ތުޅާދޫ ދާއިރާގެ މެންބަރުކަމަށް ހިސާން ކުރިމަތިލައްވަނީ
އަންނަ އަހަރުގެ މާޗްމަހުގެ ތެރޭގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިހާބުގައި ބ.ތުޅާދޫ ދާއިރާގެ ގޮނޑިއަށް ކުރިމަތިލުމަށް، މަޝްހޫރު ގާނޫނީ ވަކީލު ހިސާން ހުސައިން ނިންމަވައިފިއެވެ.
މިގޮތަށް ނިންމެވިކަން އެކަމަނާ ހާމަކުރެއްވީ މިއަދުގެ ވަގުތެއްގައި ކުރެއްވި ޓްވީޓެއްގައެވެ. އެގޮތުން ހިސާން ވިދާޅުވީ އިންސާފުގެ މަގަށް ދިވެހިން ފަށާފައިވާ މަސައްކަތުގައި ތުޅާދޫ، ގޮއިދޫ، ފުޅަދޫ އަދި ފެހެންދޫގެ ރައްޔިތުން ތަމްސީލް ކުރުމުގެ ފުރުސަތު ދެއްވާނެކަމަށް އުއްމީދު ކުރައްވާ ކަމަށެވެ.
އަދި އެކަމަނާއަށް ތާއިދުކޮށްދެއްވުމަށް ވަނީ ދާއިރާާގެ ރައްޔިތުންގެ އަރިހުގައި ހިސާން އެދިލައްވާފައެވެ. މީގެ ކުރިންވެސް 2014 ވަނަ އަހަރުގެ މަޖިލިސް އިންތިހާބުގައި ހިސާން ވަނީ ހަމަ ބ.ތުޅާދޫ ދާއިރާާގެ ގޮނޑިއަށް ވާދަކުރައްވާފައެވެ.
2012 އަހަރުގެ ފެބްރުއަރީ މަހުގެ ހަތްވަނަ ދުވަހު އޭރުގެ ރައީސް މުހައްމަދު ނަޝީދު އިސްތިއުފާ ދެއްވުމާއި އެކު ހިސާން ހުސައިން ވަނީ ރައީސް ނަޝީދުގެ އިސް ގާނޫނީ ވަކީލެއްގެ ގޮތުގައި ހަރަކާތްތެރިވެ ލައްވަން ފައްޓަވާފައެވެ. އަދި އެއަށްފަހު އިދިކޮޅު ހަރަކާތުގެ ގިނަ ކަންކަމާއި، ސިޔާސީ ހައްޔަރީންގެ ގާނޫނީ ވަކީލެއްގެ ގޮތުގައި އެކަމަނާ ވަނީ ހަރަކާތްތެރިވެލައްވާފައެވެ.
ފާާހަގަކޮށްލެވޭ ގޮތުގައި އެކަމަނާ އަކީ އިންތިހާބީ ރައީސް، އިބްރާހިމް މުހައްމަދު ސޯލިހުގެ އިންތިހާބީ އެޖެންޓް ވެސްމެއެވެ.
Advertisement
This content is created and paid for by advertisers and does not involve Voice Journalists
