ޖުމްހޫރީ ޕާޓީގެ ލީޑަރު އަދި މަޝްހޫރު ވިޔަފާރިވެރިޔާ ގާސިމް އިބްރާހިމްގެ ވިލާ ކުންފުނީގެ ދަށުން ހިންގާ ހޮރައިޒަން ފިޝަރީސްގެ ދިފާއުގައި ޖޭޕީގެ ސްލޮޓެއްގައި ފިޝަރީސް މިނިސްޓަރުކަމުގެ މަގާމުގައި ހުންނަވާ ޑރ. ހުސެއިން ރަޝީދު މަޖިލީހުގައި އިތުރުފުޅުހެއްދެވިކަމަށް ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާނު ތުހުމަތުކުރައްވައިފިއެވެ. 

މިހާރު ކުރިއަށްދާ ރައްޔިތުންގެ މަޖިލީހުގެ ތިން ވަނަ ދައުރުގެ ފަސް ވަނަ ޖަލްސާގައި މަޑަވެލި ދާއިރާގެ މެމްބަރު ފިރުޝާން ވަނީ ހޯޑެއްދޫގައި ހޮރައިޒަން ފިޝަރީސްއިން ހަދަން ފައްޓާފައިވާ މަސްފެކްޓްރީ ނިންމަން ދެވިފައިވާ މުހުލަތަކީ ކޮބައިތޯއާއި، އެކި ފަހަރުމަތިން ދެވިފައިވާ މުހުލަތުތަކަށް ނުނިމި 17 އަހަރު ވެގެން ދިޔައިރު، މިނިސްޓްރީއިން އެކަމާއި ގުޅޭގޮތުން އެޅި ފިޔަވަޅަކީ ކޮބައިތޯ އައްސަވާ ފިޝަރީސް މިނިސްޓަރާއި ސުވާލުކުރައްވާފައެވެ. 

އެ ސުވާލަށް ޖަވާބުދެއްވަމުން މިނިސްޓަރު ވިދާޅުވީ ގދ ހޯޑެއްދޫގައި ކޯލްޑް ސްޓޯރޭޖަކާއި މަސް ގަންގަން ފެސެލިޓީއެއް ހެދުމަށް ހޮރައިޒަން ފިޝަރީސްއާއި ހަވާލުކޮށްފައިވަނީ 7 އޯގަސްޓު 2005ގައި ކަމަށެވެ. 

އެ އެއްބަސްވުމުގައި ވާގޮތުން ކޯލްޑް ސްޓޯރޭޖް ފެސިލިޓީއެއް ގާއިމުކުރުމުގެ މަސައްކަތް ކުރުމަށް ބިން ދޫކުރި ތާރީހުން ފެށިގެން އެއް އަހަރު ދުވަހުގެ ތެރޭގައި 1000 ޓަނުގެ ކޯލްޑް ސްޓޯރޭޖެއް އެކުންފުނިން ހަދަން ޖެހޭކަމަށް އެއްބަސްވުމުގައި ބަޔާންކޮށްފައި އޮތްކަމަށް މިނިސްޓަރު ވިދާޅުވިއެވެ. 

އެކަމަށްޓަކައި ބިން ދޫކޮށްފައި އޮތްކަން ފިޝަރީސް މިނިސްޓްރީގެ ލިޔެކިޔުންތަކުން ފެންނަން އޮތްކަމަށް މިނިސްޓަރު ވިދާޅުވިއެވެ. 

އަދި ފުރަތަމަ ވޯކް ޕްލޭނުގައިވާ ގޮތުން 7 ސެޕްޓެމްބަރު 2006 ގެ ނިޔަލަށް އެ ކުންފުނިން މަސައްކަތް ނިންމަން ޖެހޭކަން މިނިސްޓަރު ފާހަގަކުރެއްވިއެވެ. 

އެހެން ނަމަވެސް އެ މުއްދަތު ހަމަވިފަހުން ހޮރައިޒަން ފިޝަރީސްއިން މަސައްކަތް ނިންމުމަށް އިތުރު 358 ދުވަސް ދިނުމަށް މިނިސްޓްރީގައި އެދިފައިވާ ކަމަށާއި، އެ އެދުމާއި އެއްގޮތަށް އެ ކުންފުންޏަށް އިތުރު މުއްދަތުދީ އެއްބަސްވުމަށް ބަދަލު ގެނެސްފައިވާކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ ކޯލްޑް ސްޓޯރޭޖު އެޅުމަށް ގާއިމުކޮށްފައިވާ ބިމުގެ އެއްބަޔަކީ ފަޅު ހިއްކައިގެން އުފައްދާފައިވާ ބިމެއް ކަމަށެވެ. 

