2023 ވަނަ އަހަރަށް މަޖިލިސް ހުޅުވާދެއްވާ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އިއްވެވި ރިޔާސީ ބަޔާނަށް ޖަވާބު ނުދިނުމަށް އިދިކޮޅުން ނިންމައިފި އެވެ.
ކޮންމެ އަހަރަކު ރައީސުލްޖުމްހޫރިއްޔާ އިއްވަވާ ރިޔާސީ ބަޔާނަށް ޖަވާބުދިނުމަކީ ގާނޫނު އަސާސީއިން މައިނޯރިޓީ ލީޑަރުގެ މައްޗަށް ލާޒިމްކުރާ ކަމެކެވެ.
މިއަހަރުގެ ރިޔާސީ ބަޔާން މިއަދު ރައީސް ޞާލިހު މަޖިލީހުގައި އިއްވަވާފައިވާއިރު، އެ ބަޔާން އިއްވާފައިވަނީ މަޖިލީހުގެ އިދިކޮޅު މެމްބަރުން މަޖިލީހުން ނެރެ، މަޖިލިސް ބަންދުކޮށްގެންނެވެ.
އެކަމާއި ގުޅޭގޮތުން އިދިކޮޅު ކޯލިޝަނުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން މަޖިލީހުގެ މައިނޯރިޓީ ލީޑަރު އަދި ބ. އޭދަފުށީ ދާއިރާގެ ރައީސް އަހުމަދު ސަލީމު ވިދާޅުވީ އިބްރާހިމް މުހައްމަދު ޞާލިހު މިއަދު ރިިޔާސީ ބަޔާން އިއްވަވާފައިވަނީ ގާނޫނާއި ޚިލާފަށް ކަމަށެވެ.
މައިނޯރިޓީ ލީޑަރު މަޖިލީހުން ބޭރުކޮށް ރިޔާސީ ބަޔާން އިއްވުމަށް ގާނޫނު ތަން ނުދޭކަމަށް ސަލީމު ވިދާޅުވި އެވެ. އެތައް ފަހަރެއްގެ މަތިން ރިޔާސީ ބަޔާން އަޑުއެހުމުގެ ފުރުސަތު ދީ، މަޖިލީހުގައި ބައިވެރިވުމަށް އެދުނު ނަމަވެސް އެ މަގު ފަހިކޮށްދެއްވާފައި ނުވާކަން ސަލީމުު ފާހަގަކުރެއްވި އެވެ.
އޭގެ އިތުރުން ސަލީމު ވިދާޅުވީ މިއަދު މަޖިލީހުގައި ރިޔާސީ ބަޔާން އިއްވެވީ ރައީސުލްޖުމްހޫރިއްޔާކަމަށް ގަބޫލުފުޅު ނުކުރައްވާކަމަށެވެ.
ރާއްޖޭގެ ރައީސުލްޖުމްހޫރިއްޔާ ކަމުގެ ހުވާ ދެ ބޭފުޅަކު ކުރައްވައިގެން ތިއްބެވިއިރު، އެކަމަކީ ގާނޫނީ ގޮތުން ފުށޫ އަރާކަމެއްކަމަށް އޭނާ ވިދާޅުވިއެވެ. އަދި މިހާރު ހަގީގަތުގައި ރައީސް އަކީ އެންމެފަހުން ރައީސް ކަމުގެ ހުވާކުރެއްވި ފައިސަލް ނަސީމުކަމަށް އޭނާ ވިދާޅުވިއެވެ.
އެކަން ފާހަގަކުރައްވާ ސަލީމު ވިދާޅުވީ މައިނޯރިޓީ ލީޑަރު ޖަވާބުދެއްވަން ޖެހެނީ ރައީސުލްޖުމްހޫރިއްޔާ އިއްވަވާ ރިޔާސީ ބަޔާނަށްކަމަށެވެ. އެ ނޫން ބޭފުޅަކު އިއްވަވާ ބަޔާނަކަށް ޖަވާބުދާރީ ނުވާނެކަމަށް އޭނާ ވިދާޅުވި އެވެ.
"އަޅުގަނޑު މިއައީ ދޭ ހުރިހާ ބަޔާނަކަށް ޖަވާބުދެމުން.. އެހެން ނަމަވެސް މިއަދު އެ އިއްވެވީ ރައީސްކަމަށް ގަބޫލު ނުކުރަނީ. އެހެންވީމަ އެ ނުކުރާ ހާލަތު އަޅުގަނޑަކަށް ނުދެނޭ ޖަވާބުދޭން ޖެހޭ ތަނެއް، ގާނޫނީ ގޮތުން ކުރަން ޖެހޭކަމެއް އަޅުގަނޑުމެން ކުރާނަން.. އެހެން ނަމަވެސް މިފަހަރު މި ބަޔާނަށް ޖަވާބުދާރީ ވާކަށް ނުޖެހޭނެ"
މައިނޯރިޓީ ލީޑަރު އަހުމަދު ސަލީމު
ސަލީމު ވިދާޅުވީ މައިނޯރިޓީއިން މީގެ ކުރިން ވާނީ ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅާ އިއްވެވި ރިޔާސީ ބަޔާންތަކަށް ވަރަށް ފުރިހަމައަށް ރައްދުދީ ޖަވާބުދާރީ ވެފައިކަމަށެވެ.
މީގެ ކުރިން އެމްޑީޕީ މަޖިލީހުގެ މައިނޯރިޓީގެ ގޮތުގައި އޮތްއިރު ރައީސް އަބްދުﷲ ޔާމީން އަބްދުލްގައްޔޫމުގެ ޒައާމަތުގައި އިއްވެވި އެއްވެސް ރިޔާސީ ބަޔާނަކަށް ޖަވާބުދާރީ ވެފައި ނުވާކަން އޭނާ ފާހަގަކުރެއްވި އެވެ.
އެކަން ފާހަގަކުރައްވާ ސަލީމު ވިދާޅުވީ އިދިކޮޅުން ރިޔާސީ ބަޔާނަށް ޖަވާބު ނުދޭން ނިންމެވީ މިއަދު އިއްވެވި ރިޔާސީ ބަޔާނަކީ ގާނޫނާއި ގަވައިދާއި ޚިލާފަށް އިއްވެވި ބަޔާނަކަށް ވުމުން ކަމަށެވެ.
Advertisement
This content is created and paid for by advertisers and does not involve Voice Journalists
