ސަރުކާރުން ސްޕޮންސަރކޮށްގެން ވަޒީފާއާއި ބެހޭ ގާނޫނަށް އިސްލާހު ހުށައެޅުމުގެ މަގްސަދަކީ ކުރިއަށް އޮތް ރިޔާސީ އިންތިޚާބަށް ތައްޔާރުވުމުގެ ގޮތުން މުއްސަދިންގެ ޖީބުތަކުން ފައިސާ ހޯދުންކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސެއިން މުހައްމަދު ލަތީފު ވިދާޅުވެއްޖެއެވެ. 

ވަޒީފާއާއި ބެހޭ ގާނޫނަށް ސަރުކާރުގެ ފަރާތުން ހުށައަޅާފައިވާ އިސްލާހަށް ބަހުސްކުރައްވަމުން މެމްބަރު ހުސެއިން ވިދާޅުވީ، ސަރުކާރުން ހުށައަޅާ ބިލުތަކުގެ ހަގީގީ މަގްސަާއި މެދު މިހާރު ސުވާލުއުފެދޭކަމަށެވެ. އެގޮތުން ފެންނަމުންދާ މަންޒަރަކީ ބިލު ފާސްކުރުމަށްފަހު، އެ ބިލަށް އިތުރު އިސްލާހުތައް ހުށައަޅައިގެން ރައްޔިތުންނަށް ތަކުލީފަކަށްވާގޮތަށް ބިލުތައް ބަދަލުކުރަމުންދާ މަންޒަރުކަމަށް އޭނާ ވިދާޅުވިއެވެ. 

މިއަދު މަޖިލީހުގައި ބަހުސްކުރެވޭ ވަޒީފާއާއި ބެހޭ ގާނޫނަށް ހުށައަޅާފައިވާ އިސްލާހަކީވެސް ރައްޔިތުންނަށް ގެއްލުން ހުރި އިސްލާހެއްގެ ގޮތުގައި އޭނާ ފާހަގަކުރެއްވިއެވެ. 

Advertisement

ބިލާއި މެދުގައި ކަންބޮޑުވުން ފާޅުކުރައްވާ މެމްބަރު ހުސެއިން ވިދާޅުވީ، އެ ބިލުގެ ސަބަބުން، ރާއްޖޭގެ މަސައްކަތްތެރިންނަށް ލިބޭނެ ފައިދާއެއް ނެތްކަމަށެވެ. އޭގެ އިތުުރުން އެއީ ރާއްޖެއަންނަ މަސައްކަތްތެރިންގެ ހައްގުތަކަށްވެސް އުނިކަން ލިބޭގޮތަށް ފަރުމާކޮށްފައިވާ ތަފާތުކުރުން ބޮޑު ބިލެއްކަމަށެވެ. 

ބިލު ފަރުމާކޮށްފައިވާ ގޮތަށް ބަލާއިރު، ބިލުގެ ހަގީގީ މަގްސަދަކީ ސަރުކާރަށް ވާގިވެރިވާ ވިޔަފާރިވެރިންގެ ޖީބުތަކަށް ލުއިކޮށްދިނުންކަމަށް އޭނާ ވިދާޅުވިއެވެ. އަދި ބަދަލުގައި ސަރުކާރުން އަމާޒުހިފާފައި ހުރީ 2023 ވަނަ އަހަރުގެ ރިޔާސީ އިންތިޚާބު އަންނަން ވާއިރަށް މުއްސަދިންގެ ޖީބުތަކުން ފައިސާ ހޯދުމަށްކަމަށް އޭނާ ވިދާޅުވިއެވެ. 

މެމްބަރު ހުސެއިން އިތުރަށް ވިދާޅުވީ މި އިސްލާހާއެކު، ދިވެހިންނަށް ލިބެން ހުންނަ ވަޒީފާތަކަށް ކުޑަ އުޖޫރައިގައި ބިދޭސީން ގެނައުމުގެ ދޮރު ހުޅުވިގެންދާނެކަމަށެވެ. އޭގެ ސަބަބުން ދިވެހި މަސައްކަތްތެރިންނަށް ވަރަށް ބޮޑެތި ގެއްލުންތަކެއް ލިބިގެންދާނެކަންވެސް އޭނާ ފާހަގަކުރެއްވިއެވެ. 

މެމްބަރު ހުސެއިންވަނީ އެ ބިލު މިހާރު އޮތް ގޮތަށް ފާސް ނުކުރުމަށްވެސް ގޮވާލާފައެވެ.