ބޭރު ގައުމުތަކަށް ދަތުރުކުރާ ދިވެހިންނަށް ރައްކާތެރިކަން ކަށަވަރުކޮށްދިނުމަށް ގޮވައިލައި ޕީޕީއެމްގެ ނައިބުރައީސް އަދި ރައްޔިތުންގެ މަޖިލީހުގެ ނައިފަރު ދާއިރާގެ މެންބަރު އަޙްމަދު ޝިޔާމް ރައްޔިތުންގެ މަޖިލީހަށް ހުށަހެޅުއްވި ކުއްލި މައްސަލަ މަޖިލީހުން ބަލައި ނުގަނެ ބޭރުކޮށްލައިފިއެވެ.

ޝިޔާމް ހުށަހެޅުއްވި މައްސަލައިގައި ބުނެފައިވާ ގޮތުގައި ރާއްޖޭގެ ގާނޫނު އަސާސީގެ ދަށުން ލިބޭ ހިޔާލު ފާޅުކުުރުމުގެ މިނިވަންކަމުގެ ދަށުން ރާއްޖޭގައި އޮންނަ ސިޔާދަތާ ގުޅޭ ގޮތުން ކުރާ ފާޅުކުރާ ހިޔާލަކާ ގުޅިގެން ބޭރު ގައުމުތަކުން ފިޔަވަޅު އެޅުމުން ކަންބޮޑުވާ ކަމަށެވެ. އަދި އެގޮތަށް ފިޔަވަޅުތައް އަޅާ އިރު ދިވެހީންގެ ހައްގުތަށް ކަށަވަރުކުރަން ސަރުކާރުން މަސައްކަތް ކުރަން ޖެހޭނެކަމަށާ، އެއީ ގާނޫނު އަސާސީ ދިވެހި ދައުލަތުގެ މައްޗަށް މަތިކޮށްފައިވާ ޒިންމާއެއް ކަމަށްވެސް ވިދާޅުވިއެވެ.

މީގެ އިތުރުން އެގޮތަށް ބޭރު ގައުމުތަކުން ދިވެހީންނާމެދު ފިޔަވަޅު އަޅަން ފަށައިފިނަމަ ރާއްޖޭގައި އުޅޭ އެފަދަ ގައުމުތަކުގެ މީހުންނާ މެދު ނަފްތަރު އުފެދި ޖަޒުބާތުގައި ޖެހި ހިނގަން ނުވާ ކަންކަން ހިނގާފާނެ ކަމަށެވެ.

އެހެންކަމުން ޝިޔާމްގެ އެ މައްސަލައިގައި ގޮވާލާފައިވަނީ އެފަދަ މައްސަލަތަކުގައި ޑިޕްލޮމަޓިކް އުސޫލުތައް މެދުވެރިކޮށް އެކަށީގެންވާ ފިޔަވަޅުތަކެއް އެޅުމަށެވެ.

މިއަދުގެ ރައްޔިތުންގެ މަޖިލިސް ޖަލްސާގައި މި މައްސަލަ ބަލައިގަތުމާ މެދު ނެގި ވޯޓުގައި އެ މައްސަލަ ބަލައިގަންނަން ވޮޓު ދިނީ ވޯޓުގައި ބައިވެރިވި 45 މެންބަރުންގެ ތެރެއިން 6 މެންބަރެކެވެ. އެ މައްސަލަ ބަލައި ނުގަތުމަށް 39 މެންބަރަކު ވޯޓު ދީފައިވެއެވެ.

މި މައްސަލަ ސިޔާމު ހުށަހެޅުއްވީ އިންޑިއާގައި ހުއްޓާ ޕީޕީއެމްގެ ހުޅުމާލޭ ދާއިރާގެ ރައީސް އަބްދުއްސަމަދު ޑީޕޯޓް ކޮށްލާފައިވަނި ކޮށެވެ. އަބްދުއްސަމަދަކީ އިދިކޮޅު ޕީޕީއެމް-ޕީއެންސީ ކޯލިޝަނުން ހިންގާ އިންޑިއާ އައުޓް ކެމްޕޭނުތަކާއި މުޒާހަރާތަކުގައި އިސްކޮށް ހަރަކާތްތެރިވެ އިންޑިއާއާ ދެކޮޅަށް އަޑު އުފުލާ ބޭފުޅެކެވެ. އަދި ބައެއް މުޒާހަރާތަކުގައި ފުލުހުން ވަނީ އޭނާ ހައްޔަރުވެސް ކޮށްފަ އެވެ.