ހެލްމެޓް އަޅަން ނުޖެހޭ ތަންތަނުގައި ހެލްމެޓް އަޅައިގެން އުޅޭނަމަ ހުއްޓުވައި، ފާސްކުރާނެކަމުގެ އިންޒާރު ފުލުހުން ދީފިއެވެ.
ފަހަކަށް އައިސް މާލޭގައި ހިންގާ ގްރޫޕް މާރާމާރީތަކުގައި ބައިވެރިވާ މީހުން ހެލްމެޓް އަޅައި، މޫނު އެއްކޮށް ނިވާކޮށްގެން ތިބޭ މައްސަލަތައް ވަނީ އިތުރުވެފައެވެ.
އަދި ދާދިފަހުން، ހެލްމެޓް އަޅައިގެން ހުޅުމާލޭގައި ހުން ކެފޭ އަކަށް ވަދެ އެތަން ހަލާކުކޮށް ސުންނާފަތި ކޮށްލި މައްސަލައެއްވެސް ވަނީ ފެންމަތިވެފައެވެ.
އެފަދައިން ހެލްމެޓް އެޅުމުގެ ސަބަބުން ކުށް ކުރާ މީހުން ހޯދަން ފުލުހުންނަށް ދަތިވެ، މާރާމާރީތަކާއި ކުށް ތައް ހުއްޓުވުން ފުލުހުންނަށް ވަނީ ދަތިވެފައެވެ.
އެކަމާއި ގުޅިގެން، ފުލުހުން ނެރުނު ބަޔާނެއްގައި ބުނީ ހެލްމެޓް އެޅުން ގާނޫނު ތަކުން ލާޒިމްކުރާ ސަރަހައްދުތައް ފިޔަވައި އެހެނިހެން ސަރަހައްދުތަކުގައި ކުށްކުރުމުގެ ނިޔަތުގައި ހެލްމެޓް އަޅައިގެން އުޅޭކަން އެ އިދާރާއަށް ފާހަގަކުރެވިފައިވާ ކަމަށެވެ.
އެހެންކަމުން، ހެލްމެޓް އެޅުން ލާޒިމް ކުރާ ސަރަހައްދުތައް ފިޔަވައި އެހެން ސަރަހައްދު ތަކުގައި ހެލްމެޓް އަޅައިގެން އެއްގަމު އުޅަނދު ދުއްވާ މީހުންނާއިމެދު ފުލުހުން ފާރަވެރިވެ، ތުހުމަތު ކުރެވޭ މީހުން ހުއްޓުވައި، ބަލައި ފާސްކުރަމުން ގެންދާނެ ކަމަށްވެސް ބުނެފައިވެއެވެ.
އަދި އެއީ އެންމެހައި ރައްޔިތުންގެ ރައްކާތެރިކަމާއި އަމާންކަމަށްޓަކައި އަޅާ ފިޔަވަޅެއް ކަމުގައިވެސް ފުލުހުން ބުނެފައި ވެއެވެ.
Advertisement
This content is created and paid for by advertisers and does not involve Voice Journalists
