ދައުލަތުގެ ޚަރަދަށް ޒިންމާވާ ގާނޫނުގެ ބޭނުން ސަރުކާރުން ކަނޑުވާލައިފިކަމަށް ރައްޔިތުންގެ މަޖިލީހުގެ މާވަށު ދާއިރާގެ މެމްބަރު އަދި ކުރީގެ އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ. 

ސައީދު މިފަދައިން ވިދާޅުވެފައިވަނީ ދައުލަތުގެ ޚަރަދަށް ޒިންމާވުމުގެ ގާނޫނުގެ 32 ވަނަ މާއްދާގެ (ހ)، (ރ) އަދި (ބ) ސަސްޕެންޑުކޮށްފައި އޮތް އޮތުން ނިނުމަކަށް ގެނައުމަށް ގޮވާލާ ސައީދު ހުށައެޅުއްވި ގަރާރު މަޖިލީހުން ބޭރުކޮށްލުމާއި ގުޅިގެން ކުރެއްވި ޓްވީޓެއްގައެވެ. 

ސައީދު ހުށައަޅުއްވާފައިވާ ގަރާރުގައި ވަނީ އެމްއެމްއޭއިން ދަރަނި ނެގުމަށް އެންމެ ފަހުން މަޖިލީހުން ހުއްދަ ދިން މުއްދަތު ހަމަވާނީ 31 ޑިސެމްބަރު 2023 އަށް ކަމުގައިވީ ނަމަވެސް، އެ މުއްދަތު ނިމުމަކަށް ގެނައުމަށް ސަރުކާރަށް ގޮވާލައިފައެވެ. 

2022 ވަނަ އަހަރު ރާއްޖޭގެ ޖީޕީޑީ 13 އިންސައްތަ ކުރިއަރާނެ ކަމަށާއި، 2023 ވަނަ އަހަރު 9.7 އިންސައްތަ ކުރިއަރާނެ ކަމަށް އިގްތިސާދީ ވަޒީރު ވިދާޅުވެފައި ވާތީއާއި، ރާއްޖޭގެ އިގްތިސާދު ކުރިއަށް ދަނީ ރަނގަޅަށް ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެފައިވާތީ މިހާލަތުގައި އެމާއްދާތައް ސަސްޕެންޑްކޮށްފައި އޮތުމުގެ ބޭނުމެއް ފެންނަން ނެތްކަމަށް އެ ގަރާރުގައި ބަޔާންކޮށްފައިވެއެވެ. 

އޭގެއިތުރުން އެ މާއްދާ ހިފަހައްޓާފައި އޮތުމުގެ ސަބަބުން ފިނޭންސް މިނިސްޓްރީން ކުރަމުންދާ ކަންކަން މޮނިޓަރ ކުރުމުގެ ފުރުސަތު ތިންވަނަ ފަރާތަކަށް ނުލިބުމާއި، މިކަމުގެ ސަބަބުން ކޮރަޕްޝަނަށް މަގުފަހިވެ، ސަރުކާރުން ބޭނުންވާހާ ގޮތަކަށް ރައްޔިތުންގެ ބަހެއްނެތި ހިތުހުރި ގޮތަކަށް ލޯނު ނެގުމާއި އަދި ދަރަނި ދެއްކުމަށް ލޯނު ނެގުންފަދަ އިގްތިސާދަށް އޭގެ ނުރައްކާ ކުރިމަތިވާފަދަ ކަންކަން ކުރުމުގެ ފުރުސަތު ބޮޑުވެގެން ދާނެ ކަމަށާއި، އެކަމުގެ ސަބަބުން ދިވެހި ގައުމަށާއި، ރައްޔިތުންނަށް އިއާދަނުކުރެވޭ ވަރުގެ ގެއްލުން ލިބިދާނެ ކަމަށްވެސް ބަޔާންކޮށްފައި ވެއެވެ.

އެ ކަންކަން ފާހަގަކޮށް ސައީދު ހުށައެޅި ގަރާރު މަޖިލީހުން ބަލައިގެންފައެއް ނުވެއެވެ. އެ ގަރާރު ބަލައިގަތުމަށް ވޯޓު ދީފައިވަނީ އެންމެ 6 މެމްބަރުންނެވެ. އެއާއެކު އެ ގަރާރު ވަނީ މަޖިލީހުން ބޭރުކޮށްލައިފައެވެ. 

އެ ގަރާރު ބޭރުކޮށްލުމާއި ގުޅިގެން ކަންބޮޑުވުން ފާޅުކުރައްވާ ސައީދު އިތުރަށް ވިދާޅުވީ މި ކަމުން ދޭހަވަނީ ބޭނުން ވަރަކަށް ފައިސާ ޗާޕުކޮށްގެން ދަރަނި އިތުރުކުރުމަށް އެއްވެސް ހުރަހެއް ނެތްކަން ކަމަށެވެ. 

ގާނޫނުގެ 32 ވަނަ މާއްދާގެ (ހ)ގައި ބުނަނީ، ސަރުކާރުން ދަރަންޏަށް މަރުކަޒީ ބޭންކުން ފައިސާ ނެގޭނީ 91 ދުވަހުގެ ތެރޭގައި އަނބުރާ ދައްކާ ގޮތަށް ކަމަށެވެ. އެގޮތަށް ނެގޭނީ މާކެޓް އިންޓަރެސްޓް ރޭޓަށްވުރެ ދަށް ނުވާ ރޭޓެއްގައި އެޑްވާންސްގެ ގޮތުގައި ކަމަށްވެސް ބުނެފައިވެއެވެ. އެމްއެމްއޭއިން ދަރަންޏަށް ފައިސާ ނެގޭނެ މިންވަރެއްވެސް އެ މާއްދާގައި ބުނެފައިވެއެވެ.

އެހެން ނަމަވެސް ފައިސާ ޗާޕުކުރުމުގެ މުއްދަތު އިތުރުކޮށްފައިވާއިރު، މީގެ ކުރިން ޗާޕުކުރި ފައިސާ ޚަރަދުކުރި ގޮތުގެ ރިޕޯޓެއްވެސް މަޖިލީހާއި ހިއްސާކޮށްފައި ނުވާކަން ފާހަގަކޮށްލެވެއެވެ. އަދި ފައިސާ ޗާޕުކުރުމާމެދު އެމްއެމްއޭގެ ގަވަރުނަރުވެސް ވަނީ ކަންބޮޑުވުން ފާލުކުރައްވާފައެވެ.