ހ. ޝީރީން ވިލާގައި އަނިޔާވެރިގޮތަކަށް މަރާލާފައި އޮތްވާ ފެނުނު ޝިއާއު މުހައްމަދު ސައީދު މަރާލުމަށްފަހުވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވާކަން ފުލުހުން ހާމަކޮށްފިއެވެ. 

އެ މައްސަލައާއި ގުޅޭގޮތުން މިހާތަނަށް ހޯދުނު ހޯދުންތައް ހާމަކުރުމަށް ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން އިންސްޕެންޓާ އޮފް ޕޮލިސް މުހައްމަދު ސާމިހް ވިދާޅުވީ ޝިއާއު މަރާލުމަށްފަހުވެސް އޭނާގެ ހަށިގަނޑަށް ބޮޑެތި އަނިޔާތަކެއް ދީފައިވާކަން ޕޯސްޓްމޯޓަމްގެ ވަގުތީ ނަތީޖާއިން ދެނެގަނެވިފައިވާކަމަށެވެ. 

ފުލުހުން ބުނީ ޝިއާއުގެ މަރާއި ގުޅިގެން ތުހުމަތުކުރެވޭ އަލީ ޝާހިލްގެ މައްޗަށް ގަސްދުގައި މީހަކު މެރިކަމުގެ ކުށް ސާބިތުވާ ވަރަށް ހެކި ލިބިފައިވާކަމަށެވެ. އެހެން ނަމަވެސް މިހާތަނަށް އޭނާ މަރާލި ސަބަބު ނުވަތަ މޯޓިވް ކަށަވަރުކުރެވިފައި ނުވާކަމަށެވެ. 

ޝާހިލްގެ ފަރާތުން ފުލުހުންނަށް އެއްބާރުލުން ދިން ނަމަވެސް، ސީދާ އެ މައްސަލައިގައި އޭނާ އެކަށީގެންވާ މައުލޫމާތުތައް ހިއްސާކުރަމުން ނުދާކަމަށް ފުލުހުން ބުންޏެވެ. 

އެ މައްސަލައާއި ގުޅިގެން މިހާރު ކުރެވެމުންދާ މަސައްކަތަކީ މޯޓޮވް ދެނެގަތުމުގެ މަސައްކަތްކަން ފުލުހުން ހާމަކުރިއެވެ.

އެގޮތުން މިހާރު ޝާހިލްގެ ފޯނުގައި ހުރި ޑޭޓާ އެކްސްޓްރެކްޓު ކުރުމުގެ މަސައްކަތް ކުރަމުންދާކަމަށާއި، އަދި އެ ޑޭޓާތަކުގެ އަލީގައި މޯޓިވް ދެނެގަނެވޭނެކަމަށް ގަބޫލުކުރައްވާކަމަށް ފުލުހުން ވަނީ ބުނެފައެވެ. 

އޭގެ އިތުރުން މިހާތަނަށް ބެލި ބެލުމުން ނަސްފާނީ އެއްވެސް މައްސަލައެއް ޝާހިލްގެ ނެތްކަން ފާހަގަވެފައިވާކަންވެސް ފުލުހުން ވަނީ ހާމަކޮށްފައެވެ. 

ފުލުހުން އިތުރަށް ބުނީ ކުރިއަށް އޮތް ދެ ހަޕްތާ ތެރޭގައި އެ މައްސަލައާއި ގުޅިގެން ދައުވާކުރުމަށް ޕީޖީ އޮފީހަށް ފޮނުވޭނެކަމަށެވެ. އަދި އެހާތަނަށް އެމަރުގެ މޯޓިވް ދެނެގަނެވޭނެކަމަށް ފުލުހުން ވަނީ ބުނެފައެވެ.