ރައްޔިތުން އަތުން ނަގާ ޓެކްސް ބޮޑު ނުކޮށްފިނަމަ މުސާރަ އެއްހަމަ ކުރުމަށް ހުރަސްއެޅޭނެކަމަށް ރައްޔިތުންގެ މަޖިލީހުގެ ކިނބިދޫ ދާއިރާގެ އެމްޑީޕީ މެންބަރު އަދި މާލިއްޔަތު ކޮމިޓީގެ މުގައްރިރު މުހައްމަދު ނާޝިޒު ވިދާޅުވެއްޖެއެވެ.

އޭނާ މިފަދައިން ވިދާޅުވެފައިވަނީ ރާއްޖެޓީވީ ގެނެސްދިން ޕްރޮގްރާމެއްގައި ވާހަކަދައްކަވަމުންނެވެ. 

އެ ޕްރޮގްރާމުގައި ވާހަކަދައްކަވަމުން ނާޝިޒް ވިދާޅުވީ ޓެކްސް ބޮޑުކުރުމަކީ މުސާރަ އެއްހަމަ ކުރުމަށް ކުރެވޭ މަސައްކަތްތަކާއި ގުޅިފައިވާ ކަމެއްކަމަށެވެ. 

އޭގެ އިތުރުން އެކަމަކީ ރަށްރަށުގައި ހިންގާ މަޝްރޫއުތަކަށްވެސް ވަރަށް ބޮޑަށް މަންފާ ކުރާނެ ކަމެއްގެ ގޮތުގައި އޭނާ ފާހަގަކުރެއްވިއެވެ. 

ނާޝިޒް ވިދާޅުވިގޮތުގައި ރައީސް ސޯލިހު ރަށްތައް ތަރައްގީކުރައްވަމުން ގެންދަވަނީ ވަރަށް ދުރުވިސްނޭ ސިޔާސަތެއްގެ ތެރެއިންނެވެ. އެގޮތުން ފެނާއި ނަރުދަމާއާއި، ސިއްހީ ޚިދުމަތާއި، ސުކޫލްތަކާއި، ރަށްރަށުގެ ބަނދަރުފަދަ ޕްރޮޖެކްޓުތައް ހިންގުމުން، އެއިން ކޮންމެ ރަށަކީވެސް ކައިރި މުސްތަގުބަލުގައި ދެވަނަ މާފުއްޓަކަށް ނުވަތަ ތުލުސްދޫއަކަށް ވުން ގާތްކަމަށް އޭނާ ވިދާޅުވިއެވެ. 

އެކަންކަން ހާސިލްކުރުމަށްޓަކައި ސަރުކާރުން ނިންމުންތަކެއް ނިންމަން ޖެހޭކަމަށާއި، ޓެކްސްއަށް މި ގެންނަ ބަދަލަކީ އެފަދަ ނިންމުމެއްގެ ގޮތުގައި އޭނާ ސިފަކުރެއްވިއެވެ. އަދި ވިދާޅުވީ ސަރުކާރުން ނިންމާ ނިންމުންތަކަކީ މާލީ ތަޖުރިބާކާރުންގެ ލަފަޔާއި މަޝްވަރާވެސް ހޯދައިގެން ނިންމާ ނިންމުންތަކެއް ކަމަށެވެ. 

ކޯވިޑްގެ އެންމެ ދަތި ހާލުގައިވެސް ސަރުކާރުން އިގްތިސާދު މެނޭޖުކޮށްފައިވަނީ ރައްޔިތުންނަށް އެންމެ ތަކުލީފު ވާނެ ގޮތަށްކަން އޭނާގެ ވާހަކައިގައި ފާހަގަކުރެއްވިއެވެ.