އުތެމައިން ނެރުނު ރިޕޯޓްގައި އިސްލާހުކުރަންވީ ބައިތައް ވާނީ އަންގާފައި: ޑރ.އަހުމަދު ޒާހިރު
ދިވެހިރާއްޖޭގައި ހަރަކާތްތެރިވާ މަދަނީ ޖަމްއިއްޔާއެއް ކަމަށްވާ އުތެމައިން ނެރުނު ރިޕޯޓެއްގައި ހުރި އިސްލާމްދީނާއި ފުށޫއަރާ ބައިތައް އިސްލާހުކުރުމަށް އެ ޖަމްއިއްޔާއަށް އެންގިފައިވާނެ ކަމަށް އިސްލާމިކް މިނިސްޓަރ ޑރ.އަހުމަދު ޒާހިރު އަލީ ވިދާޅުވެއްޖެއެވެ.
އެބޭފުޅާ މިހެން ވިދާޅުވީ ރޭ ވީޓީވީއިން ގެނެސްދިން ފަސްމަންޒަރު ޕްރޮގްރާމްގައި ވާހަކަދައްކަވަމުންނެވެ.
އިސްލާމިކް މިނިސްޓަރ ޑރ.ޒާހިރު ވިދާޅުވީ އިސްލާމްދީނާއި ފުށުއަރާ ފަދަ ވާހަކައެއް ދައްކައިފިނަމަ، އެބަޔަަކަށް ނަސޭހަތްދީގެން އެކަން އިސްލާހުކުރުމަކީ އެ މިނިސްޓްރީގެ ޒިންމާއެއް ކަމަށެވެ. އެގޮތުން އުތެމަ ޖަމްއިއްޔާއިން ނެރުނު ރިޕޯޓްގެ މައްސަލައިގައިވެސް އަމަލުކޮށްފައިވާނީ ހަމަ އެ މޭރުމުންކަމަށް އެބޭފުޅާ ވިދާޅުވިއެވެ.
މިނިސްޓަރ ވަނީ އެ ރިޕޯޓްގައި ހުރި ކަންބޮޑުވުންތައް ފާހަގަ ކުރުމުން، އުތެމައިން އެކަންތައްތައް އިސްލާހުކޮށްފައިކަން ފާހަގަކުރައްވާފައެވެ.
ޑރ.އަހުމަދު ޱޒާހިރު ވިދާޅުވިގޮތުގައި އެ ރިޕޯޓްގައިވާ ބައެއް ވާހަކަތަކަކީ ދީނީގޮތުން މައްސަލައެއްކަން އުތެމަ ޖަމްއިއްޔާގެ ފަރާތްތަކަށްވެސް ސާފެއް ނުވެއެވެ. ނަމަވެސް މިނިސްޓްރީއަށް ހާޒިރުވާން އެންގުމުން އެކަމަށް ތަބާވެ، ސުވާލުތަކަށް ޖަވާބުދީވެސް ހަދަމުންދާކަމަށް އެބޭފުޅާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists