ފުލުހުންގެ އެކި ބަހާތަކަށް އަމާޒުކޮށްގެން ފުލުހުންގެ ތެރޭގައި ބާއްވާ އެންމެ ޝަރަފްވެރި އެއް މުބާރާތްކަމަށްވާ ކޮމިޝަނަރ އޮފް ޕޮލިސްގެ ވާދައިގެ ތައްޓަށް ކުޅެވޭ "ސީޕީ ކަޕް " މާދަމާ ރޭ ފަށާނެއެވެ.
މުބާރާތުގެ ފުރަތަމަ މެޗުގައި ވާދަކުރާނީ ހުޅުމާލެ ޕޮލިސް އާއި އައިޑީ ކުލަބް (އިންޓެލިޖެންސް ޑައިރެކްޓްރޭޓް) އެވެ. މިޗު ފެށުމަށް ހަމަޖެހިފައިވަނީ 21:30 ގައެވެ.
ސީޕީ ކަޕް ފުޓްބޯޅަ މުބާރާތުގެ ފިރިހެން ޑިވިޜަން ކުރިއަށްދާނީ ދެ ޑިވިޜަނަކެވެ. އެއީ ފުރަތަމަ ޑިވިޜަނާއި ދެވަނަ ޑިވިޜަނެވެ.
ފިރިހެން ޑިވިޜަންގައި ފުލުހުންގެ އެކި ބަހާތަކުން ޖުމްލަ 17 ޓީމަކުން ބައިވެރިވެފައިވެއެވެ.
އެގޮތުން ފުރަތަމަ ޑިވިޜަންގައި ނުވަ ޓީމަކުން ބައިވެރިވެފައިވާއިރު ފުރަތަމަ ޑިވިޜަންގެ ކުޅުން ކުރިއަށްދާނީ ދެ ގްރޫޕަކަށް ބަހާލައިގެންނެވެ.
ދެވަނަ ޑިވިޜަންގައި އަށް ޓީމަކުން ބައިވެރިވެފައިވާއިރު މި ޑިވިޜަންގެ ކުޅުންވެސް ކުރިއަށްދަނީ ދެ ގްރޫޕަކަށް ބަހާލައިގެންނެވެ.
ފިރިހެން ޑިވިޜަންގެ ކުޅުން ކުރިއަށްދާނީ އެފްއޭއެމް ޓާފް ދަނޑުގައެވެ.
އަންހެން ޑިވިޜަންގައި މިއަހަރު ޖުމްލަ ހަ ޓީމަކުން ބައިވެރިވެފައިވެއެވެ.
ސީޕީ ކަޕް ފުޓްސަލް މުބާރާތުގެ ކުޅުން ކުރިއަށްދަނީ ލީގު އުސޫލުން ކުޅެ އެންމެ ގިނަ ޕޮއިންޓް ހޯދާ ޓީމު ފައިނަލަށް ދާގޮތަށެވެ. އަދި ފައިނަލުގައި ވާދަކުރާ ދެވަނަ ޓީމު ކަނޑައަޅާނީ ދެވަނަ ޓީމާއި ތިން ވަނަ ޓީމާ ދެމެދު ކުޅެވޭ ސެމީ ފައިނަލް މެޗުންނެވެ.
ސީޕީ ކަޕް ފުޓްބޯޅަ މުބާރާތުގެ މާދަމާރޭ ފަށާއިރު އަންހެން ޑިވިޜަނަށް އަމާޒުކޮށްގެން ބާއްވާ ސީޕީ ފުޓްސަލް މުބާރާތްވެސް އޮކްޓޯބަރ 23 ވަނަ ދުވަހު ފެށުމަށްވަނީ ހަމަޖެހިފައެވެ.
Advertisement
This content is created and paid for by advertisers and does not involve Voice Journalists
