ހައްޔަރުކުރިއިރު ކައިވެނިކުރަން ރަންކިޔާފައިވާކަމަށް ގާނޫނީ ވަކީލު އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވެއްޖެއެވެ.
މޫސާ ސިރާޖު މިފަދައިން ޓުވީޓު ކުރެއްވީ، ދެ އަހަރުގެ ތުއްތުކުއްޖަކު ރޭޕްކުރި މައްސަލައިގައި އެކުއްޖާގެ ބައްޕަ އާއި ކާފަ، އަދި މުނި ކާފަ ހައްޔަރުކުރުމާއި ގުޅިގެން، ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ގާނޫނީ ވަކީލުންގެ ޓީމްގައި ހިމެނިވަޑައިގަންނަވާ އާދަމް ޝަމީމް ކުރެއްވި ޓުވީޓަކަށް ރައްދު ދެއްވަމުންނެވެ.
ސިރާޖު ވިދާޅުވީ ޖިންސީ ގޯނާ ކުރި ކަމަށް ބުނާ އަންހެން ކުއްޖާއާ ކައިވެނިކޮށް ހޯރަ އިއްބެ އާއި އޭނާގެ ދަރިންވެސް ތިބޭ ކަމަށެވެ. އަދި ހައްޔަރުކުރިއިރު އެ އަންހެން ކުއްޖާއަށް 18 އަހަރު ފުރެން އޮތީ ދުވަސްކޮޅެއް ކަމަށާއި ހައްޔަރުކުރި އިރު ކައިވެންޏަށް ރަން ކިޔާފައިވާކަމަށް ވެސް ސިރާޖު ވިދާޅުވިއެވެ.
މީހުން ދައްކާ ވާހަކަ އަޑުއެހުމުގެ ބަދަލުގައި ހޯރަ އިއްބެގެ މައްސަލަ އެއްކޮށް ސްޓަޑީކޮށްލުމަށް މެމްބަރު ސިރާޖު ވަނީ ރައީސް ޔާމީންގެ ގާނޫނީ ވަކީލު އާދަމް ޝަމީމަށް އިލްތިމާސް ކުރައްވާފައެވެ.
ހޯރަ އިއްބެގެ މައްޗަށް ކުރިމިނަލް ކޯޓުން ދިހަ އަހަރުގެ ޖަލު ހުކުމެއް އިއްވުމާއި ގުޅިގެން އޭނާ ހުކުމްތަންފީޒު ކުރަމުން ދަނިކޮށް، ހޯރަ އިއްބެ މިނިވަންކުރީ ރައީސް އިބްރާހީމް މުހައްމަދު ސޯލިހެވެ. ނަމަވެސް އެމައްސަލައާއި ގުޅިގެން އާންމުންގެ ގިނަ ބަޔަކު ފާޑުކިޔުންތައް އަމާޒުވެފައިވަނިކޮށް، ރައީސް ސޯލިހު ވިދާޅުވެފައިވަނީ ހޯރަ އިއްބެ މިނިވަން ކުރުމަކީ އެއީ އެންމެ ރަގަޅަށް ކުރެވުނު ކަމެއް ނޫން ކަމަށެވެ.
Advertisement
This content is created and paid for by advertisers and does not involve Voice Journalists
