ގްރީން ޓެކްސްއަކީ ތިމާވެއްޓަށް ލިބޭ ގެއްލުންތަކަށް، ނުވަތަ ތިމާވެށި ހިމާޔަތްކުރުމަށް ނަގާ ޓެކްސްއެއްކަމަށްވާއިރު، އެ ޓެކުހުން ލިބޭ އާމްދަނީ އެ ނޫންކަންކަމަށް ބޭނުންކޮށްގެން ނުވާނެކަމަށް މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު(ވައްޑެ) ވިދާޅުވެއްޖެއެވެ. 

ވަހީދު މިފަދައިން ވިދާޅުވެފައިވަނީ ޓުއަރިޒަމާއި ބެހޭ ގާނޫނަށް ހުށައަޅާފައިވާ އިސްލާހަށް މަޖިލީހުގައި ވާހަކަދައްކަވަމުންނެވެ. 

އޭނާ ވިދާޅުވީ ގްރީން ޓެކްސްގެ ނަމުގައި ޓެކުހެއް ތައާރަފްކުރީ، ރާއްޖޭގެ ފަތުރުވެރިކަމުގެ ސިނާއަތަކީ ގުދުރަތީ ވަސީލަތްތަކާއި ގުޅިފައިވާ ސިނާއަތަކަށްވުމުން، ތިމާވެށި ހިމާޔަތްކުރުމަކީ ކޮންމެހެން ކުރަންޖެހޭ ކަމަކަށް ވާތީ، އެކަމަށް ޚަރަދުކުރުމަށް ފައިސާ ހޯދުމަށްކަމަށެވެ. 

Advertisement

"ގްރީން ޓެކްސް މި ނަގަނީ، ދިވެހިރާއްޖޭގެ ތިމާވެއްޓަކީ އޭގެ މަތީގައި އަޅުގަނޑުމެންގެ މުޅި އިގްތިސާދާއި އަޅުގަނޑުމެންގެ ހުރިހާކަމެއް ބިނާވެފައި އޮތް އެތިކަމަށް ވާއިރު، ރާއްޖޭގެ ތިމާވެށީގެ މައްސަލަތައް އޭގެ ނާޒުކުކަން އިންތިހާއަށް ހުރިއިރުގައި އެކަމަށް ކުރަންޖެހޭ ހޭދަ ބޮޑުވެގެން އެކަމަށްޓަކައި އަޅުގަނޑުމެން ފަންޑެއް އެކަށައަޅަންވެގެން ނަގަން ފެށި އެއްޗެއް ގްރީން ޓެކްސް އަކީ" ވަހީދު ވިދާޅުވިއެވެ. 

ވަހީދުގެ ވާހަކައިގައި ވަނީ ގްރީން ޓެކްސް އޮޅުވާނުލުމަށް އެދިވަޑައިގަންނަވާފައެވެ. ހުރިހާ ރައްޔިތުންނަށް ހަމަހަމަކަމާއެކު ޓެކްސް ބަހަން ޖެހޭ ވާހަކަ މެމްބަރުން ފާހަގަކުރެއްވި ނަމަވެސް، ގްރީން ޓެކްސްއިން ޚަރަދުކުރަންވާނީ ތިމާވެއްޓާއި ގުޅުންހުރި ކަންކަމަށް އެކަނި ކަމަށް ވަހީދު ވިދާޅުވިއެވެ. 

ވަކިން ޚާއްސަކޮށް، ރަށްރަށުން ޓެކްސްދައްކާނަމަ، އެރަށެއްގެ ތިމާވެެށި ހިމާޔަތްކުރުންފަދަ ކަންކަމަށް ޚާއްސަ އިސްކަމެއް ދެވެންވާނެކަންވެސް ވަހީދު ފާހަގަކުރެއްވިއެވެ. 

"ރަށެއްގައި ޚިދުމަތްދޭ ގެސްޓު ހައުސްއަކުން ވިޔަސް، ހޮޓަލަކުން ވިޔަސް ދި ހޯމް ސްޓޭ ތަނަކުންވިޔަސް، އެ ރަށެއްގައި އެދޭ ޚިދުމަތަކުން އެ ރަށެއްގައި ހިންގާ ތަނަކުން ވެއްޓަށް ލިބިދާނެ ގެއްލުމަކަށްޓަކައި ނޫނީ ނުވަތަ ވެށީގެ ކަންކަން ބެލެހެއްޓުމަށްޓަކައި ނޫނީ، ބޭނުން ނުކުރެވޭނެ. މިހެން ނަގާ ޓެކްސް ހަމަ އެއްކޮށް ބޭނުންކުރަން ޖެހޭނީ ތިމާވެށީގެ މައްސަލަތަކަށް" ވަހީދު ވިދާޅުވިއެވެ. 

އޭނާ ވިދާޅުވީ ސަރުކާރުން އެކި ނަންނަމުގައި ތަފާތު ޓެކްސްތައް ނަގަމުންދާކަމަށެވެ. އޭގެ ތެރޭގައި ޖީއެސްޓިއާއި، ޓުއަރިޒަމާއި ގުޅުންހުރި ޓެކްސްތަކާއި އާމްދަނީއިން ނަގާ ޓެކްސްފަދަ އެތައް ޓެކސްއެއް ނަގަމުންދާކަމަށެވެ. 

ސަރުކާރުން ހިންގާ އުމުރާނީ ތަރައްގީގެ މަޝްރުއުތަކަށް އެފަދަ ޓެކްސްތަކުން ޚަރަދުކުރެވިދާނެކަމަށް ވަހީދު ވިދާޅުވިއެވެ.  

"ކޮންމެ ރަށެއްގެ ކުނީގެ މައްސަލަ އޮތީ އިންތިހާއަށް. ވިއްސާރަވެއްޖެއްޔާ ބިންގަނޑު ކަނޑައިގެން ދިއުމާއި ފެންބޮޑުވުން ކަހަލަ މައްސަލަތައް މިދަނީ އިންތިހާއަށް. އުދައެރުމުގެ މައްސަލަ ދަނީ އިންތިހާއަށް. ގުދުރަތީ ކަންކަން ދިމާވަނީ ކުރިއާލާ އެނގުމަކާއި ލައިގެނެއް ނޫން. އެހެންކަމުން އެކަހަލަ ކަމެއް ހިނގާއިރު، އެކަމަށްޓަކައި ހޭދަކުރެވޭނެ ފަންޑެއް އޮތުން އެއީ ބޭނުންތެރިކަމެއް: ވަހީދު ވިދާޅުވެއްޖެއެވެ. 

ވަހީދު ވިދާޅުވީ ވަކި ނަމެއްގައި، ޓެކްސް ނެގުމަށްފަހު އެހެންކަންކަމަށް ހޭދަކުރުމަކީ އޭނާ ގަބޫލުކުރައްވާގޮތުގައި ރައްޔިތުންނަށް އޮޅުވާލުންކަމަށެވެ. 

އެހެންނަމަވެސް ވަކި ޚާއްސަ މަގްސަދެއްގައި ރައްޔިތުންގެ އަތުން ޓެކުހެއް ނަގާނަމަ، އެނޫން އެއްވެސް ބޭނުމަކަށް އެއިން ހޭދަކޮށްގެން ނުވާނެކަން ތަކުރާރުކޮށް ވަހީދު ފާހަގަކުރެއްވިއެވެ. އަދި ވިދާޅުވީ އެއީ ދުނިޔޭގެ ތަހުޒީބު ގައުމުތަކުންވެސް އަަމަލުކުރަމުން އަންނަ ގޮތްކަމަށެވެ.