މަސައްކަތް ފުރިހަމަކުރުމަށް ހޮރައިޒަންއަށް އިތުރުކޮށްދިން މުއްދަތު ހަމަވުމާއެކު، އެ މަސައްކަތް ކުރިއަށް ގެންދިއުމަށް އެ ކުންފުންޏަށް ބޮޑެތި ހުރަސްތަކެއް ހުރިކަން ފާހަގަކޮށް މިނިސްޓްރީއަށް ސިޓީ އެއް ފޮނުވާފައިވާކަމަށް މިނިސްޓަރު ވިދާޅުވިއެވެ. 

އެގޮތުން ކޯލްޑް ސްޓޯރޭޖު ހެދުމަށް ބޭނުންވާ މުދާ އަގު ބޮޑުވުމާއި، އެތަކެތި ވިއްކާ ފަރާތްތަކުގެ ކޮމިޓްމަންޓު ނުލިބުމާއި، ބޭރުން ގެންނަ ހިލައާއި ހިލަވެލި ގެނައުމުގައި ކޯޓާ ނުލިބުންފަދަ ކަންކަމާއި ކުރިމަތިވެފައިވާތީ، އިތުރު އެއް އަހަރަށް އަނެއްކާވެސް މުއްދަތު އިތުރުކުރުމަށް ހޮރައިޒަންއިން އެދިފައިވާކަން މިނިސްޓަރު ހާމަކުރެއްވިއެވެ. 

އެކަންކަމުގެ އިތުރުން އެންމެ ބޮޑު ގޮންޖެހުމެއްގެ ގޮތުގައި ފާހަގަކޮށްފައިވަނީ ހޯޑެއްދޫގެ ބަނދަރު ފުންކުރުމަށް ނަގާފައިވާ ވެލީގެ ތެރެއިން ހޯޑެއްދޫއާއި މަޑަވެލި ދެމެދުގައި ހިއްކުމަށް ބޭނުންކުރުމަށް ހުރި ވެލި ކޯލްޑް ސްޓޯރޭޖް ހެދުމަށް ކަނޑައަޅާފައިވާ ސައިޓުގައި ވަގުތީގޮތުން ބަހައްޓާފައި ހުރުމާއި، އެ ވެލި އެތަނުން ނުގަލާ ލަސްވަަމުންކަން ކުންފުނިން ބުނާކަމަށް މިނިސްޓަރު ވިދާޅުވިއެވެ. 

ކޯލްޑް ސްޓޯރޭޖުގެ މަސައްކަތް ލަސްވަނީ އެ ވެލިފުނިތައް އެތަނުގައި ހުރުމުންކަން ހޮރައިޒަނުން ފާހަގަކުރާކަމަށް މިނިސްޓަރު ވިދާޅުވިއެވެ. 

އަދި ހަމައެއާއެކު އެ ވެލިފުނި ނަގާ އަޅާނެ ތަނެއް ހަމަޖައްސާ ނުދެނިސް ޕްރޮޖެކްޓު ނިމޭނެ ތާރީހެއް ދަންނަވަން ނޭނގޭކަމަށް ހޮރައިޒަނުން ބުނެފައިވާކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވީ ލިޔެކިޔުން ދައްކާގޮތުގައި ޕްލޭނިން މިނިސްޓްރީއިން އެ ވެލިތައް އެޅުމަށް އެންމެ ފުރަތަމަ ނިންމާފައިވަނީ ހޯޑެއްދޫއާއި މަޑަވެއްޔާއި ދެމެދު ހިއްކުމަށް އެޅުމަށްކަމަށެވެ.

"ކޮންމެއަކަސް އެ ވެލި ބަހައްޓާފައ ހުރީ ކޯލްޑް ސްޓޯރޭޖު އެޅުމަށް ކަނޑައަޅާފައިވާ ބިމުގައި. އެހެންކަމުން އެ ވެލިތައް އެތަނުން ނުނަގަނިސް ކޯލްޑް ސްޓޯރޭޖް ފެސިލިޓީ ހެދުމަށް ކުރަން ޖެހޭ އިމާރާތްތަކާއި ކަންކަން އޮތީ ނުކުރެވިފައި" މިނިސްޓަރު ވިދާޅުވިއެވެ. 

އެއާއެކު މިނިސްޓަރު ވިދާޅުވީ އެމްޑީޕީގެ ފުރަތަަމަ ވެރިކަމުގައިވެސް ހޮރައިޒަންއަށް މަސައްކަތް ނިންމުމަށް އިތުރު މުއްދަތު ދީފައިވާކަމަށެވެ. އެގޮތުން ސަރުކާރާއި ހޮރައިޒަންއާއި ދެމެދު ހެދިފައިވާ އެއްބަސްވުމުގައި ކޯލްޑް ސްޓޯރޭޖު ހެދުމަށް ކަނޑައަޅާފައިވާ ސައިޓުގައި ހުރި ވެލިފުނި ހުސްކުރާތާ 24 މަސް ދުވަހުގެ ތެރޭގައި މަސައްކަތް ފުރިހަމަކުރުމަށް އެއްބަސްވުން އިސްލާހުކޮށްފައިވާކަން މިނިސްޓަރު ފާހަގަކުރެއްވިއެވެ. 

