ހައްދު ފަހަނައަޅާފައިވާ އިސްރާއީލުގެ ޔަހޫދީ ސިފައިން، ފަލަސްޠީނުގެ ހުޅަނގު އައްސޭރީގެ އަވަށެއް ކަމަށްވާ ޖަނީނުގައި ހިންގި އޮޕަރޭޝަނެއްގައި ފަލަސްޠީނުގެ ދެ ޒުވާނުން ޝަހީދުކޮށްލައިފިއެވެ.
މިއަދު ހެނދުނު އިސްރާއީލު ސިފައިން ހިންގި މި އޮޕަރޭޝަން އަކީ މިދިޔަ އަހަރުގައި އެ މީހުންގެ ސިފައިންގެ މީހެއް މަރާލި ފަލަސްތީނުގެ މީހެއް ދިރިއުޅެމުންދާ ގެ ހަލާކުކޮށްލުމަށް ހިންގި އޮޕަރޭޝަނެއް ކަމަށް އިސްރާއީލު ސިފައިންނާއި ހަވާލާދީ ބޭރުގެ މީޑިއާ ތަކުން ރިޕޯޓް ކޮށްފައިވެއެވެ.
މި އޮޕަރޭޝަންގެ ތެރެއިން ޝަހީދު ކޮށްލެވުނު މީހުންގެ ތެރެއިން އެކަކީ 17 އަހަރުގެ ކުއްޖެއް ކަމަށްވާއިރު, އޭނާ ޝަހީދު ކޮށްލެވުނީ ބަޑީގެ ހަމަލާއެއް ދީގެން ކަމަށްވެސް ރިޕޯޓްތައް ބުނެފައިވެއެވެ.
ނިމިދިޔަ 2022 ވަނަ އަހަރަކީ ފަހުގެ ތާރީޚެއްގައި ފަލަސްޠީނުގެ ހުޅަނގު އައްސޭރީގައި އެންމެ އަނިޔާވެރި ލޭ އޮހޮރުވުންތައް ހިނގި އަހަރެވެ. އެގޮތުން، ހިނގައިދިޔަ ލޭ އޮހޮރުވުންތަކުގައި ފަލަސްޠީނުގެ 150 އަށްވުރެ ގިނަ މީހުން ޝަހީދު ކޮށްލެވިފައިވާއިރު, އިސްރާއީލުގެ 20 އަށްވުރެ ގިނަ މީހުން ވަނީ މަރުވެފައެވެ.
ހައްދުފަހަނައަޅާފައިވާ ޔަހޫދީން ފަލަސްތީނުގެ ބިމަށް ގަދަކަމުން ވެރިވެގަތް ދުވަހުން ފެށިގެން، އެމީހުން އަންނަނީ ފަލަސްޠީނުގެ މުސްލިމުންނާއިމެދު ލާއިންސާނީ އެތައް ޖަރީމާތަކެއް ހިންގަމުންނެވެ. ޚާއްސަކޮށް ފަލަސްޠީނުގެ ހުޅަނގު އައްސޭރީގައި ޔަހޫދީން އެމީހުންގެ ސަރަހައްދު އިތުރު ކުރުމަށް ބިންފޭރުމުގެ އަމަލު ތަކުގައި، އެތަކެއް މުސްލިމުން ޝަހީދުކޮށް އެތަށް ގެތަކެއް ވަނީ ސުންނާފަތި ކޮށްލާފައެވެ.
Advertisement
This content is created and paid for by advertisers and does not involve Voice Journalists
