ފުލުހުން ތަހުގީގު ކުރަމުންދާ ޖިނާއީ ބޮޑެތި މައްސަލަތަކުގައި ހައްޔަރު ކުރެވޭ މީހުން 3 މަސްދުވަހު ބަންދުގައި ބޭއްތިއްބޭ ގޮތަށް ޤާނޫނަށް ހުށަހެޅި އިސްލާހު ރައްޔިތުންގެ މަޖިލީހުގެ ޖުޑީޝަރީ ކޮމެޓީން ފާސްކޮށްފިއެވެ.

ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ އިހަވަންދޫ ދާއިރާގެ މެންބަރު މުހައްމަދު ޝިފާއުއެވެ. 

އެ ބިލް ހުށަހެޅުމުގެ މަގްސަދެއް ކަމަށް އޭނާ ބަޔާންކޮށްފައި ވަނީ ގާނޫނު ތަންފީޒުކުރުމަށާއި ޖިނާއީ އަދުލުގެ ނިޒާމުގެ އިޖުރާއަތްތައް ހިންގުމުގައި ދިމާވާ ދަތިތައް ހައްލު ކުރުމުގެ އިތުރުން އިއުތިރާފް އެއްބަސްވުން ހެދޭނެ ހާލަތްތަކާއި އެކަން ކުރުމުގައި އަމަލު ކުރާނެ އިޖުރާއަތްތައް އިތުރަށް ތަފްސީލު ކުރުމެވެ.

ހަމައެހެންމެ ހެކިބަސް ދޭ މީހުން ހިމާޔަތްކުރުމާ ގުޅޭ ތަފްސީލީ އުސޫލުތަކެއް ކަނޑައެޅުމަކީ ވެސް އެ ބިލް ހުށަހެޅުމުގެ މަގްސަދުތަކުގެ ތެރޭގައި ހިމެނޭ ކަމެކެވެ.

ޖިނާއީ ބޮޑެތި މައްސަލަތައް ތަހުގީގު ކުރުމަށް ފުލުހުންނަށް ލިބޭ މުއްދަތާއި ދައުވާ ކުރުމަށް ޕްރޮސިކިއުޓާ ޖެނެރަލްއަށް ލިބޭ މުއްދަތު އިތުރުކުރުމަކީ އެ ބިލްގައި އެންމެ ބޮޑު ކަމެއްގެ ގޮތުގައި ހިމަނާފައިވާ ކަމެވެ.

މިހާރު ގާނޫނު އޮންނަގޮތުން ބަންދުގައި ހުންނަ މީހާގެ މައްސަލަ 30 ދުވަސް ތެރޭ ޕީޖީ އޮފީހަށް ފޮނުވަންޖެހެ އެވެ. އެ މުއްދަތަކީ ބޮޑެތި ޖިނާއީ މައްސަލަތައް ތަހުގީގު ކުރަން ބައެއް ފަހަރަށް އެކަށީގެންވާ މުއްދަތެއް ނޫން ކަމަށް ފުލުހުން ފާހަގަކުރެ އެވެ.

ވުމާއެކު ޝިފާއު ހުށަހެޅުއްވި އެ ބިލަށް ގެނައި އެންމެ މުހިމު އިސްލާހަކީ ފުލުހުން ތަހުގީގް ކުރަމުންދާ ޖިނާއީ ބޮޑެތި މައްސަލަތަކުގައި ފުލުހުންގެ ބެލުމުގެ ދަށަށް ގެންދާ މީހާގެ ބަންދާމެދު މިހާރު ގާނޫނުގައި ކަނޑައަޅާފައިވާ މުއްދަތަށް ބަދަލު ގެނައުމެވެ.

އެގޮތުން، މިހާރު ގާނޫނު އޮންނަ ގޮތުން، ފުލުހުންނަށް ޓެރަރިޒަމް މައްސަލަތައް ފިޔަވައި ޖިނާއީ ބޮޑެތި މައްސަލަތަކުގައި ބަންދުގައި ބެހެއްޓޭނީ 75 ދުވަސް ކަމުގައިވީ ނަމަވެސް ޤާނޫނަށް މިހާރު ގެނެސްފައިވާ ބަދަލާއިއެކު 90 ދުވަހަށް އެމީހަކު ބަންދުގައި ބެހެއްޓުމުގެ ފުރުސަތު ފުލުހުންނަށް ލިބިދީފައިވެއެވެ.

