ދައުލަތް ޒިންމާވާން ޖެހޭ ލޯނުތައް ނަގާއިރު ރައްޔިތުންގެ މަޖިލީހުގެ ރުހުން ހޯދުމަކީ ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހުއަށް ވެރިކަން ކުރެއްވުމަށް ދަތިފުޅުވާނެ ކަމެއް ނޫންކަމަށް، އެފަދައިން މާލިއްޔަތު ގާނޫނު އިސްލާހު ކުރުމަށް ހުށައެޅުއްވި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު ވިދާޅުވެއްޖެއެވެ.
ތާރިގު މިފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ ހަތަރުވަނަ ޖަސްލާގައި މާލިއްޔަތު ގާނޫނަށް ގެނައުމަށް ހުށައަޅާފައިވާ އިސްލާހަށް ވާހަކަދައްކަވަމުންނެވެ.
އެގޮތުން ތާރިގު ވިދާޅުވީ އެ ބިލު ހުށައެޅުއްވި މަގްސަދަކީ ދައުލަތް ބަނގުރޫޓުވާ ވަރަށް ސަރުކާރުން ލޯނުތައް ނަގަމުންދާއިރު، ސަރުކާރު ޖަވާބުދާރީ ކުރުވަން އޮންނަ ރައްޔިތުންގެ މަޖިލީހަށްވެސް ކޮންމެވެސް ދައުރެއް އަދާކުރެވޭނެ މަގު ފަހިކޮށްދިނުންކަމަށެވެ.
އަދި ލޯނު ނަގާއިރު މަޖިލީހުގެ ރުހުން ހޯދަން ޖެހޭ ގޮތަށް އޮތުމަކީ ރައީސް ސޯލިހުއަށް ވެރިކަން ކުރަން ދަތިފުޅުވާނެ ކަމެއް ނޫންކަމަށް އޭނާ ވިދާޅުވިއެވެ.
"މި މަޖިލީހުގައި ރައީސުލްޖުމްހޫރިއްޔާވެސް އެބަ ވިދާޅުވޭ ޕަބްލިކް ފޯރަމްތަކުގައި ތިމަންނަގެ އަތުގައި މަޖިލީހުގެ މެޖޯރިޓީ އެބަ އޮތޭ. ރައްތިރުންގެ މަޖިލީހުގެ ސުޕަރ މެޖޯރިޓީ ރައީސުލް ޖުމްހޫރިއްޔާގެ އަތްޕުޅުގައި އޮތްކަމަށް އިއުތިރާފު ވާ ނަމަ، މި ތަނަށް ގެނެސް ރައްޔިތުންގެ މަޖިލީހުގެ މާލިއްޔަތު ކޮމެޓީއިން އެ ދިރާސާކޮސްފަ، ރައްޔިތުންގެ މަޖިލީހުގެ ޗެމްބަރުން ނިންމުމަކީ ވެރިކަން ކުރަން އުނދަގޫވާނެ ކަމެއް ނޫން" ތާރިގު ވިދާޅުވިއެވެ.
ތާރިގު އިތުރަށް ވިދާޅުވީ މިހާރުވެސް ސޮވްރިން ގެރެންޓީގެ ގޮތުގައި ނަގަމުންދަނީ ބަޖެޓުގައިވެސް ހިމަނާފައި ނެތް އަދަދުތަކުންކަމަށެވެ.
މި ވެރިކަމަށް ބާކީ އޮތީ އެންމެ އަހަރެއްކަމަށާއި، އެ މުއްދަތުގެ ތެރޭގައި އިތުރަށް ދައުލަތް ދަރަނިވެރިކުރުވާނެ ލޯނުތައް ނުނަގާނެކަމުގެ އެއްވެސް ޔަގީންކަމެއް ނެތް އިރު، ސަރުކާރުން ނަގާ ލޯނުތަކާއި މެދު މަޖިލީހަށް ފާރަވެރި ވެވޭނެ އުސޫލެއް އޮތުން މުހިންމުކަން ތާރިގު ތަކުރާރުކޮށް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
