ފާއިތުވެދިޔަ ޑިސެމްބަރު މަހު އުރީދޫއިން ހޯދި ޚިދުމަތް ތަކުގެ ބިލް %6 ޖީއެސްޓީ ލައިގެން ހަދާފައިވާ ސަބަބު އެ ކުންފުނިން ހާމަކޮށްފިއެވެ. 

ޓެކްސް ގެ ގާނޫނަށް ގެނެވުނު ބަދަލު ތަކާއި އެެކު، މި ޖަނަވަރީ މަހުގެ އެއްވަނަ ދުވަހުން ފެށިގެން މުދަލާއި ޚިދުމަތުގެ އަގުން ނަގާމުންދާ ޓެކްސްގެ އިންސައްތަ ވަނީ ބޮޑު ކޮށްފައެވެ. 

އެގޮތުން، ޖީއެސްޓީ %6 އިން %8 އަށް ބޮޑު ކޮށްފައިވާއިރު ޓީޖީއެސްޓީ ވަނީ %12 އިން %16 އަށް ބޮޑުކޮށްފައެވެ. 

ޓެކްސް ގެ ރޭޓަށް މި ގެނެވުނު ބަދަލާއި އެކު، ފާއިތުވި ޑިސެމްބަރު މަހުގެ ބިލްތަކުގައިވެސް ބައެއް ކުންފުނި ތަކުން ޖީއެސްޓީ އަށް %8 ނަގާފައިވާ ކަމަށް ބުނެ އާއްމުން ވަނީ ޝަކުވާ ކޮށްފައެވެ. 

އެގޮތުން، ޓެލެކޮމިއުނިކޭޝަން ޚިދުމަތް ދޭ ކުންފުންޏެއް ކަމަށްވާ ދިރާގުން ޑިސެމްބަރު މަހުގެ ބިލު %8 ޖީއެސްޓީ ލައިގެން ހަދާފައިވާ ކަމަށް ބުނެ އެއްބަޔަކު ފާޑުކިޔާފައިވާއިރު، އުރީދޫގެ ޑިސެމްބަރު މަހުގެ ބިލު %6 ޖީއެސްޓީ ލައިގެން ހަދާފައިވާތީވެސް ބަޔަކު ވަނީ އެކަމަށް ފާޑުކިޔާފައެވެ. އަދި ޖަނަވަރީ މަހުގެ އެއް ވަނަ ދުވަހުން ފެށިގެން ޖީއެސްޓީ ބޮޑުކޮށްފައި ވަނިކޮށް އުރީދޫއިން %6 ޖީއެސްޓީ ލައިގެން ބިލު ހަދާފައިވަނީ ރަނގަޅަށް ނޫން ކަމަށް ވެސް ބައެއް މީހުންވަނީ ބުނެފައެވެ. 

މިކަމާއި ގުޅިގެން، ވޮއިސް އިން ކުރި ސުވާލަކަށް ޖަވާބު ދެއްވަމުން އުރީދޫ މޯލްޑިވްސް ޗީފް ކޮމާޝަލް އޮފިސަރ، ހުސެން ނިޔާޒް ވިދާޅުވީ، ފާއިތުވި ޑިސެމްބަރު މަހު ހޯދާފައިވާ ޚިދުމަތް ތަކުން ޖީއެސްޓީ އަށް ނަގަންޖެހެނީ %6 ކަމަށެވެ. އެހެންކަމުން، އެފަދައިން ޖީއެސްޓީ ނެގުމަށްޓަކައި އުރީދޫގެ ބިލުތައް ޖެނެރޭޓް ކޮށްފައިވާނީ ޑިސެމްބަރު މަހުގެ 31 ވަނަ ދުވަހުގައި ކަމަށެވެ. އެހެން ނަމަވެސް، ޖަނަވަރީ 1 ވަނަ ދުވަހުން ފެށިގެން ޖެނެރޭޓް ކުރާ ބިލުތަކުގައި %8 ޖީއެސްޓީ ހިމެނޭކަމަށް ވެސް އޭނާ ވިދާޅުވި އެވެ.

"31 ޑިސެމްބަރު 2022 ގެ ކުރިން ބޭނުން ކޮށްފައިވާ ޙިދުމަތްތަކަށް ގަވައިދާ އެއްގޮތުގެ މަތިން ޖީއެސްޓީ ގެ ގޮތުގައި %6 ޗާޖުކުރުމުގެ ގޮތުން، ޑިސެމްބަރު 2022 ގެ ބިލް އަޅުގަނޑުމެން ޖެނެރޭޓް ކޮށްފައިވަނީ 31 ޑިސެމްބަރު 2022 ގައި. އެހެން ނަމަވެސް ސަރުކާރުން ޖީއެސްޓީ ގަވައިދަށް ގެނައި ބަދަލާ އެއްގޮތުގެ މަތިން 1 ޖެނުއަރީ 2023 ގެ ފަހުން ޖެނެރޭޓް ކުރާ ބިލް ތަކުގައި %8 ޖީއެސްޓީ ހިމެނޭނެ." އުރީދޫއިން ޑިސެމްބަރު މަހުގެ ބިލުގައި %6 ޖީއެސްޓީ ހިމެނި ސަބަބު ހާމަކޮށްދެއްވަމުން އުރީދޫ މޯލްޑިވްސް ޗީފް ކޮމާޝަލް އޮފިސަރ، ހުސެން ނިޔާޒް ވިދާޅުވިއެވެ.