ރައީސުލްޖުމްހޫރިއްޔާ އިބުރާހިމް މުހައްމަދު ޞާލިހުއަށާއި، މި ސަރުކާރަށް ސަނާކިޔުމުގައި މިނިސްޓަރުން ކުފުރުވާ ހިސާބަށް ކަންކަން ގޮސްފިކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެއެވެ.
ޝިޔާމް މިފަދައިން ވިދާޅުވީ ސަރުކާރުގެ ފަރާތުން، ކުޅުދުއްފުށި ދެކުނު ދާއިރާގެ މެންބަރު ޖަމްޝީދު މުޙައްމަދު ހުށަހަޅުއްވާފައިވާ، ޤާނޫނު ނަންބަރު 2008/2( ވަޒީފާއާ ބެހޭ ޤާނޫނު) އަށް އިޞްލާޙު ގެނައުމުގެ ބިލަށް މަޖިލީހުގައި ބަހުސްކުރައްވަމުންނެވެ.
ޝިޔާމުގެ ވާހަކަފުޅު ފައްޓަވަމުން ވިދާޅުވީ މިހާރު ފެންނަމުންދާ މަންޒަރަކީ ރައީސުލް ޖުމްހޫރިއްޔާއަށް ހަގީގަތް އޮޅޭ މިންވަރަށް ސަރުކާރަށް ސަނާކިޔަމުންދާ މަންޒަރުކަމަށެވެ.
ރައްޔިތުންނަށް ކިތަންމެ ބޮޑު ގެއްލުމެއް ލިބޭގޮތަށް ސަރުކާރުން ބިލުތައް ފަރުމާކުރަމުން ދިޔަ ނަމަވެސް، މަޖިލީހުގެ ބައެއް މެމްބަރުންވެސް ސަރުކާރަށް ސަނާކިޔާ ސަރުކާރު ދިފާއުކުރަމުންދާ މަންޒަރު ފެންނަމުންދާކަމަށް ޝިޔާމު ވިދާޅުވިއެވެ.
އެވާހަަކަތަކާއި ގުޅުވާ ޝިޔާމު ވިދާޅުވީ، ސަރުކާރާއި ރައީސް ސޯލިހުއަށް ސަނާކިޔުމުގައި މިނިސްޓަރުން ކުފުރުވާ ހިސާބަށް ކަންކަން ގޮސްފައިވާކަމަށެވެ. ޝިޔާމުގެ ވާހަކައިގައި އިޝާރާތްކުރެއްވީ ހޯމް މިނިސްޓަރު އިމްރާނުއަށެވެ.
"ކުރިން ރޭ އޮތް ޖަލްސާއެއްގައި، މިއަދުގެ ހޯމް މިނިސްޓަރު ގުރުއާނުގެ އާޔަތްވެސް ނުބައިކޮށް ވިދާޅުވިކަމަށް އަޅުގަނޑަށް ނޫސްތަކުން މި ފެންނަނީ. ކުފުރުވާ ހިސާބަށް ސަރުކާރުގެ ވަޒީރުން ސަރުކާރަށް ސަނާކިޔުމުގައި، ރައީސުލްޖުމްހޫރިއްޔާއަށް ސަނާކިޔުމުގައި ކުފުރާ ހިސާބަށް ގޮސްފިކަމަށް އަޅުގަނޑުމެންނަށް މި ފެންނަނީ" ޝިޔާމު ވިދާޅުވިއެވެ.
ޝިޔާމު މިފަދައން ވިދާޅުވީ ލ. އަތޮޅުގައި ކުރިއަށްދާ ވިޔަވަތި ކޮންފަރެންސްގއި ވާހަކަދައްކަވަމުން ހޯމް މިނިސްޓަރު އިމްރާނު މި ސަރުކާރަށް ތައުރީފުކުރައްވާ، މި ވެރިކަމަކީ ކީތިރި ނަބިއްޔާ މުހައްމަދު (ޞޢވ) ކުރެއްވި ފަދަ ވެރިކަމެއް ކަމަށާއި، ރައީސް ސޯލިހުއަކީ ދުއާދެއްވިގެންދާ ފަދަ ވެރިއެއްކަމަށް ސިފަކުރައްވާ ވާހަކަދެއްކެވުމާއި ގުޅިގެންނެވެ.
ޝިޔާމު ވިދާޅުވީ ވަޒީފާއާއި ބެހޭ ގާނޫނަށް ގެނައުމަށް ހުށައެޅި ބިލުގައި ދިވެހިންނާއި ބިދޭސީ މަސައްކަތްތެރިން ތަފާތުކޮށްފައިވާކަން ފާހަގަކުރައްވާ ޝިޔާމު ވަނީ ކަންބޮޑުވުން ފާޅުކޮށްފައެވެ.
އެފަދަ ތަފާތުކުރުންތައް އޮތުމުގެ ސަބަބުން، ފަތުރުވެރިކަމުގެ ސިނާއަތުގައި މަސައްކަތްކުރާ ޒުވާނުންނަށް ވަރަށް ބޮޑު ނިކަމެތިކަމެއް ލިބިގެންދާނެކަމަށް އޭނާ ވިދާޅުވިއެވެ.
އެގޮތުން، ކުޑަ އުޖޫރައިގައި ބިދޭސީން ގެނެސް މަސައްކަތްކުރުވުމުގެ ފުރުސަތު މި ގާނޫނާއެކު ލިބިގެންދާނެކަމަށާއި، އެކަމުގެ ސަބަބުން ދިވެހިންނަށް އޮތް ފުރުސަތުތައް އެތައް ގުނައެއް ހަނިވެގެންދާނެކަން ޝިޔާމުގެ ވާހަކައިގައިވަނީ ފާހަގަކުރައްވާފައެވެ. އަދި މި ހަގީގަތަކީ ސަރުކާރަށް ސަނާ ކިޔުމުގެ ބަދަލުގައި ހާމަކުރަންޖެހޭ ހަގީގަތެއްކަމަށް ޝިޔާމު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
