އެމްއެންޑީއެފް އިން މިއަދު އެކްސްގައި ކުރި ޕޯސްޓެއްގައި ބުނެފައިވަނީ މި މަހުގެ 19 ވަނަ ދުވަހުން ފެށިގެން ކުރިއަށް ގެންދިޔަ ސީ ވިޝަން އޮޕެރޭޓަރ ކޯހުގައި ބައިވެރިވެ، ދިވެހި ކޯސްޓުގާޑުގެ 17 ސިފައިން ކާމިޔާބުކަމާއެކު އެ ކޯސް ފުރިހަމަ ކޮށްފައިވާ ކަމަށެވެ. ސީ ވިޝަން އޮޕެރޭޓަރ ކޯހަކީ، ރާއްޖޭގެ ކޯސްގާޑަށް އަމާޒުކޮށް އެމެރިކާ ކަނޑުގެ ސިފައިންގެ ހަތްވަނަ ފްލީޓުން ހިންގި ކޯހެކެވެ.

މިއަދު މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކުރެއްވި ގޮތުގައި އެމެރިކާ ސިފައިންނާ ގުޅިގެން ބާއްވާ އެކްސަސައިޒް، ބްލެކް މަރލިން، ފެށުމުގެ ގޮތުން ބަންޑާރަކޮށީގައި ވަނީ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި ޗީފް އޮފް ޑިފެންސް ފޯސް، މޭޖަރ ޖެނެރަލް އިބްރާހީމް ޙިލްމީގެ އިތުރުން ޔޫއެސް މޮންޓާނާ ނޭޝަނަލް ގާޑުގެ އެޖުޓަންޓް ޖެނެރަލް، މޭޖަރ ޖެނެރަލް ޕީޓަރ ރޮނެކްވެސް ވަނީ ބައިވެރިވެލައްވާ ރިމާކްސް ހުށަހަޅުއްވައި ދެއްވާފައެވެ.