ދައުރު ހަމަވެފައިވާ ގައުމީ ފަތުވާ މަޖިލިސް އަލުން އަނބުރާ އެކުލަވާލުމަށް ސަރުކާރަށް ގޮވާލާ ރައްޔިތުންގެ މަޖިލީހަށް ގަރާރެއް ހުށައަޅުއްވާއިފިއެވެ. 

މަޖިލީހަށް އެ ގަރާރު ހުށައަޅުއްވާފައިވަނީ ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރެވެ. 

ގައުމީ ފަތުވާ މަޖިލީހަކީ ކުރީގެ ރައީސް ޔާމީން އަބްދުލްގައްޔޫމްގެ ޒައާމަތުގައި ގާނޫނަކުން ބާރުވެރިކަން ހޯދައިގެން އުފައްދާފައިވާ އުފައްދާފައިވާ މަޖިލީހެކެވެ. 

Advertisement

އެހެން ނަަމަވެސް ގައުމީ ފަތުވާ މަޖިލީހުގެ ދައުރުހަމަވެގެން ދިޔައިރުވެސް، އެ މަޖިލީހަށް މެމްބަރުން އައްޔަންކޮށްފައެއް ނުވެއެވެ. 

އާދަމް ޝަރީފު ހުށައެޅުއްވި ގަރާރުގައި ވަނީ އެކަން ފާހަގަކުރައްވާފައެވެ. 

އެގޮތުން އޭނާ ވިދާޅުވީ ދިވެހިރާއްޖޭގައި ދީނީ ޚިލާފުތަކާއި ހަރުކަށި ފިކުރު އިތުރުވެ ދީނީ ގޮތުން ޚިލާފު އިފެދޭ މައްސަލަތަކުގައި އަމަލުކުރަންވީ ގޮތް އޮޅި އެކި މީހުން އެކި ފަތުވާ ނެރުމުގެ ސަބަބުން ދިވެހިންގެ މެދުގައި ބައިބައިވުން އުފެދި ޖިނާއީ މައްސަލަތައް އުފެދި ޖިނާއީ ކުށްތަކަށް އަރައިގަނެ މީހުންގެ ލޭ ހުއްދަކޮށް ނިރުބަވެރި އަމަލުތައް ހިންގާ ރާއްޖޭގެ ގައުމީ ސަލާމަތަށް ނުރައްކާވާ ފަދަ ކަންކަން ހިނގަމުން ދާއިރުވެސް އެކަންކަން ހައްލުކޮށް ދީނީ އެއްބައިވަންތަކަން ގާއިމުކުރާނެ ގައުމީ ފަތުވާ މަޖިލީހެއް ނެތްކަމަށެވެ. 

އެހެންކަމުން ދީނީ އެއްބައިވަންތަކަށް ގާއިމުކޮށް، ދީނީ ކަންކަމާއި ގުޅިގެން ސަރުކާރާއި ރައްޔިތުންނަށް ފަތުވާ ދެއްވާނެ، ނުވަތަ ފަހުބަސް އިއްވާނެ ގައުމީ ފަތުވާ މަޖިލީހަށް މެމްބަރުން އައްޔަންކޮށް އެ މަޖިލީހުގެ މަސައްކަތް ވީ އެންމެ އަވަހަށް ފެށޭނެ އިންތިޒާމުތައް ހަމަޖައްސާދިނުމަށް އާދަމް ޝަރީފުގެ ގަރާރުގައި ވަނީ ގޮވާލައްވާފައެވެ. 

އާދަމް ޝަރީފު ހުށަހެޅުއްވި ގަރާރު މަޖިލީހުން ވަނީ ބަލައިގެންފައެވެ. އެގޮތުން އެ ގަރާރު ބަލައިގެންފައިވަނީ ގަރާރަށް ވޯޓުދެއްވި 38 މެމްބަރުންގެ ތެރެއިން 28 މެމްބަރުންގެ ވޯޓާއެކުގައެވެ. 

އެ ގަރާރަށް މަޖިލީހުގައި މެމްބަރުން ވާހަކަދައްކަވާ، ގިނަ ހުށައެޅުންތަކެއް ހުށައަޅުއްވަމުންދާކަން ފާހަގަކޮށްލެވެއެވެ. އަދި ދީނީ އެއްބައިވަންތަކަން ގާއިމުކުރުމަށް، ދީނީ ގޮތުން ޚިޔާލު ތަފާތުވުންތައް އުފެދިގެންދާއިރު ފަހުބަސް ވިދާޅުވާނެ ބަޔަކު ތިބުން މުހިންމުކަންވެސް މެމްބަރުން ގެންދަވަނީ ފާހަގަކުރައްވަމުންނެވެ.