ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މޮރިޝަސްގެ ބޮޑު ވަޒީރަށް ފޮނުވި ސިޓީފުޅާއެކު އެ ގައުމަށް ލިބިފައި ނުވާ ބޮޑު ސަރަހަދެއް ލިބިގެން ގޮސްފިކަމަށް ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެއެވެ.
ޗާގޯސް މައްސަލައާއި ގުޅިގެން މަޖިލީހަށް ހުށައެޅި ގަރާރަކަށް ވާހަކަދައްކަވަމުން އިލިޔާސް ވިދާޅުވީ ޗާގޯސް މައްސަލައަކީ ރާއްޖޭގެ ރައްޔިތުންގެވެސް އަދި އެކި އެކި ސިޔާސީ ޕާޓީތަކުގެވެސް ބޮޑު ކަންބޮޑުވުމެއް އޮތް މައްސަލައެއްކަމަށެވެ. މި މައްސަލަ މިހާ ހައްސާސް މައްސަލައަކަށް ވެގެން ދިޔައީ ރައްޔިތުންނަށް ވާ ނުވާ ސާފުވާ ގޮތަށް ސަރުކާރުން ކަންތައްތަކެއް ނިންމަމުން ދިއުމާއި ގުޅިގެންކަމަށެވެ.
"މިކަމާއި ގުޅޭގޮތުން ކުރީގެ އެޓާނީޖެނެރަލް ޑރ މުނައްވަރު އެކި ފޯރަމްރަކުގައި ވަރަށް ތަފްސީލުކޮށް ވާހަކަދައްކަވާފައި އެބަހުރި. އަދި މި މައްސަލަ މިފަހުން ތިލަވުމުގެ ކުރިން މިކަމާއި ބެހޭގޮތުން އެބޭފުޅާ ނޫސްބަޔާނެއް ނެރުއްވާފއި އޮތްވާ އަޅުގަނޑު ދެކުނިން. ޑރ މުނައްވަރަކީ ހަމައެކަނި ކުރީގެ އެޓާނީޖެނެރަލް އެއްގެ އިތުރަށް މި ދިވެހިރާއްޖޭގެ ބޯޑަރު ކަނޑައެޅިއުރު ދިވެހިރާއްޖޭގެ ސަރަހައްދަކީ ކޮބައިކަން އެ ލައިނު އެޅުއްވި ބޭފުޅާ. އެބޭފުޅާއަށް ވަރަށް ރަނގަޅަށް އެނގިވަޑައިގަންނަވާނެ މިކަމުގެ ތަފްސީލު"
ހުޅުދޫ ދާއިރާގެ މެންބަރު އިލްޔާސް ލަބީބު
އެކަން ފާހަގަކުރައްވާ އިލްޔާސް ވިދާޅުވީ ޑރ މުނައްވަރުގެ އިތުރުން ކުރީގެ އެޓާނީ ޖެނެރަލްގެ މަގާމު އަދާކުރެއްވި ބޭފުޅުންވެސް ކަންބޮޑުވުން ފާޅުކޮށްފައިވާއިރު، މިއީ އެ ފަރާތްތަކަށް އިނގިލި ދިއްކުރަންވީ ވަގުތު ނޫންކަމަށެވެ. އަދި މިއީ މި މައްސަލަ މިޔަށްވުރެ ފުޅާކޮށް ބަލާ ތަހުގީގުކުރަން ޖެހޭ ވަގުތުކަމަށް އޭނާ ވިދާޅުވިއެވެ.
އެއާއެކު އިލިޔާސް ވިދާޅުވީ އެ މައްސަލައިގައި މިހާރު ލިބޭ މައުލޫމާތަށް ބަލާއިރު، ސަރުކާރުން ސްޓޭންޑް ބަދަލުކުރުމާއި ގުޅިގެން މޮރިޝަސް އަތުގައި ނެތް ބޮޑު ސަރަހައްދެއް އެމީހުންނަށް ލިބިގެން ގޮސްފައިވާކަމަށެވެ. އަދި ދިވެހިރާއްޖެއިން ބޮޑު ސަރަހައްދެއް ގެއްލިގެން ގޮސްފައިވާކަމަށެވެ.
"އަޅުގަނޑުމެންނަށް މިހާރު ލިބޭ މައުލޫމާތަށް ބަލާއިރު، އަޅުގަނޑުމެންނަށް މި އެނގޭ އެއްޗަކީ މޮރިޝަސްއަތުގައި ނެތް އެއްޗެއް އެމީހުންނަށް ލިބިއްޖެކަން. އެމީހުންނަށް ދީގެން އުޅޭކަން. ރާއްޖެއިން ބޮޑު މާސިންގާ ކްލެއިމްއެއް ކުރެވެން އޮތްކަމެއް، ރާއްޖޭގެ ސަރަހައްދުގެ ބޮޑު މާސިންގާ ތަނެއް، ރާއްޖޭގެ ޓެރިޓަރީގެ ގޮތުގައި އަޅުގަނޑުމެން މިޔޮއް ހުރިހާ ދުވަހު ބަލަމުން އައި ތަނެއް، އަޅުގަނޑުމެންނަށް ކްލެއިމް ކުރެވެން އޮތް ތަނެއް އަޅުގަނޑުމެން އަތުން ބީވެގެން ދާ ވާހަކަ މި އިވެނީ"
ހުޅުދޫ ދާއިރާގެ މެންބަރު އިލްޔާސް ލަބީބު
އިލްޔާސް ވިދާޅުވީ ރައީސުލްޖުމްހޫރިއްޔާގެ ސިޓީފުޅަކުން ސްޓޭންޑް ބަދަލުކޮށްފައިވަނީ ގާނޫނު އަސާސިއާއި ޚިލާފަށްކަމަށެވެ. އަދި ސަރުކާރުން އެފަދައިން އަމަލުކުރި ގޮތް ސާފުކުރުމަށް ހުރިހާ ސިޔާސީ ޕާޓީއެއް ހިމެނޭހެން މަޖިލީހުން ކޮމެޓީއެއް އެކުލަވާލާ މިނިވަން އިންކުއަރީއެއް ހިންގަން ޖެހޭކަމަށެވެ.
ލަސްނުކުރައްވާ އެކަން ކުރެއްވުމަށް އިލްޔާސްގެ ވާހަކައިގައި ވަނީ ގޮވާލައްވާފައެވެ.
Advertisement
This content is created and paid for by advertisers and does not involve Voice Journalists
