އައްޑޫ ސިޓީގެ ހިތަދޫގެ ކެނެރީ މަގުގައި ތާރުއަޅަން ފެށުމުގެ ކުރިން ހިންދޫ އަޅުކަމެއް ކުރަމުންދިޔަ މަންޒަރު ފެނިގެންދާ ވީޑިއޯތަކެއް އާންމުވެއްޖެއެވެ. 

 އައްޑޫ ސިޓީގައި ފެން ހިންދުމުގެ ނިޒާމު ޤާއިމުކުރުމާއި، މަގު ހެދުމުގެ މަޝްރޫޢުއަކީ އިންޑިއާގެ އެފްކޯންސް އިންފްރާސްޓްރަކްޗަރ ލިމިޓެޑާ ހަވާލުކޮށްގެން ކުރިއަށް ގެންދާ މަޝްރޫއެކެވެ. 

އެ މަޝްރޫއު ކުރިއަށް ގެންދިއުމަށް ގިނަ އަދަދެއްގެ އިންޑިއާގެ ލޭބަރުންވެސް އައްޑޫ ސިޓީއަށް ގެންގޮސްފައިވާކަން ފާހަގަކޮށްލެވެއެވެ. 

އެ މަޝްރޫއުގެ ދަށުން ހިތަދޫގެ ކެނަރީމަގުގައި ތާރު އެޅުމުގެ މަސައްކަތް ފަށާފައިއިރު، އެ މަސައްކަތް ފަށާފައިވަނީ ހިންދޫއިންގެ އަޅުކަމާއެކުގައެވެ. 

ސޯޝަލް މީޑިއާގައި އާންމުވެފައިވާ ވީޑިއޯތަކުން ފެންނަނީ ތާރުއެޅުމަށް ހަމަޖެހިފައިވާ ސަރަހައްދުގއި ހިންދޫއިން އަޅުކަން ފުރިހަމަ ކުރަމުންދާ މަންޒަރެވެ.

އެގޮތުން ކޮންމެ ކަމެއް ފެށުމުގެ ކުރިން ކާއްޓެއް ފަށާ، އެމީހުންގެ ކަލާންގެ ކިބައިން ވާގިވެރިކަން ހޯދުމަށް ދުއާކުރުމަކީ ހިންދޫއިން ކޮށްއުޅޭ ކަމެކެވެ. އަދި އެފަދައިން ފަޅާ ކާއްޓަކީ ތާޒާ، ފެން މީރު ކާއްޓެއްކަމަށް ވާނަމަ އެމީހުންގެ މަސައްކަތް ކާމިޔާބު ކަމާއެކު ކުރިއަށް ދާނެކަމަށް އެމީހުން ގަބޫލުކުރެއެވެ. 

ހިތަދޫގެ ކެނެރީ މަގުގެ މަސައްކަތް ފެށުމުގެ ކުރިން އެފަދައިން އެ އަޅުކަން ކުރަމުންދާ މަންޒަރު އާންމުވެފައިވާ ވީޑިއޯއިން ފެނިގެންދެއެވެ. 

މިފަހަކަށް އައިސް ހިންދޫއިންގެ އަޅުކަންތައް ފާޅުގައި ކުރަމުންދާ މައްސަލަތައް އެތައް މައްސަލައެއް ވަނީ ފެނިގެން ގޮސްފައެވެ. މީގެ ކުޑަ ދުވަސްކޮޅެއް ކުރިން ފ ބިލެއްދޫގައި ހިންދޫއިންގެ އަޅުކަމެއް ހިންގުމާއި ގުޅިގެން އެ ރަށުގެ މަޝްރަހު ވަރަށް ބޮޑަށް ހޫނުވެގެން ދިޔައެވެ. 

އެކަމާއި ގުޅިގެން ސަރުކާރަށް ބޮޑެތި ފާޑުކިޔުންތަކެއް އަމާޒުވެގެން ދިއުމާއެކު ސަރުކާރުން ވަނީ އެ މައްސަލަ ބަލާނެކަމަށް ބުނެފައެވެ. އެހެން ނަމަވެސް މިހާތަނަށް އެ މައްސަލައާއި ގުޅިގެން ފިޔަވަޅެއް އަޅާފައި ނުވާކަން ފާހަގަކޮށްލެވެއެވެ. 

އައްޑޫ ސިޓީގެ މަގު ހެދުމުގެ މަސައްކަތް އިންޑިއާ ކުންފުންޏަކާއި ހަމާލުކޮށްފައިވާއިރު، އެކަށީގެންވާ ހަލުވިމިނެއްގައި އެ މަސައްކަތް ކުރިއަށް ނުދާތީ އައްޑޫ ސިޓީ ފޭދޫ ދާއިރާގެ މެމްބަރު މުހައްމަދު ނިހާދު ވަނީ ނުރުހުން ފާޅުކުރައްވާފައެވެ. އަދި އެ މަޝްރޫއު ހިންގުމުގައި އެފްކޯންސްއިން ފަރުވާ ކުޑަކުރާކަން ފާހަގަކޮށް ރައްޔިތުން ޝަކުވާ ކުރަމުންދާކަންވެސް އޭނާ ވަނީ ފާހަގަކުރައްވާފައެވެ. 

އެއާއެކު މަގު ހެދުމުގެ މަޝްރޫއު އެފްކޯންސް ކުންފުނިން ކުރާ ގޮތް ރަނގަޅަށް މޮނިޓާ ކުރުމަށްވެސް ނިހާދު ގޮވާލައްވާފައިވެއެވެ.