ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި ފަސް އަހަރު ތެރޭ އުފައްދާފައިވާ ވަޒީފާ ތަކަށްވުރެ ގިނަ ވަޒީފާ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މި ސަރުކާރުން 5 އަހަރުތެރޭ އުފައްދާފައިވާ ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެއެވެ. 

މިއަހަރުގެ ޤައުމީ ޒުވާނުންގެ ދުވަސް ފާހަގަކުރުމަށާއި ޒުވާނުންގެ އިނާމް ދިނުމަށް ރޭ، ސޯޝަލް ސެންޓަރުގެ އިންޑޯ ހޯލުގައި ބޭއްވި ޖަލްސާގައި ވާހަކަދައްކަމުން މަހްލޫފް ވިދާޅުވީ، ކުރީ ސަރުކާރުގެ ފަސް އަހަރު ދުވަހުގެ ތެރޭގައި އުފައްދާފައި ވަނީ 18،000 ވަޒީފާ ކަމަށެވެ. އެހެންނަމަވެސް މި ސަރުކާރަށް މިވީ ހަތަރު އަހަރުގެ ތެރޭގައި 20،000 އަށް ވުރެ ގިނަ ވަޒީފާ އުފައްދާފައިވާ ކަމަށް އޭނާ ވިދާޅުވިއެވެ. 

މިއާއެކު މަހްލޫފް ވިދާޅުވީ، މީގެ ކުރިން، އޭނާއަށް ޔޫތު ސިފަވެފައި އޮތީ ވަރަށް ކުޑަ މާބޮޑު މަސައްކަތްތަކެއް ނުކުރާ ތަނެއްގެ ގޮތުގައި ކަމަށެވެ. އެހެން ނަމަވެސް މިސަރުކާރުން އެ ވިސްނުން ބަދަލުކޮށްލާފައިވާ ކަމަށާ، ކުޅިވަރު ވަސީލަތްތައް ގާއިމުކުރުމަށާއި ޒުވާނުންގެ ތަރައްގީއަށް އެ މިނިސްޓްރީން މިހާރު ވެސް 550 އަށް ވުރެ ގިނަ ޕްރޮޖެކްޓްތައް ކުރިއަށް ގެންދާ ކަން މަހްލޫފް ފާހަގަކުރެއްވިއެވެ. 

"ނަމަވެސް މިއަދު މި ޕޯޑިއަމް ކައިރީގައި ހުރެ އަޅުގަނޑު ވާހަކަ ދައްކާއިރު، މި ސަރުކާރުގައި ހިންގާ ޕްރޮޖެކްޓުތަކުގައި ވެސް ދެވަނަ އަށް އެންމެ ގިނަ މަސައްކަތްކުރާ މިނިސްޓްރީ އަކީ މި މިނިސްޓްރީކަން އަޅުގަނޑު އުފަލާ އެކީގައި ފާހަގަކުރަން،" އޭނާ ވިދާޅުވި އެވެ.

މީގެ އިތުރުން މަހްލޫފް ވިދާޅުވީ، އެހެން މިނިސްޓްރީ ތަކުން ކުރަމުންދާ މަސައްކަތްތަކުގެ ވެސް ބޮޑު ބައެއް އަމާޒުކޮށްފައިވަނީ ޒުވާނުންނަށް ކަމަށާ، މި ސަރުކާރުން ފަހިކޮށްދެމުން އަންނަ ތައުލީމާއި ވަޒީފާ އާއި އަދި ތަރައްގީގެ މަސައްކަތްތަކުގައި ޒުވާނުންގެ ބޮޑު ހިއްސާއެއް އޮންނަ ކަމަށެވެ. 

"ޒުވާނުންނަށް ކިޔެވުމުގެ މަގުފަހިކުރުމަށް ސްޓޫޑެންޓް ލޯނަށް އެއް ބިލިއަނަށް ވުރެ ގިނަ ރުފިޔާ ހޭދަކޮށްފައިވޭ. އަދި 1.7 ބިލިއަން ރުފިޔާ، 1،119 އެސްއެމްއީ ލޯނަށް ދީފައިވާއިރު، މީގެ ތެރެއިން 400 ލޯނަކީ ސީދާ ޒުވާނުންނަށް ދީފައިވާ ލޯނުތައް،" މަހްލޫފު ވިދާޅުވި އެވެ.