ވައްކަމާއި މާރާ މާރީތައް ގިނަވެ އައްޑޫ ސިޓީގެ ރަށްތަކުގެ އަމަން ނުބެލެއްޓޭކަމުގެ ގިނަ ޝަކުވާތަކެއް ލިބިވަޑައިގެންފައިވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިފަދައިން ވިދާޅުވެފައިވަނީ މިއަދު މަޖިލީހަށް ހުށައެޅުނު ކުއްލި މައްސަލައާއި ގުޅޭގޮތުން އެއްޗެއް ވިދާޅުވުމަށް ފުރުސަތެއް ހޯއްދަވާ ދެއްކެވި ވާހަގައިގައެވެ.
ނަޝީދު ވަނީ ނިމިދިޔަ ހަފްތާގައި އައްޑޫއަށް ވަޑައިގަންނަވާފައެވެ. އަދި އައްޑުގެ ރަށްތަކަށް ޒިޔާރަތްކުރައްވާ ރައްޔިތުންނާއި ބައްދަލުކުރައްވާ އެކި ކަންކަމާއި ގުޅޭގޮތުން މަޝްވަރާ ކުރައްވާފައެވެ.
އެ މަޝްވަރާތަކުގެ އަލީގައި ވާހަކަދައްކަވަމުން ނަޝީދު ވިދާޅުވީ އައްޑޫގެ އަމަން ގެއްލި ވައްކަމާއި މާރާމާރީ ގިނަވެ ރަށުތެރެ ނުބެލެހެއްޓިދާކަން އެއީ އެ ސިޓީގެ ރައްޔިތުން ފާހަގަކުރައްވާކަމަށެވެ. އަދި އެއީ ރައްޔިތުންގެ އޮތް ވަރަށް ބޮޑު ކަންބޮޑުވުމެއްކަމަށް ނަޝީދު ވިދާޅުވިއެވެ.
"މި ދިޔަ ހަފްތާ އަޅުގަނޑު އައްޑޫ ސިޓީގެ ގިނަ ރަށްރަަށަށް ދިޔައިމު. އަދި އަޅުގަނޑާ އެ ތަނު ބައެއް މީހުންނާއި ބައްދަލުވި، ވަރަށް ގިނަ ބައެއްގެ ކަންބޮޑުވުމެއް އެއީ އަމަން ގެއްލި ވައްކަމާއި މާރާމާރީ ގިނަވެ ރަށުތެރެ ނުބެެހެއްޓި ދާކަން"
މަޖިލީހުގެ ރައީސް މުހައްމަދު ނަޝީދު
ނަޝީދު ވިދާޅުވީ ރަށްތަކުގެ އަމާންކަން ނުބެހެއްޓޭ މައްސަލައަކީ ކަންބޮޑުވާ މައްސަލައެއްގެ ގޮތަށް މަޖިލީހުގެ މެމްބަރުންވެސް ފާހަގަކުރައްވަމުން ދާކަމަށެވެ. އަދި ބަހުސުގެ ތެރެއިން އެ މައްސަލައަށް ހައްލު ހޯދޭނެ ގޮތްތަކެއް ހޯދުމަށްވެސް ވަނީ އެދިވަޑައިގަންނަވާފައެވެ.
Advertisement
This content is created and paid for by advertisers and does not involve Voice Journalists
