ދައުލަތުގެ ރިޒާވްގައި ދެމަސް ދުވަހު ކާޑުގަނެވޭނެވަރަށްވެސް ފައިސާ ނެތްކަމަށް މަޖިލީހުގެ މާވަށުދާއިރާގެ މެމްބަރު އަދި ކުރީ ސަރުކާރުގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. 

ސައީދު މިފަދައިން ވިދާޅުވީ މަޖިލީހުގެ ތިންވަނަ ދައުރުގެ އަށްވަނަ ޖަލްސާގައި ޓުއަރިޒަމާއި ބެހޭ ގާނޫނަށް ގެނައި އިސްލާހަށް ބަހުސްކުރައްވަމުންނެވެ. 

ސައީދުގެ ވާހަކަފުޅު ފައްޓަވަމުން ވަނީ ސަރުކާރުން، ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި އުފެއްދެވި ސޮވްރިން ދޮވެލޮޕްމަންޓު ފަންޑަށް އިހުމާލުވެފައިވާކަމަށް ވިދާޅުވެފައެވެ. އެއާއެކު އޭނާ ވަނީ ދައުލަތުގެ ރިޒާވް ކަންބޮޑުވާ މިންވަރަށް ދަށަށް ގޮސްފައިވާކަންވެސް ހާމަކުރައްވާފައެވެ. 

"22 ޖުލައި އާ ހިސާބުގައި ގްރޮސް އިންޓަރނޭޝަނަލް ރިޒާވް 728 މިލިއަން ހުރިކަމަށް ޚަބަރު ލިބިފައި، ހަމަ މިހާރު އަޅުގަނޑުމެންނަށް މި އެނގެނީ 446 މިލިއަން ޝޯޓްޓާމް ލައިބިލިޓީސްގައި ހުރިކަން. ދަންނަން މި އުޅެނީ ދެމަސް ދުވަހުގެ ކާޑު ގަނެވޭވަރަށް މިއަދު ފައިސާ ނެތް. 282 މިލިއަން ޔޫސަބަލް ރިޒާވްގައި ހުރީ" ސައީދު ވިދާޅުވިއެވެ. 

ދައުލަތުގެ ރިޒާވްއާއި މެދު ކަންބޮޑުވުން ފާޅުކުރައްވާ ސައީދު ވަނީ ރިޒާވްއަށް ވަމުންދާ ގޮތް ބެލުމަށް މަޖިލީހުން ކުއްލި ސެޝަނެއް ބޭއްވުމަށް ގޮވާލައްވާފައެވެ. 

އަދި ރިޒާވް މިހާބޮޑަށް ދަށްވެގެން ދިއުމުގައި އިހުމާލު އޮތް ފަރާތްތައް ހޯދާ، އެކަމުގެ ޒިންމާ އުފުަންޖެހޭ ފަރާތްތަކަކީ ކޮބައިތޯ ބެލުމުގެ މަސައްކަތް މަޖިލީހުން ކުރުމަށްވެސް އޭނާ ވަނީ ގޮވާލައްވާފައެވެ. 

އޭނާ އިތުރަށް ވިދާޅުވީ، މިހާލު ރައްޔިތުންނަށް ޖެހުނީ އެމްޑީޕީގެ ވެރިކަމެއްގައިކަމަށެވެ. އިތުރު ޕާޓީތަކާއި ކޯލިޝަން ހަދައިގެން އޮތް ނަމަވެސް، މިއީ އެމްޑީޕީ އިސްވެ އޮވެ ހިންގާ ސަރުކާރެއްކަމަށާއި، މި ސަރުކާރަކީ އެމްޑީޕީ ސަރުކާރެއް ނޫންކަމަށް ބުނެ ބޯދަމައިގަތުމުގެ ހައްގު އެމްޑީޕީއަށް ލިބިގެން ނުވާކަމަށް އޭނާ ވިދާޅުވިއެވެ.