ސަރުކާރު ބަދަލުވާ ކޮންމެ ފަހަރަކު ފުލުހުން ލީޑަރޝިޕުން ބޭފުޅުން މުއައްސަސާ ދޫކޮށް ދާންޖެހުމުގެ ސަޤާފަތެއް މީގެ ކުރިން އޮތް ކަމަށާ ނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މަސައްކަތްޕުޅުން، ލީޑަރޝިޕް ހަރުދަނާވެ ބަދަހިވެފައިވާ ކަމަށް ހޯމް މިނިސްޓަރު ޢިމްރާން ވިދާޅުވެއްޖެއެވެ. 

އައްޑޫ ސިޓީގައި ޤާއިމުކޮށްފައިވާ ފުލުހުން ތަމްރީންކުރާ މަރުކަޒުގައި ހިންގި ފުރަތަމަ އަސާސީ ތަމްރީން ޕްރޮގްރާމުގެ ނިމުން ފާހަގަކުރުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން އިމްރާން ވިދާޅުވީ، ފުލުހުންގެ ޚިދުމަތް މަދަނީ މުއައްސަސާއަކަށް ބަދަލުވެ މިވީ 18 އަހަރުގެ ތެރޭގައި، މިހާރު މިދެކޭ ފަދަ ބޮޑު ކުރިއެރުމެއް ފުލުހުންގެ ޚިދުމަތަށް އައިސްފައި ނުވާކަމަށެވެ.

އަދި ރައީސް ޞާލިހު ވެރިކަމަށް ވަޑައިގެންނެވި އިރު، ދިވެހި ފުލުހުންގެ ޚިދުމަތުގެ އިންސާނީ ވަސީލަތާއި އުމްރާނީ ވަސީލަތުގެ ޙާލަތު އޮތީ ވަރަށް ދަށްކޮށްކަމަށެވެ. އެގޮތުން އެކަށީގެންވާ މިންވަރާ ގާތަށްވެސް އިންސާނީ ވަސީލަތް ޤާއިމުވެފައި ނުވާއިރު، ޕޮލިސް އަތޮޅު ތެރޭގައި ހުރި ސްޓޭޝަންތަކުގެ އަދަދު މަދުކަންވެސް އިމްރާން ފާހަގަކުރެއްވިއެވެ.  

Advertisement

ނަމަވެސް ރައީސް ޞާލިޙުގެ ވިސްނުންފުޅާއެކު ރާއްޖޭގެ ހުރިހާ ރަށެއްގައި ޕޮލިސް ޑެސްކުގެ ޚިދުމަތް ފަށައި، އަތޮޅުތަކުގެ 61 ރަށުގައި ޕޮލިސް ސްޓޭޝަން ޤާއިމުކުރަން ސަރުކާރުން ނިންމާފައިވާ ކަމަށްވެސް އިމްރާން ވިދާޅުވިއެވެ. 

"ފުލުހުންގެ ޚިދުމަތް ފުޅާކުރުމަށް ރައީސް ފައްޓަވާފައިވާ ބޮޑު މަސައްކަތަކުގައި، ފުލުހުންގެ ޚިދުމަތަށް ހުނަރުވެރި ޤާބިލު މުވައްޒަފުން އިތުރުކުރެވިއްޖެ. ޔުނީފޯމް އެޅި މުވައްޒަފުންނާ، ސިވިލް މުވައްޒަފުންން ހިމެނޭހެން 1000 އާއި ގާތްކުރާ އަދަދަކަށް މުވައްޒަފުން އިތުރުކުރެވިއްޖެ." މިނިސްޓަރ ޢިމްރާން ވިދާޅުވިއެވެ.

މީގެ އިތުރުން ފުލުހުންގެ ލީޑަރޝިޕް ހަރުދަނާކުރެވި ފުލުހުންގެ ސަފުތަކަކީ އެއީ ހަރުދަނާ ބަދަހި ސަފަކަށް ހެދިއްޖެކަމަށްވެސް މިނިސްޓަރ ވިދާޅުވިއެވެ.
"ސަރުކާރު ބަދަލުވާ ކޮންމެ ފަހަރަކު ފުލުހުން ލީޑަރޝިޕުން 10،12 ބޭފުޅުން މުއައްސަސާ ދޫކޮށް ދާންޖެހުމުގެ ސަޤާފަތެއް އޮތް. ލީޑަރޝިޕް އޮތީ ނިކަމެތިކޮށް. އެހެން އޮއްވާ ރައީސް އިބްރާހީމް މުޙައްމަދު ޞާލިޙުގެ މަސައްކަތްޕުޅުން، ލީޑަރޝިޕް ހަރުދަނާވެ ބަދަހިވެއްޖެ" މިނިސްޓަރ ވިދާޅުވިއެވެ.