އެހެން ނަމަވެސް އެ ފަހުންވެސް އެ ވެލިތައް އަޅާނެ ތަނެއް ސަރުކާރުން ހޮރައިޒަންއަށް ދައްކާފައިވާކަން ލިޔެކިޔުމުން ފެންނަން ނެތްކަމަށް މިނިސްޓަރު ވިދާޅުވިއެވެ. 

މިނިސްޓަރު ވިދާޅުވިގޮތުގައި ހޮރައިޒަންއަށް މަސައްކަތް ކުރިއަށް ގެންދިއުމަށް ދަތިވެގެން އުޅޭ ވެލިފުނީގެ މައްސަލަ ހައްލުކޮށްދެވުނީ 2019 ވަނަ އަހަރުގައިކަމަށެވެ. 

"28 އޭޕްރިލް 2019ގައި މިނިސްޓްރީ އޮފް ފިޝަރީސްގެ ޓީމެއް، ގދ ހޯޑެއްދޫއަށް ކުރި ދަތުރުގައި ކޯލްޑް ސްޓޯރޭޖު ހެދުމަށް ހުރި ހަރަހައްދުގައި ހުރި ވެލި ފުނި އެ ސަރަހައްދުން ނަގާ ހުސްކޮށްފައިވާކަން ވަނީ ފާހަގަކުރެވިފައި، އޭގެ ކުރިން ހޯޑެއްދޫއަށް ކުރި ދަތުރުތަކުގައި އެ ވެލި ފުނި ނަގާފައިވާކަން ފާހަގައެއް ނުވޭ" މިނިސްޓަރު ވިދާޅުވިއެވެ. 

އަދި އެފަހުން ކޯލްޑް ސްޓޯރޭޖްގެ މަސައްކަތް ނިންމަން ރާވާފައިވާ ގޮތުގެ އާ ވޯކް ޕްލޭނެއް މިނިސްޓްރީއަށް ހުށއެޅުމަށް ހޮރައިޒަންއަށް އަންގާފައިވާނެކަމަށާއި، އަދި އެ އެންގުމުގެ ޖަވާބުގައި ކުންފުނިން މަސައްކަތް ނިންމުމަށް ފައިސާ ހޯދަމުންދާ ކަމަށާއި، ފައިސާ ހަމަޖެހޭތާ ދެ އަހަރު ދުވަހުގެ ތެރޭގައި މަސައްކަތް ނިންމާނެކަން އަންގާފައިވާކަމަށް މިނިސްޓަރު ވިދާޅުވިއެވެ.

މިނިސްޓަރުގެ އެ ޖަވާބާއި ގުޅިގެން ފިރުޝާން އިތުރު ފުރުސަތެއް ހޯއްދަވާ ވިދާޅުވީ މިނިސްޓަރު ދެއްވި ޖަވާބުގައި ހަގީގަތާއި ޚިލާފު ކަންކަން ހުރިކަމަށެވެ.

ހޮރައިޒަން ފިޝަރީސްއަށް ދޫކޮށްފައިވާ ސައިޓުގައި ވެލިފުނިތަކެއް ހުރިކަމަށާއި، މަސައްކަތް ނުކުރެވި ދިގުލައިގެން ދިޔައީ ސައިޓުގައި ހުރި ވެލިފުނިތަކުގެ ސަބަބުންކަމަށް ވިދާޅުވެ މިނިސްޓަރު ހެއްދެވީ ކަނޑައެޅިގެން އިތުރުފުޅެއްކަމަށް ފިރުޝާން ވިދާޅުވިއެވެ.

"ވެލިފުންޏެއްގެ ވާހަކަ ވިދާޅުވެއްޖެ. އެ ވިދާޅުވާ ވެލިފުނިތައް ހުރީ ހޮރައިޒަން ފިޝަރީސްއަށް ދޫކޮށްފައިވާ ސައިޓުން ބޭރުގައިކަން ފާހަގަކޮށްލަން." ފިރުޝާން ވިދާޅުވިއެވެ.

