ރައްޔިތުންގެ މަޖިލީހަށް ސަރުކާރުން ހުށައެޅި ސަޕްލިމެންޓްރީ ބަޖެޓާއި މެދު މަޖިލީހުގެ ރައީސް އަދި ސަރުކާރު ހިންގާ މައި ޕާޓީ އެމްޑީޕީގެ ރައީސް މުހައްމަދު ނަޝީދު ހިތްހަމަ ނުޖެހުން ފާޅުކުރައްވައިފިއެވެ.
އަންނަ އަހަރަށް ލަފާ ކުރާ ބަޖެޓާއެކު މި އަހަރުގެ ބަޖެޓް ފޫބައްދަން 5.8 ބިލިއަން ރުފިޔާ އިތުރު ކުރަން ޖެހިވަޑައިގަންނަވާ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ބަޖެޓު ހުށައަޅުއްވަމުން ވިދާޅުވެފައެވެ.
މިއަދު މަޖިލިސް ފައްޓަވަމުން ރައީސް ނަޝީދު ވިދާޅުވީ އަންނަ އަހަރަށް ލަފާކުރާ ބަޖެޓު ހުށަހެޅިއިރު ހުށަހެޅީ 36.9 ބިލިއަން ރުފިޔާ ކަމަށާއި އަދި އޭގެ ތެރެއަށް މިއަހަރުގެ ސަޕްލިމަންޓްރީ ބަޖެޓުގެ ގޮތުގައި 5.8 ބިލިއަން ރުފިޔާ ހުށަހެޅި ކަމަށެވެ.
އެއާއެކު އަންނަ އަހަރުގެ ބަޖެޓު 43 ބިިލިއަން ރުފިޔާއަށް އިތުރުވީ ކަމަށެވެ. އަދި ނަޝީދު ވަނީ އެކަމާއި ނުރުހުން ފާޅުކުރައްވާފައެވެ.
"މިއީ ކަން ހިނގަންވާނެ ގޮތް ނޫންކަން ގާނޫނުން ވެސް އެނގޭ. އަޅުގަނޑު ދެކޭގޮތުގައި މިއީ މައްސަލައެއް. އަދި ރައްޔިތުންގެ މަޖިލީހުގެ އިއްޒަތްތެރި މެމްބަރުންނަށް ހަނދުމަފުޅުކޮށް އަރުވަން ޖެހޭ ނުކުތާއެއް. މިއީ މަޖިލީހުގެ ކަންތައްތައް ހިނގަމުންދާނީ އިއްޒަތްތެރި މެމްބަރުން އެދިވަޑައިގަންނަވާ ގޮތެއްގެ މަތިން. އެހެން ނަމަވެސް ސަރުކާރުން ހުށަހަޅުއްވާ ބިލުތަކާ ބަޖެޓާ ގަރާރާ އަދިވެސް މި ބާވަތުގެ ކަންކަން ގާނޫނޫ އޮނިގަނޑުގެ ތެރެއިން ނުހިންގޭކަމުގައި ވަނީނަމަ އަޅުގަނޑު ދެކޭގޮތުގައި ދުވަހެއް ދުވަހަކަށް އަޅުގަނޑުމެންގެ އަތުން ކަންކަން ގެއްލެމުންދާ މިންވަރު ބޮޑުވާނެ."
މަޖިލީހުގެ ރައީސް މުހައްމަދު ނަޝީދު
ސަޕްލިމަންޓްރީ ބަޖެޓު ހުށަހަޅަން ޖެހޭނީ އެ ބަޖެޓު ބޭނުންވާ ދުވަހުގެ މަސް ދުވަސް ކުރިން ކަމަށާއި އަދި އެ ބަޖެޓު ކުރިން މަޖިލީހުން ފާސްވެސް ކުރަން ޖެހޭނެކަމަށް ނަޝީދު ވަނީ ވިދާޅުވެފައެވެ. އަދި 2023 ގެ ބަޖެޓް ތެރޭގައި މި އަހަރުގެ ސަޕްލިމެންޓަރީ ބަޖަޓަކަށް ވާ ފައިސާ ހިމެނޭނެ ގޮތެއް ނުފެންނަކަމަށްވެސް އެމަނިކުފާނު ވިދާޅުވިއެވެ.
އެކަންކަން ފާހަގަކުރައްވާ ނަޝީދު އިތުރަށް ވިދާޅުވީ ނޮވެމްބަރު މަހާއި ޑިސެމްބަރު މަހާ ދެ މަސް ތެރޭގައި 5.8 ބިލިއަން ރުފިޔާ އިތުރަށް ހަރަދު ކުރައްވާނެ ކަމަށް އެމަނިކުފާނަށް އަންދާޒާ ނުކުރެވޭކަމަށެވެ.
އެހެންކަމުން މިހާތަނަށް އައިރު މަޖިލީހަށް ހުށައަޅުއްވާ ފާސްކުރުމެއް ނެތި އިތުރުވާ މިންވަރުގެ ތެރެއިން ޚަރަދުކުރެވިފައިވާ މިންވަރުވެސް ސާފުކުރަން ޖެހޭކަމަށް ނަޝީދު ވަނީ ވިދާޅުވެފައެވެ.
ނަޝީދު ވިދާޅުވީ ވަކި އިޖުރާތްތަކެއް ގާނޫނުގައި ކަނޑައަޅާފައި ވަނިކޮށް މަޖިލީހުގައި ސަރުކާރަށް ތާއީދުކުރާ މެމްބަރުން އިތުރުވީތީ ވަޒީރު ބޭފުޅުން ދެކިވަޑައިގަންނަވާ ފަސޭހަ ގޮތަށް ކަންކަން ކުރެއްވުމަކީ ޑިމޮކްރަސީއާއި ރައްޔިތުންގެ މަޖިލީހުގެ ގަދަރާއި ކަރާމާތައްވެސް ލިބޭނެ އުނިކަމެއްކަމަށެވެ.
ރައީސް ނަޝީދުވަނީ އެކަންކަމަށް މެމްބަރުން ފުންކޮށް ވިސްނުމަށްވެސް އިލްތިމާސްކުރައްވާފައެވެ.
Advertisement
This content is created and paid for by advertisers and does not involve Voice Journalists
