އަވަސް އަވަހަށް ބައި-އިލެކްޝަންތައް ބާއްވަން ޖެހުމަކީ ތަރައްގީއަށް ކުރަން ހުންނަ މުހިންމު މަސައްކަތްތައް ކުރުމަށް ގިނަ ވަގުތުތަކެއް ގެއްލިގެންދާ ކަމެއްގެ ގޮތުގައި ސިފަކުރައްވާ މަޖިލީހުގެ ބާރަށު ދާއިރާގެ މެމްބަރު އަހުމަދު ފާޑުވިދާޅުވެއްޖެއެވެ.
އަހުމަދު މިފަދައިން ފާޑުވިދާޅުވެފައިވަނީ ލޯކަލް ކައުންސިލް އިންތިޚާބުގެ ގާނޫނަށް އިސްލާހު ހުށައެޅުމުގެ ބިލަށް މިއަދު މަޖިލީހުގައި ވާހަކަދައްކަވަމުންނެވެ.
އަހުމަދު ވިދާޅުވީ އުސޫލުތަކާއި ގަވައިދުތަކަށް އަބަދުވެސް އިސްލާތުތައް ގެނައުމަކީ ކުރައްވަން ޖެހޭކަމެއްކަމަށެވެ. ލާމަރުކަޒީ ނިޒާމުގެ ތެރެއިން ރާއްޖެ ހިންގުމަށް މަސައްކަތް ކުރާއިރު ގާތް ގާތުގައި ބައި-އިލެކްޝަންތައް ބާއްވަން ޖެހުމަކީ ގިނަ ޚަރަދުތަކެއް ހިނގާކަމެއްކަމަށެވެ. އަދި އެކަމަށްޓަކައި ގިނަ ވަގުތުތަކެއް ހޭދަކުރަންވެސް ޖެހޭކަމަށެވެ.
އެހެން ނަމަވެސް މިހާރު ފެންނަމުންދާ ކަންކަމަށް ބަލާއިރު، ގިނަ ވަގުތު ހުސްކޮށްގެން، ބޮޑެތި ޚަރަދުތަކެއް ކޮށްގެން ގާތް ގާތުގައި ބައި-އިލެކްޝަންތައް ބާއްވާއިރު، އޭގެން ނިކުންނަ ނަތީޖާ، ފައިދާއަށް ވުރެ ގެއްލުން ބޮޑުކަމަށް އަހުމަދު ވިދާޅުވިއެވެ. އަދި މިކަމަށް މިނޫން ގޮތެއް ހޯދުމުގެ މަސައްކަތަކީ ކުރަން ޖެހޭ ކަމެއްގެ ގޮތުގައިވެސް ފާހަގަކުރެއްވިއެވެ.
"މި ދެންނެވި އިންތިޚާބުތައް މި ގޮތަށް ބޭއްވުމަކީ އެއީ މިއަދު އަޅުގަނޑުމެންގެ މާލީ ނިޒާމަށް މިއަދު ބެލިކަމުގައި ވީނަމަވެސް، އަދި ހިންގުމުގެ ނިޒާމަށް މިއަދު ބެލިކަމުގައި ވީނަމަވެސް އޭގެން ނިކުންނަ ރަނގަޅު ނަތީޖާއަށް ވުރެން، އޭގެން ނިކުންނަ ރަނގަޅު ނޫން ނަތީޖާ ބޮޑުކަމެއް. މާނައަކީ އަޅުގަނޑުމެން އެންމެން މި ދެންނެވި މަސައްކަތަށް ހުސްވެ މުޅި ރާއްޖޭގައި މި މަސައްކަތް ކުރަން ތިބުމަކީ ދެން ހުރި އެހެން މަސައްކަތްތަކަށް ހީނަރުކަން ލިބި ނޫނީ، އުނިކަމެއް އަތުވެދާނެކަމެއް"
ބާރަށު ދާއިރާގެ މެމްބަރު އަހުމަދު
އަހުމަދު ގެ ވާހަކައިގައި ވަނީ ލާމަރުކަޒީ ނިޒާމު ހަރުދަނާކުރުމަށް، އަދި ޚަރަދުތައް ކުޑަކުރުމަށް ލޯކަލް ކައުންސިލް އިންތިޚާބުތައް ބާއްވާ ގޮތަށް ހުށައަޅާފައިވާ އިސްލާހަށް ތާއީދުކުރައްވާކަން ފާހަގަކުރައްވާފައެވެ.
ސަރުކާރުގެ ފަރާތުން ހުށައަޅާފައިވާ މި އިސްލާހުގައި ވާގޮތުން، އިންތިޚާބީ ގޮނޑިއެއް ހުސްވުމަށްފަހު، އެ ގޮނޑިއަށް މެމްބަރަކު އައްޔަންކުރުމަށް ބާއްވާ ބައި-އިލެކްޝަން ބާއްވާ މުއްދަތު ވަނީ 365 ދުވަހަށް އިތުރުކޮށްފައެވެ. މި އިސްލާހު ފާސްވެއްޖެކަމަށް ވާނަމަ، ދެން ބައި-އިލެކްޝަން ބާއްވަން ޖެހޭނީ އަހަރަކު އެއްފަހަރުއެވެ.
އެހެން ނަމަވެސް، ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ ކޯރަމް ހަވަވާވަރަށް މެމްބަރުން ނެތްކަމުގައި ވާނަމަ، މިހާރުވެސް މެމްބަރުން އައްޔަންކުރުމަށް އޮންނަ އުސޫލުގެ ތެެރެއިން ބައި-އިލެކްޝަންތައް ބޭއްވޭނެކަމަށް މި އިސްލާހުގައި ބަޔާންކޮށްފައެވެ.
Advertisement
This content is created and paid for by advertisers and does not involve Voice Journalists
