ސ. މަރަދޫފޭދޫ، ގަސްކަރަ، މުހައްމަދް އާސިރް އިސްމާއިލް ގެއްލުނު މައްސަލަ އާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުނެފިއެވެ. 

ފެބުރުއަރީ 04 ވަނަ ދުވަހުން 19:30 ހާއިރުންފެށިގެން އާސިރު ގެއްލިފައިވާކަމަށް ފުލުހުންނަށް ރިޕޯޓްކޮށްފައިވަނީ 5 ފެބްރުއަރީ 2023 ގައެވެ. އޭގެ ފަހުން އޭނާ ހޯދުމުގެ މަސައްކަތް ފުލުހުން ކުރި އިރު, އޭނާ އެއާޕޯޓަށް ގޮސް އެއާޕޯޓު ޓާމިނަލަށް ވަންނަކަން ފުލުހުންގެ ސީސީޓީވީ އިން ލިބިފައިވާ ފުޓޭޖްތައް އެނަލައިޒް ކޮށްގެން ހޯދިފައިވާ ކަމަށް މީގެ ކުރިން ފުލުހުން ބުނެފައިވެއެވެ. 

ނަމަވެސް އާސިރު އެއާޕޯޓަށް ވަތް ސަހަރަހައްދުގައި އިތުރު ކެމެރާއެއް ނެތުމުން، ދެން ދިޔަ ހިސާބެއް މިހާތަނަށް ދެނެގަނެވިފައެއްނުވާ ކަމަށް ފުލުހުން ބުންޏެވެ. އެހެންކަމުން، އާސިރު ހޯދުމަށް އެއާޕޯޓް ފަޅުގައިހުރި ހުރިހާ އޮޑިދޯނިފަހަރާއި ލޯންޗްތައް ބަލައި އެ ސަރަހައްދުގައި އާންމުކޮށް އުޅޭ މީހުންނަށް އާސިރުގެ ފޮޓޯ ދައްކައިގެން އެމީހުންނަށް ފެނިފައިވޭތޯ ބަލައި އަދި އެއާޕޯޓްގެ އެކި ސަރަހައްދުތައް ބަލައިފާސްކުރުމުގެ އިތުރުން އެއްވެސް ބުކިންގއެއް ހަދާފައިވޭތޯ ބަލާފައިވާނެ ކަމަށް ވެސް ފުލުހުން މިމަހު 16 ވަނަ ދުވަހު ނެރެފައިވާ ބަޔާނެއްގައި ބުނެފައިވެއެވެ. 

Advertisement

އެއަށްފަހު އެރޭ ހޯމް މިނިސްޓަރު ޢިމްރާން ކުރެއްވި ޓްވީޓެއްގައި އޭނާ ވަނީ އާސިރު އެ ރޭ (16 ފެބްރުއަރީ) ގައި ފެނިފައިވާ ކަމަށް ބުނެ ފުލުހުން ކުރި މަސައްކަތަށް ޝުކުރު އަދާކުރައްވާފައެވެ. 

މި މައްސަލައާއި ގުޅިގެން އިތުރަށް މައުލޫމާތު ދެއްވަމުން ފުލުހުން މިއަދު ބުނީ، އާސިރު ފެނިފައިވަނީ އެއާޕޯޓް ޓާމިނަލް ތެރެއިން ކަމަށާ، އެކަމާއި ގުޅިގެން އިތުރަށް ބަލަންޖެހޭ ކަންކަން ބަލަމުން އަންނަ ކަމަށެވެ.