ސުކޫލުތަކުން ކިޔަވާ ނިންމާ ދަރިވަރުން ވަޒީފާތަކަށް ނިކުތުމުގެ ކުރިން ފުލުހުންގެ ތަމްރީނު އެ ކުދިން ލައްވާ ހެދުވުމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު ހަސަން މުހައްމަދު(ހަސަންޓޭ) ގޮވާލައްވައިފިއެވެ. 

ރައްޔިތުންގެ މަޖިލީހުގެ ތިން ވަނަ ދައުރުގެ 15 ވަނަ ޖަލްސާއަށް މަޖިލީހުގެ ކާށިދޫ ދާއިރާގެ މެމްބަރު ހުށައެޅުއްވި ކުއްލި މައްސަލައަށް ވާހަކަދައްކަވަމުން ހަސަންޓޭ ވިދާޅުވީ އެއްވެސް ބަޔަކު ފުލުހުންނަށް އަނިޔާކުރުމަކީ ބަލައިގަނެވޭނެ ކަމެއް ނޫންކަމަށެވެ. ހަމައެއާއެކު ފުލުހުންވެސް ރައްޔިތުންނަަށް އަނިޔާވެރިވެގެން ނުވާނެ ކަމަށާއި، ރާއްޖެ ފަދަ ޖަޒީރާ ގައުމެއްގައި ދިރިއުޅޭ މަދު މީސްކޮޅަށް އަމާންކަމާއެކު މި ގައުމުގައި އުޅެވޭނެ މަގެއް ހޯދަން ޖެހޭކަމަށެވެ. 

އެގޮތުން ކިޔަވާ ނިންމާ ވަޒީފާގެ ބާޒާރަށް ދަރިވަރުން ނިކުތުމުގެ ކުރިން ފުލުހުންގެ ތަމްރީނު އެކުދިންލައްވާ ހަދުވުން މިހާރު މުހިންމުކަމަށް ހަސައްޓޭ ވިދާޅުވިއެވެ. އަދި އެފަދަ ތަމްރީނެއް ދެވިއްޖެނަމަ ދަރިވަރުންގެ އަޚުލާގު ރަނގަޅުވެ ކުދިން ހޭލުންތެރިވާނެކަން އޭނާ ފާހަގަކުރެއްވިއެވެ. 

Advertisement

ހަސަންޓޭ ވިދާޅުވީ މިހާރު މި ތިބެވެނީ މުޅި ޒުވާން ޖީލު ދާނެ ދިމާލަކަށް ދާން ދޫކޮށްލައިގެންކަމަށެވެ. އަދި ދަރިން ދަނީ ކޮން ތާކަށްތޯ މައިންބަފައިންނަށްވެސް ރަނގަޅަށް ނުބެލޭކަން އޭނާ ފާހަގަކުރެއްވިއެވެ. 

އެކަންކަން ފާހަގަކުރައްވަމުން ހަސަންޓޭ ވަނީ ހެދިފައިވާ ގާނޫނުތައް ތަންފީޒުކުރެވެމުން ނުދާކަންވެސް ފާހަގަކުރައްވާފައެވެ. އަދި ގާނޫނު ތަންފީޒުކުރުމުގައި ސަރުކާރުގެ މުއައްސަސާތަކުން އިހުމާލުވާކަމަށާއި، އެކަމުގެ ސަބަބުން ކުށުގެ ވެށި ބޮޑުވެ ފުޅާވަމުން ދާކަމަށް ހަސަންޓޭ ވިދާޅުވިއެވެ. 

އެއާއެކު އޭނާ ވަނީ ޒުވާން ޖީލަކީ ހަރުދަނާ އަޚުލާގެއްގެ މަތީގައި ތިބި ބަޔަކަށް ހެދުމަށް ހުރިހާ ސިޔާސީ ޕާޓީތަކުންނާއި، ދައުލަތުގެ އެކި މުއައްސަސާތަކުން ގުޅިގެން މަސައްކަތްކުރުމަށްވެސް ގޮވާލައްވާފައެވެ. އަދި އެ މަގުން މަސައްކަތް ކުރެވިގެން ނޫނީ، އަމާން ރައްކާތެރި ވެއްޓެއް ގާއިމު ނުކުރެވޭނެކަމަށް ހަސަންޓޭގެ ވާހަކައިގައި ވަނީ ވިދާޅުވެފައެވެ.