މީހަކު ރައްކާކުރަން ހަވާލުކުރި ކޮތަޅެއްގެ ތެރެއިން މަސްތުވާތަކެތި ފެނުނު މައްސަލައެއްގައި، ސްރީ ލަންކާ މީހަކު 25 އަހަރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.

މި މައްސަލާގައި ދައުލަތުން ދައުވާ ކޮށްފައިވަނީ ރާއްޖޭގައި ވަޑިއެއްގެ މަސައްކަތް ކުރަމުން އައި ސްރީލަންކާގެ ރަނަސިންގް ޓެއްސާ ހެވަ ނަމަކަށް ކިޔާ މީހަކަށެވެ. އޭނާގެ މައްޗަށް ދައުލަތުން ކޮށްފައިވަނީ ކެނަބިސް ބޭނުން ކުރުމާއި ކެނަބިސް ޓެރެފިކް ކުރުމުގެ ދައުވާއެވެ. 

މި ދެ ދައުވާގެ މައްސަލަ ވެސް ވަކިވަކިން ކުރިއަށް ގެންގޮސްފައިވާއިރު, ކެނަބިސް ބޭނުން ކުރުމުގެ ކުށުގެ ދައުވާ މީނާގެ މައްޗަށް އުފުލާފައިވަނީ، 5 މާރިޗު 2020 ގައި 13:10 ހާއިރު، އޭނާ މާލޭގައި ދިރިއުޅޭ ގ.ރާޑޯ ގޭގޭ ފުރަތަަމަ ފަންގިފިލާގައި މަސްތުވާތަކެތި ބަހައްޓައިގެން އޭގެ ވިޔަފާރި ކުރަމުން ދިޔަ ކަމަށް ތުހުމަތު ކުރެވުނު މައްސަލާގައި އޭނާ ފުލުހުންގެ ބެލުމުގެ ދަށަށް ގެންގޮސް ކުޑަކަމުދާ އެއްޗެހި ނަގައި ތަހުލީލު ކުރިއިރު އެ އެއްޗެހި ކެނަބިސް އަށް ޕޮޒިޓިވް ވެފައިވާތީ ކަމަށް ދައުލަތުން ބުނެފައިވެއެވެ. 

ރަނަސިންގްގެ މައްޗަށް ކޮށްފައިވާ މި ދައުވާ އަށް އޭނާ އިންކާރު ކޮށްފައިވާއިރު، އޭނާގެ މައްޗަށް ދައުލަތުން ހުށަހަޅާފައިވާ ހެކިތަކަށް ބަލައި ކުށް ސާބިތުވާ ކަމަށް ބަލައި ކްރިމިނަލް ކޯޓުން ވަނީ 3 އަހަރު ދުވަހަށް އޭނާ ޖަލަށް ލުމަށް ހުކުމް ކޮށްފައެވެ. 

ރަނަސިންގްގެ މައްޗަށް ދައުލަތުން ކުރި ކެނަބިސް ޓްރެފިކް ކުރުމުގެ ދައުވާ ގައި ދައުލަތުން ބުނީ، ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން ރަނަސިންގް ދިރިއުޅޭ ތަން ބަލާފާސްކުރުމުން މަސްތުވާތަކެތި އަޅާފަައި ހުރި 12 ފިލްމު ހުސްކުރި ދަޅު ފެނިފައިވާ ކަމަށެވެ. އަދި އެ ދަޅުތަކުގައި 306 ގްރާމުގެ ކެނެބިސް ހުރިއިރު އެ ތަކެތި ހުރި ކޮތަޅު އެ މީހުންނަށް ދެއްކީ ރަނަސިންގްއެވެ. އޭގެ އިތުރުން ދަމާ ވަތްގަނޑެއްގެ ތެރެއިން 0.7 ގްރާމުގެ ކެނެބިސް ވެސް އެކޮޓަރިން ފެނިފައިވާކަމަށެވެ.