އަދި މީގެ އިތުރުން ތަހުގީގުގެ މުއްދަތު 45 ދުވަސް އިތުރު ކުރުމުގެ ބާރު ޕީޖީއަށް ލިބިދޭ ގޮތަށް މިހާރު އޮންނަ އިރު، ޝިފާއު ހުށަހެޅި އިސްލާހުގައި ވަނީ އެ މުއްދަތު 60 ދުވަހަށް ބަދަލު ކުރުމަށެވެ.

ޖިނާއީ އިޖުރާތު ޤާނުނަށް ޝިފާއު ހުށަހެޅުއްވި މި އިސްލާހުތައް ދިރާސާކުރެއްވި ޖުޑީޝަރީ ކޮމެޓީގައި، ފުުލުހުންނާއި، ޕީޖީ އޮފީހާއި، ޖޭއެސްސީގެ އިތުރުން ހިއުމަންރައިޓްސް ކޮމިޝަންގެ މަޝްވަރާ ހޯދާފައިވެއެވެ.

މި ބިލަށް ކޮމެޓީން ހުށަހެޅި އިސްލާހުތަކުގެ ތެރޭގައި ހައިކޯޓަށް ހުށަހެޅޭ ބައެއް މައްސަލަތައް އެންމެ ފަނޑިޔާރަކަށްވެސް ބެލޭނެ ގޮތަށް ވަނީ ބަދަލު ގެނެސްފައެވެ. ކޮމެޓީގެ މިނިންމުމުގައި ބުނެފައިވަނީ ދަށު ކޯޓުން ހުށަހަޅާ ބައެއް މައްސަލަތަކުގައި އެއް ފަނޑިޔާރަށްވެސް މައްސަލައާ މެދު ގޮތެއް ކަނޑައެޅިދާނެ ކަމަށެވެ. އަދި އެފަދަ މައްސަލަތަކުގެ ތެރޭގައި ހިމެނެނީ، ދަށު ކޯޓުގައި ހިނގަމުންދާ ޝަރީއަތުގެ ކުރިން ހުށަހެޅުން ހުށަހަޅާ މަރުހަލާގައި އެ ކޯޓަކުން ނިންމާ ނިންމުންތަކާއި ޝަރީއަތުގެ މަރުހަލާގައި ކޯޓަކުން ނެރެފައިވާ އަމުރެއްގެ އިސްތިއުނާފީ މައްސަލަތައް ކަމަށްވެސް ބުނެފައިވެއެވެ.

ޖިނާއީ އިޖުރާތު ޤާނޫނުގައި ޖިނާއީ ބޮޑު ކުށެއްގެ ގޮތުގައި 11 ކުށެއް ވަނީ މީގެ ކުރިން ކަނޑައަޅާފައެވެ. ޖިނާއީ ބޮޑު ކުށެއްގެ ގޮތުގައި ކަނޑައެޅިފައިވާ ކުށްތަކުގެ ތެރޭގައި ހިމެނެނީ މީހަކު މެރުމުގެ ކުށް، ރޭޕްކުރުމުގެ ކުށް، ކުޑަކުދިންނަށް ޖިންސީ ގޯނާކުރުމުގެ ކުށް، ޓެރަރިޒަމްގެ ކުށްތައް، މަނީ ލޯންޑްރިންގ އަދި ޓެރަރިޒަމަށް ފައިނޭންސްކުރުމުގެ ކުށް، ޓްރެފިކްކުރުމުގެ ކުށް، މަސްތުވާތަކެތި ޓްރެފިކްކުރުމުގެ ކުށް، ލައްކައަކަށްވުރެ މަތީގެ ފައިސާގެ ޢަދަދު ހިމެނޭ ކުށް، ޓެކްސް ދެއްކުމުން އެއްކިބާވުމުގެ ކުށް، އަދި ރިޝްވަތުގެ ކުށާއި ކޮރަޕްޝަންގެ ކުށެވެ.