މޯލްޑިވްސް ޕޯޓްސް ލިމިޓެޑް(އެމްޕީއެލް) ފްލެޓުތަކުގެ މައްސަލަތާއި ގުޅޭ ގިނަ ޝަކުވާތަކެއް އެ ކުންފުނީގެ މުވައްޒަފުން ރައްޔިތުންގެ މަޖިލީހުގެ ޕެޓިޝަން ކޮމެޓީއާއި ހިއްސާކޮށްފިއެވެ. 

ފްލްޓުތަކުގެ ޝަކުވާތައް ކޮމެޓީއާއި ހިއްސާކުރި މުވައްޒަފަކު ކިޔައިދިން ގޮތުގައި 2020 ވަނަ އަހަރު ދެވަނަ ފަހަރަށް އިއުލާނުކުރެވުނު ފްލެޓްގެ ޑައުންޕޭމެންޓް ކަންތަކާއި ގުޅިގެން މުވައްޒަފުންގެ ކަންބޮޑުވުންތަކެއް ހުރިކަމަށް ވަނީ ބުނެފައެވެ. އަދި މަޖިލީހަށް ޕެޓިޝަނެއް ހުށައެޅީވެސް އެ މައްސަލައިގައި ހުރި ކަންބޮޑުވުންތަކުގެ ސަބަބުންކަން އޭނާ ފާހަގަކޮށްފައިވެއެވެ. 

އޭނާ ބުނީ އެމްޕީއެލްގެ ފްލެޓް ލިބުނު 534 މުވައްޒަފުންގެ ތެރެއިން ގިނަ މުވައްޒަފުންނަކީ މިވަގުތު ފެލްޓަށް ކަނޑައަޅާފައިވާ ޑައުންޕޭޕެންޓް ދެއްކޭ ހާލަތުގައި ތިބި މުވައްޒަފުން ނޫންކަމަށާއި އެ ދަދަކީ އެ މުވައްޒަފުންގެ މުސާރައާ ނުބައްދަލު އަދަދެއް ކަމަށެވެ.

އެ ފަރާތުން ކޮމެޓީއަށް ކިޔައިދިން ގޮތުގައި މުވައްޒަފުންވަނީ އެ ކަންބޮޑުވުންތަކާއެކު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާއިވެސް ބައްދަލުކޮށްފައެވެ. 

އޭގެ އިތުރުން އޭނާ ވިދާޅުވީ އެދުވަހުގެ ބައްދަލުވުމުގައި ފްލެޓު ލިބުނު އެއްވެސް މުވައްޒަފެއްގެ ވަޒީފާ ނުގެއްލޭނެކަމަށް ރައީސް ސޯލިހު ވިދާޅުވިނަމަވެސް ފްލެޓާއި ގުޅިގެން މިހާރު އުސޫލު އޮތް ގޮތުން އެގްރިމަންޓުގައި ސޮއިކުރާތާ ތިންމަސް ދުވަހުގެ ތެރޭގައި ޕޭމަންޓު ނުދައްކައިފިނަމަ އެގްރިމަންޓު ބާތިލުވާގޮތަށް އޮތުމަކީ ފްލެޓު ގެއްލިގެން ދިއުމަށް މަގުފަހުވާނެކަމެއްކަން ކޮމެޓީއާއި ބައްދަލުކުރި މުވައްޒަފުން ވަނީ ފާހަގަކޮށްފައެވެ. އަދި ސްޓާފުންގެ ހުރި ބޮޑުކަންބޮޑުވުމެއްކަމަށް ބުނެފައިވެއެވެ. 

ކޮމެޓީގައި ވާހަކަ ދައްކަމުން އިތުރު މުވައްޒަފަކު ބުނެފައިވަނީ ތަން ނިންމާ މުވައްޒަފަށް ތަޅުދަނޑި ހަވާލުކުރުމަށްފަހުވެސް އެތަނަށް ވަނުމަށް މުއްދަތެއް ދޭން ޖެހޭނެކަމަށް ގަބޫލުކުރާ ކަމަށާއި އެތަނަށް ވަނުމަށް ކުރަން ޖެހޭ މަރާމާތަށްވެސް ބޮޑު ހޭދައެއް ކުރަން ޖެހޭނެކަމަށެވެ.

އެހެންކަމުން ފްލެޓަށް ވަނުމަށް މަދުވެގެން ހަމަސް ދުވަހުގެ ގްރާސް ޕީރިއެޑެއް ކަނޑައެޅުން މުހިންމުކަން އެ ފަރާތުން ވަނީ ފާހަގަކޮށްފައެވެ. 

އޭގެއިތުރުން ފްލެޓާއި ބެހޭ މައުލޫމާތު ކުންފުނިން އެންމެ ރަނގަޅު ގޮތެއްގައި ފޯރުކޮށްދީފައި ނެތުމުގެ ޝަކުވާވެސް މުވައްޒަފުންވަނީ ކޮމެޓީއާއި ހިއްސާކޮށްފައެވެ. 

އެމްޕީއެލްގެ ފްލެޓުތަކީވެސް ހިޔާ މަޝްރުއުގެ ދަށުން އަޅާ ފްލެޓުތަކެކެވެ. އެގޮތުން އެމްޕީއެލްއިން ހުޅުމާލޭގެ ދެވަނަ ފިޔަވަހީގައި 15 ބުރީގެ ތިން އިމާރާތް އަޅާގޮތަށް ވަނީ ހަވާލުކޮށްފައެވެ. އެއީ ދެ ކޮޓަރީގެ 204 ފްލެޓެވެ. 

ހިޔާ ޕްރޮޖެކްޓުގެ ދަށުން މޯލްޑިވްސް ޕޯޓްސް ލިމިޓެޑް (އެމްޕީއެލް)އިން އިމާރާތް ކުރާ ފްލެޓުތައް ލިބޭ އެ ކުންފުނީގެ މުވައްޒަފުންގެ ދާއިމީ ލިސްޓު ވަނީ އާންމުކޮށްފައެވެ.