އަހަރަކު އެއް ފަހަރު ބައި-އިލެކްޝަން ބާއްވާގޮތަށް ލޯކަލް ކައުންސިލް އިންތިޚާބުގެ ގާނޫނަށް ހުށައަޅާފައިވާ އިސްލާހަކީ ރަނގަޅު ދިރާސާއެއްގެ މައްޗަށް ހަދާފައިވާ އިސްލާހެއް ނޫންކަން ފާހަގަކުރައްވާ ނައިފަރު ދާއިރާގެ މެމްބަރު އަހުމަދު ޝިޔާމު ނުރުހުން ފާޅުކުރައްވައިފިއެވެ.
ޝިޔާމުގެ ވާހަކަ ފައްޓަވަމުން ވިދާޅުވީ ކައުންސިލްތަކާއި އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ ހިންގުން ހަރުދަނާކުރުމުގެ ނަމުގައި ދައުލަތުން ބޮޑު ޚަރަދެއްކޮށްގެން އަހަރަކު ދެ ފަހަރު ބާއްވާ ވިޔަވަތި ކޮންފަރެންސްއިން އެއްވެސް މަގްސަދެއް ހާސިލު ނުވާކަމަށެވެ.
އެ ކޮންފަރެންސް ބާއްވައިގެން އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކުގެ މެމްބަރުން އަވަސް އަވަހަށް އިސްތިއުފާ ދޭން ޖެހޭ ސަބަބުތައް ދެނެގަނެވިފައި ނުވާކަމަށް ޝިޔާމު ވިދާޅުވިއެވެ. އަދި އެ ކޮންފަރެންސްއަކީ ސަރުކާރުގެ ވެރިން ކުޅިވަރުކުޅެ މަޖާކޮށްލުމަށް ބާއްވާ ކޮންފަރެންސްއެއްކަމަށް ޝިޔާމު ވިދާޅުވިއެވެ.
"ވިޔަވަތި ކޮންފަރެންސްތަކަށް ކުރަ ހޭދަ އަޅުގަނޑުމެން އެންމެންނަށްވެސް އެބަ އެނގޭ. ކޮންމެ އަހަރަކު ދެކޮޅު އެބަ ބާއްވާ ވިޔަވަތި ކޮންފަރެންސް. މިކަހަލަ އިސްލާހެއް އައިމައި އަޅުގަނޑުމެންނަށް މި އެނގޭ އެއްޗަކީ ވިޔަވަތި ކޮންފަރެންސް މި ބާއްވަނީ ތިން މުގޯލި ކުޅެންކަން"
ނައިފަރު ދާއިރާގެ މެމްބަރު ޝިޔާމު
ޝިޔާމު ވިދާޅުވީ މިހާރު މަޖިލީހަށް ހުށައަޅާފައިވާ އިސްލާހަކީ ލާމަރުކަޒީ ނިޒާމާއި ބީރައްޓެހި ނިޒާމެއްކަމަށެވެ.
ޚަރަދުކުޑަކުރުމުގެ ނަމުގައި މަޖިލީހަށް އެ އިސްލާހު ހުށައެޅިއިރު، ލާމަރުކަޒީ ގާނޫނެއް ހެދީ އެ ޚަރަދުތައް ހިނގާނެކަން އެނގިވަޑައިނުގެން ތިއްބަވާތޯވެސް ޝިޔާމު ވަނީ ސުވާލުކުރައްވާފައެވެ.
އެއާއެކު އޭނާ ވިދާޅުވީ މި އިސްލާހަކީ އަންހެނުންގެ ތަރައްގީއަށް މަސައްކަތް ކުރާ ކޮމެޓީތަކަށް ސަރުކާރުން އަހަންމިއްޔަތުން ނުދޭކަން ހާމަވެގެންދާ އިސްލާހެއްކަމަށެވެ. ޚަރަދުކުޑަކުރުމަށް މިފަދަ އިސްލާހަކަށް ވުރެ މުހިންމު އެތައް ކަމެއް ހުރިކަން ޝިޔާމު ވަނީ ފާަހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
