މާލޭ ނީލަން ފިހާރާގައި މިއަދު ހިނގި އަލިފާނުގެ ހާދިސާއާ ގުޅިގެން ބަސް ރޫޓަށް ބަދަލު ގެނެސްފައިވާ ކަމަށް އެމްޓީސީސީން ބުނެފި އެވެ.

މިއަދު ފަތިހު ގާތްގަނޑަކަށް 5:45 ހާއިރު ނީލަން ފިހާރާގައި ހިނގި އަލިފާނުގެ ހާދިސާގައި އެ ސަރަހައްދުގައި ހުރި ދެ އެކޮމޮޑޭޝަން ބްލޮކެއް ވަނީ އަނދާފައެވެ. އެ އަލިފާންގަނޑު މިހާރު ކޮންޓްރޯލް ކުރެވިފައިވީ ނަމަވެސް ފުލުހުންނާއި އެމްއެންޑީއެފުން އަންނަނީ އެ ސަރަހައްދުގައި ހަރަކާތްތެރިވަމުންނެވެ. 

މި ސަރަހައްދަކީ ވެސްޓްޕާކު ރޫޓުން ދަތުރުކުރާ މާލެ-ހުޅުމާލެ ބަހުގެ ބަސް ސްޓޮޕެއް ވެސް ހިމެނޭ ސަރަހައްދެވެ.

މިކަމާއި ގުޅިގެން އެމްޓީސީސީން ބުނީ އަލިފާނުގެ ހާދިސާ އާ ގުޅިގެން ބޮޑުތަކުރުފާނު މަގުން ބައެއް ބަންދުކޮށްފައިވާތީ އާރުޓީއެލް ބަހުގެ ރޫޓް 1 (މާލެ - ހުޅުމާލެ ފޭސް1) އަދި ރޫޓް 7 (މާލެ - ހުޅުމާލެ ފޭސް2)ގެ ބަހުގެ ހިދުމަތް ވަގުތީ ގޮތުން ކާނިވާ ސަރަހައްދަށް ބަދަލުކޮށްފައިވާ ކަމަށެވެ.

އޭގެ އިތުރުން އަމީނީ މަގުގެ ބަސް ރޫޓުގެ ހިދުމަތް ވަގުތީ ގޮތުން މެދުކަނޑާލާފައިވާއިރު މި ރޫޓް މެދުކަނޑާލުމުން އޯކިޑް ރޫޓު ބޭނުންކުރާ ފަސިންޖަރުން އިތުރުވާނެތީ އޯކިޑް ރޫޓުގެ ބަސް ދަތުރުތައް އިތުރުކޮށްފައިވާ ކަމަށްވެސް ބުނެފައިވެއެވެ. 

ނީގެ އިތުރުން އެމްޓީސީސީން ބުނީ ބޮޑުތަކުރުފާނު މަގު ހުޅުވުމުން ބަސް ރޫޓު އާންމު ހާލަތަކަށް ބަދަލުކުރާނެކަމަށެވެ. 

މިއަދުގެ އަލިފާނުގެ ހާދިސާއާއި ގުޅިގެން މާލޭ ސިޓީ ކައުންސިލްގެ 166 ބިދޭސީ މުވައްޒަފުން ވަނީ އިމާދުއްދީން ސުކޫލުގައި ގާއިމްކޮށްފައިވާ ވަގުތީ ބޯހިޔާވައްސަށް ބަދަލުކޮށްފައެވެ. އަދި އެ މުވައްޒަފުންނަށް ބޭނުންވާ ކަންކަން ފުރިހަމަކޮށްދިނުމުގެ މަސައްކަތް މާލޭ ސިޓީ ކައުންސިލުން ގެންދަނީ ކުރަމުންނެވެ.