ދީނީ ކަންކަމަށް އެންމެ ބޮޑު ސަމާލުކަމެއް ދެވިފައި އޮތީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ވެރިކަންތަކުގައިކަމަށް މަޖިލީހުގެ އިހަވަންދޫ ދާއިރާގެ މެމްބަރު މުހައްމަދު ޝިފާޢު ވިދާޅުވެއްޖެއެވެ. 

ޝިފާއު މިފަދައިން ވިދާޅުވެފައިވަނީ ނިމިދިޔަ ސަރުކާރުން އެކުލަވާފައިވާ ގައުމީ ފަތުވާ މަޖިލީހުގެ ދައުރު ހަމަވެގެން ދިޔަތާ އެތައް ދުވަހެއް ފާއިތުވެގެން ދިޔައިރުވެސް މި ސަރުކާރުން އެ މަޖިލިސް އެކުލަވާލާފައި ނުވާކަން ފާހަގަކުރައްވާ މަޖިލީހުގެ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރު ހުށައެޅުއްވި ގަރާރަށް ވާހަކަދައްކަވަމުންނެވެ. 

އޭނާ ވިދާޅުވީ އިސްލާމްދީން ކުރިއެރުވުމަށްޓަކައި، އަދި ދީނީ ހޭލުންތެރިކަން އިތުރުކުރުމަށް އެކި ސަރުކާރުތަކުން އެކި ވަރަށް މަސައްކަތްކޮށްފައިވާކަން ފާހަގަކުރެވޭކަމަށެވެ. އެހެން ނަމަވެސް ހުރިހާ ވެރިކަންތަކުން ކޮށްފައިވާ މަސައްކަތަށް ބަލާއިރު، އެންމެ ބޮޑަށް އިސްލާމްދީން ކުރިއަރުވާ ދީނީ ކަންކަމަށް އެންމެ ބޮޑު ސަމާލުކަމެއް ދީފައިވަނީ އެމްޑީޕީގެ ވެރިކަންތަކުގައިކަމަށެވެ. 

Advertisement

ޝިފާއުގެ ވާހަކައިގައިވަނީ އެމްޑީޕީއިން ދީނީ ވަހުދަތު ކުރިއެރުމަށް ކުރި މުހިންމު މަސައްކަތްތަކަށްވެސް އަލިއަޅުވާލައްވާފައެވެ. 

އޭގެ ތެރޭގައި ފުރަތަމަ ފަހަރަށް އިސްލާމިކް މިނިސްޓްރީގެ ނަމުގައި މިނިސްޓްރީއެއް އުފައްދާވައިވަނީވެސް އެމްޑީޕީގެ ފުރަތަމަ ވެރިކަމުގައިކަމަށް ޝިފާއު ވިދާޅުވިއެވެ. އެއާއެކު އިސްލާމީ ފިގުހު އެކަޑަމީއެއް ގާއިމުކުރުމުގެ މަސައްކަތަކީވެސް ކުރެވުނު ކާމިޔާބު މަސައްކަތެއްގެ ގޮތުގައި އޭނާ ފާހަގަކުރެއްވިއެވެ. 

ޝިފާއު މިފަދައިން ފާހަގަކުރެއްވި ނަމަވެސް، އެމްޑީޕީއާއި ސިޔާސީ ގޮތުން ވާދަވެރި ބޭފުޅުން، އަދި ސިޔާސީ ޕާޓީތައް އެމްޑީޕީ ސިފަކުރަމުންދަނީ ދީީނީ ކަންކަމަށް ފަރުވާކުޑަކުރާ ޕާޓީއެއްގެ ގޮތުގައެވެ. 

އިސްލާމްދީނުގައި ހަރާމް ކުރައްވާފައިވާ މަސްތުވާތަކެތި ބޭނުންކޮށް، އެ އާންމު އުސޫލަކުން ލިބެން ޖެހޭކަމަށް ހިތްވަރުދެއްވާ ރައީސުލް ޖުމްހޫރިއްޔާގެ މަގާމުގައި ހުންނަވާ އެމްޑީޕީގެ ރައީސް ދެއްކެވި ވާހަކަފުޅުތަކާއި، އެފަހުން އެމަނިކުފާނު ޑެންމާކަށް ވަޑައިގެން ރަސޫލާގެ ސުންނަތް ނޫން އެހެން އެއްޗެއް ހޯއްދަވަން ޖެހޭކަމަށް ވަކާލާތުކުރައްވާ ދެއްކެވި ވާހަކަތަކާއި ގުޅިގެން އެމްޑީޕީގެ ދީނީ ސިޔާސަތަކަށް ވާދަވެރިންގެ ފާޑުކިޔުންތައް ވަނީ އަމާޒުވެގެން ގޮސްފައެވެ. 

އެފަހުން އެމްޑީޕީގެ ދެވަނަ ވެރިކަން ފެށިގެން ދާއިރު، މި ވެރިކަމުގެ ކުރީކުޅުގައި 2019 ވަނަ އަހަރު މޯލްޑިވިއަން ޑިމޮކްރަސީ ނެޓްވޯޓު (އެމްޑީއެން) ނަމަކަށް ކިޔާ ޖަމުއިއްޔާއަކުން ނެރުނު އިސްލާމްދީނާއި ޚިލާފު ރިޕޯޓާއި ގުޅިގެންވެސް ސަރުކާރަށް ގިނަ ފާޑުކިޔުންތަކެއް ވަނީ އަމާޒުވެފައެވެ. 

އެ ރިޕޯޓުގައި ވަނީ ރާއްޖޭގައި ކީރިތި ރަސޫލާ ކުޑައިމީސްކޮށް ވާހަކަދައްކާފައެވެ. އަދި ރާއްޖޭގައި ކިޔަވައިދޭ އިސްލާމީ މުގައްރަރު ދަބަލުކުރުމަށް ގޮވާލާފައެވެ. 

އެ ރިޕޯޓާއި ދެކޮޅަށް ރާއްޖޭގެ 101 ކައުންސިލުން ބަޔާން ނެރެ، ރާއްޖޭގެ އެކި ކަންކޮޅުތަކުގައި މުޒާހަރާކޮށްފައިވާއިރު މިހާތަނަށް އެ ރިޕޯޓު އެކުލަާލުމުގައި ޝާމިލުވި ފަރާތްތަކަށް ފިޔަވަޅެއް އަޅާފައެއް ނުވެއެވެ. އަދި އޭރު އެމްޑީއެންގައި ތިއްބެވި ފަރާތްތައް ވަނީ މި ސަރުކާރުގެ މަގާމުތަކަށް ބަދަލުވެފައެވެ. ކަމިޝަރަ އޮފް ޕޮލިސް މުހައްމަދު ހަމީދަކީވެސް އެމްޑީއެންގެ ކޯ ފައުންޑަރ މެމްބަރެކެވެ. 

މިފަދަ އެތައް މައްސަލަތަކެއް ފެންމަތިވެފައިވާއިރު، އެކަންކަމާއި ގުޅިގެން އެކަށީގެންވާ ފިޔަވަޅެއް ސަރުކާރުން އަޅަމުން ނުދާކަން ސަރުކާރުގެ ވާދަވެރިން ފާހަގަކުރައްވައެވެ.