ހޮރައިޒަނުން މަސައްކަތް ލަސްކުރުމަށް އެކިފަހަރުމަތިން ދެއްކި ބަހަނާތަކުގެ ތެރޭގައި 2012 ވަނަ އަހަރު އެމްޑީޕީއިން ތަންތަން ރޯކޮށްލުމާއި ގުޅިގެން އެ ކުންފުނީގެ ސައިޓަށްވެސް ގެއްލުންދިންކަމަށް އަންގާފައިވާކަން މިނިސްޓަރުގެ ޖަވާބުގައި ވިދާޅުވެފައިވެއެވެ. އަދި އިންޝިއުރަންސް ފައިސާ ނުލިބި އޮތުމުން ފައިސާގެ ދަތިކަން ދިމާވެފައިވުންވެސް ކުންފުނިން ފާހަގަކުރައްވާކަމަށް މިނިސްޓަރު ވިދާޅުވިއެވެ. 

މެމްބަރު ވަނީ މިނިސްޓަރުގެ އެ ވާހަކަތަކަކީވެސް އިތުރުުފުޅުތަކެއްކަމަށާއި، މިނިސްޓަރު މަޖިލީހުގައި ތަމްސީލުކުރައްވަނީ ހޮރައިޒަން ފިޝަރީސް ކުންފުނިކަމަށް ވިދާޅުވެފައެވެ. 

"ރޯކޮށްލުން، 2012ގެ އަލިފާނުގެ ހާދިސާއާއި ގުޅިގެން އަޅުގަނޑަށް މައުލޫމާތު ލިބިފއިވާ ގޮތުގައި އެ ކުންފުނިން ވަނީ އިންޝިއުރަންސްއިން ހަމަ އެ އަދަދަށް ފައިސާ ހޯދާފަ" މެމްބަރު ވިދާޅުވިއެވެ. 

ފިރުޝާން އިތުރަށް ވިދާޅުވީ، މިނިސްޓްރީއިން މޮނިޓަރިން ދަތުރުތަކެއް ކުރިކަމަށް ވިދާޅުވިއިރު އެ ދަތުރުތަކުން ހާސިލުކުރި އެއްވެސް ނަތީޖާއެއް ނުފެންނަކަމަށެވެ. އަދި ހޮރައިޒަނުން އެއްބަސްވުމާއި ޚިލާފުވެފައިވާ އެއްވެސް ކަމެއް މިނިސްޓަރުގެ ޖަވާބުގައި ވިދާޅުވެދެއްވާފައި ނުވާކަންވެސް މެމްބަރު ފާހަގަކުރެއްވިއެވެ. 

އޭގެ އިތުރުން މިނިސްޓަރު ކުންފުނި ތަމްސީލުކުރައްވާ ގޮތަށް، މަޖިލީހަށް ވަޑައިގެން ވާހަކަފުޅުދެއްކެވުމަކީ ސުވާލު އުފެދޭ ކަމެއްކަމަށް މެމްބަރު ވިދާޅުވިއެވެ. 

ހޯޑެއްދޫގައި ކޯލްޑް ސްޓޯރޭޖަކާއި ފިޝިން ކޮމްޕްލެކްސްއެއް ގާއިމުކުރުމަށް ހަވާލުކުރިތާ 17 އަހަރުވެގެން ދިޔައިރު، އެކަން ނުކުރެވި އޮތް ސަބަބާއި ގުޅިގެން ފިޝަރީސް މިނިސްޓަރު މަޖިލީހަށް ހާޒިރުކޮށް މީގެ ކުރިންވެސް ވަނީ ސުވާލުކޮށްފައެވެ. 

އެހެން ނަމަވެސް، އެ ދުވަހުވެސް މިނިސްޓަރުގެ ވާހަކަފުޅު ބިނާކޮށްފައި ހުރީ ކުންފުނި ދިފާއުކުރުމަށްކަން ފާހަގަކޮށްލެވެއެވެ. އަދި މަސައްކަތް ނުނިންމާ ދުވަސްތައް ފާއިތުވާއިރު، އެ ކުންފުންޏަށް ބޮޑެތި ލުއިތަކެއް އެކި ފަހަރުމަތިން ސަރުކާރުތަކުން ދީފައިވާކަންވެސް ފާހަގަކޮށްލެވއެވެ. 

ހޯޑެއްދޫގައި ގާއިމުކުރުމަށް ހޮރައިޒަންއާއި ހަވާލުކުރި ކޯލްޑް ސްޓޯރޭޖުގެ މަސައްކަތް ނުނިމި ލަސްވަމުންދާތީ، އެ ސަރަހައްދުގެ މަސްވެރިން ގެންދަނީ ބޮޑެތި ކަންބޮޑުވުންތަކެއްވެސް ފާޅުކުރަމުންނެވެ.

މަޝްވެރިންގެ ޝަކުވާތަކާއެކު ޕެޓިޝަނެއްގައި ސޮއިކޮށް ރައީސް އޮފީހަށް ހުށައަޅާފައި ވީނަމަވެސް މިހާތަނަށް އެ މައްސަލައަށް އެއްވެސް ހައްލެއް ހޯދާދެވިފައެއް ނެތެވެ.