މި މައްސަލާގަައި ދައުލަތުން ރަނަސިންގްގެ މައްޗަށް ކޮށްފައިވާ ދައުވާ ސާބިތު ކުރުމަށް އޭނާ އުޅޭ ގެއަށ ދިޔަ ފުލުހުންނާއި ފޮރެންސިކް ރިޕޯޓުތައް ތައްޔާރުކުރި ފުލުހުން ހެކިންގެ ގޮތުގައި ހުށަހަޅާފައިވެއެވެ.

ރަނަސިންގްހެ މައްޗަށް ކުރި އެ ދައުވާއަށް އިންކާރުކޮށް އެކަން ސާބިތު ކުރުމަށް އޭނާ ވަޒީފާ އަދާކުރަމުން ދިޔަ ތަނުގެ ސުޕަވައިޒަރާއި އޭނާއާ އެކީ ދިރިއުޅެމުން ދިޔަ މީހުން ހެކީންގެ ގޮތުގައި ހުށަހަޅާފައިވެއެވެ.

އޭނާ ޝަރީއަތުގައި ބުނީ އެތަނަކީ އޭނާގެ އިތުރުން އެހެން ބަޔަކު ވެސް ދިރިއުޅެމުން ދިޔަ ތަނަކަށް ވާތީ، އެއީ އޭނާގެ ތަކެތި ކަމަށް ބެލެވޭނެ ހަމައެއް ނެތް ކަމަށެވެ.

ނަމަވެސް ޝަރީއަތުގައި ހެކި ބަސް ދިން ފުލުހުންގެ ހެކި ބަހުން އެނގޭ ގޮތުގައި މަސްތުވާތަކެތި ހުރި ކޮތަޅު ދެއްކީވެސް ރަނަސިންގްއެވެ. އަދި އެއީ "ލޫތު" ނަމަކަށް ކިޔާ މީހަކު އޭނާ އަތަށް ދީފައި ހުރި ކޮތަޅެއް ކަމަށް އެ ވަގުތު އެ ތަނުގައި ތިބި ފުލުހުން ގާތު އޭނާ ބުނިކަމަށްވެސް ފުލުހުން ޝަރީއަތުގައި ބުނެފައިވެއެވެ.

ރަސިންގް ވަނީ އޭގެ ތެރޭގައި މަސްތުވާތަކެތި ހުރިކަން އޭނާއަށް ނޭނގޭ ކަމަށް ބުނެފައެވެ. ނަމަވެސް ކްރިމިނަލް ކޯޓުގެ ހުކުމުގައި ވަނީ ވަށައިގެން ހުރި ކަންކަމާއި ހެކި ބަހުން، މިއީ އޭނާއަށް އެނގިގެން އެ ތަނުގައި ބަހައްޓާފައި ހުރި މަސްތުވާތަކެތިކަން ސާބިތުވާ ކަމަށް ނިންމާފައެވެ.

އެހެންކަމުން އޭނާގެ މައްޗަށް ކުރި ހުކުމުގައި ބުނެފައިވަނީ ދިފާއުގައި ހުށަހަޅާފައިވާ ހެކިތަކުން ދައުވާއިން އެމީހާ ބަރީއަނުވާ ކަމަށާއި، މި މަސްތުވާތަކެއްޗަކީ ރަނަސިންގްގެ ބެލުމުގެ ދަށުގައި ހުރި އެއްޗެހިކަން ސާބިތުވާކަމަށެވެ.

ކްރިމިނަލް ކޯޓުން ވަނީ ރަސިންގް 100،000ރ. އިން ޖޫރިމަނާކުރުމާއިއެކު 25 އަހަރަށް ޖަލަށްލާން ހުކުމް ކޮށްފައެވެ. ނަމަވެސް ރަނަސިންގް ބަންދުގައި ހޭދަކުރި ދެ އަހަރާއި ހަތް މަހާއި 17 ދުވަސް އުނިކުރުމުން، އޭނާ ތަންފީޒުކުރަން ޖެހޭނީ 22 އަހަރާއި ހަތަރު މަހާއި 13 ދުވަހުގެ ޖަލު ހުކުމެކެވެ.