ބިދޭސީންނަށް މިނިމަމް ވޭޖު ދިނުން މުއްދަތެއް ނެތް ގޮތަށް ފަސްކުރުމަށް ވަޒީފާއާއި ބެހޭ ގާނޫނު އިސްލާހުކުރީ އެކަން އެހެން ބައެއްގެ ބޮލަށް ޖެހުމަށްކަމަށް ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފު ވިދާޅުވެއްޖެއެވެ.
މެމްބަރު ހުސެއިން އެފަދައިން ވިދާޅުވެފައިވަނީ ރައްޔިތުންގެ މަޖިލީހުގެ ތިން ވަނަ ދައުރުގެ 16 ވަނަ ޖަލްސާގައި، ވަޒީފާއާއި ބެހޭ ގާނޫނަށް ހުށައެޅި އިސްލާހާއި ގުޅޭގޮތުން މަޖިލީހުގެ ކޮމެޓީއިން ނިންމި ގޮތާއި ގުޅިގެން ވާހަކަދައްކަވަމުންނެވެ.
އޭނާ ވިދާޅުވީ ބިދޭސީންނަށް މިނިމަމް ވޭޖު ކަނޑައެޅުން ފަސްކުރުމަށް އިގްތިސާދީ ހާލަތު ބަހަނާއަކަށް ހަދަމުންދާކަމަށެވެ. ކޯވިޑް ނަވާރައިގެ އެންމެ ނުރައްކާތެރި ހާލަތުގައިވެސް ރާއްޖޭގައި ފަތުރުވެރިން ތިބި ކަމަށާއި، އިގްތިސާދު ރަނގަޅުކުރުމަށް މިހާތަނަށް ސަރުކާރަށް ކުރެވުނު އެއްވެސް ކަމެއް ނެތްކަން އޭނާ ފާހަގަކުރެއްވިއެވެ.
އެއާއި ގުޅުވާ މެމްބަރު ހުސެއިން ވިދާޅުވީ ބިދޭސީންނަށް މިނިމަމް ވޭޖު ދިނުން ފަސްކުރުމަށް ކޮމެޓީއިން ނިންމީ ދައުރު ނިމެންވާއިރަށްވެސް އިގްތިސާދު ރަނގަޅުކުރެވޭ އެއްވެސް ޔަގީންކަމެއް ސަރުކާރަށް ނެތުމުން، މިނިމަމް ވޭޖުގެ ކަންކަން އެހެން ބައެއްގެ ބޮލުގައި އެޅުވުމަށްކަމަށެވެ.
"ބިލުގައި މި އޮތީ އެއްވެސް މުއްދަތެއް ނެތް ގޮތަށް ސަރުކާރުން ބޭނުން ވީމަ، ބޭނުން ދުވަހެއްގައި މިނިމަމް ވޭޖު ކަނޑައެޅޭގޮތަށް. މި ސަރުކާރަކަށް ހިޔެއް ނުވޭ އިގްތިސާދު އަރައިގަންނާނެހެން މިޔޮއް އަހަރެއްހާ ދުވަސްތެރޭގައި. އެހެން ވީމަ މިކަން އެހެން ބައެއްގެ ބޮލަށް ކަނޑާލުމުގެ ގޮތުން ކޮށްފައިވާ ވަރަށް ދަށު ދަރަޖައިގެ ކަމެއްކަމަށް"
ފަރެސްމާތޮޑާ ދާއިރާގެ މެމްބަރު ހުސެއިން
ދިބޭސީންނަށް މިނިމަމް ވޭޖު ދިނުން ފަސްކުރުމަށް ހުށައެޅި ބިލާއި ގުޅޭގޮތުން މަޖިލީހުގައި ހޫނު ގަދަ ބަހުސްތަކެއް ކުރިއަށް ގެންގޮސްފައިވާއިރު، މިއަދުގެ މަޖިލީހުގެ ބައްދަލުވުމުގައި ވަނީ ސަރުކާރުން ހުށައެޅި ގޮތަށް އެ ބިލު އިސްލާހުކުރުމަށް ކޮމެޓީއިން ނިންމާފައެވެ.
އަދި އެގޮތަށް ނިންމާ ކޮމެޓީއަށް ހުށައެޅި ރިޕޯޓުވެސް ވަނީ މަޖިލީހަށް ހާޒިރުވި މެމްބަރުންގެ އަގުލަބިއްޔަތުން ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
