އިދިކޮޅު ގެ އަމާޒަކީ ތިމާމެން ނޫން އެހެން ބަޔަކު ވެރިކަމުގައި ތިބިއްޔާ ޤައުމު ފަނާކޮށްލަން މަސައްކަތް ކުރުން ކަމަށް މަރަދޫ ދާއިރާގެ މެމްބަރު  އިބްރާހިމް ޝަރީފް (މަވޯޓާ) ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޝަރީފް ވިދާޅުވެފައިވަނީ ބިނާ ކުރުވަނިވި ފާޑުކިޔުމަށް މަރުހަބާ ކިޔަން ވާނެ ކަމަށާއި ސަރުކާރު ޖަވާބުދާރީ ކުރުވުމަށް މަސައްކަތް ކުރުމާއި ކަންކަން އިސްލާހު ކުރުމަށް މަސައްކަތް ކުރުމަކީ ހަމަ އެންމެ ރަނގަޅު ކަމެއް ކަމަށެވެ.

Advertisement

އެހެން ނަމަވެސް އިދިކޮޅުން ކުރާ ކަމަކީ ކަމެއް ރަނގަޅު ކުރުމުގެ ނިޔަތުގައި ކުރާ ކަމެއް ނޫން ކަމަށް ޝަރީފް ވިދާޅުވެފައި ވެއެވެ. އަދި އެއީ ތަން ފަސާދަ ކުރަން ހިންގާ ހަރަކާތް ތަކެއް ކަމަށް ޝަރީފް ވިދާޅުވެފައިވެއެވެ.

މީގެ އިތުރުން ޝަރީފް ވިދާޅުވީ ފިތުނަ ފަސާދަ އުފެއްދުމަށް މަސައްކަތް ކުރުމާއި ޤައުމު ބައި ބައި ކުރުމަށް ހިންގޭ ހަރަކާތްތަކަކީ ކަންކަން އިސްލާހު ކުރުމުގެ ނިޔަތެއެއް އޮވެގެން ކުރާ ކަންކަމެއް ނޫން ކަމަށެވެ.

"އިދިކޮޅުގެ އަމާޒަކަށް ވެފަ މިހާރު މިއޮތީ ތިމާމެން ނޫން ބަޔަކު ވެރިކަމުގައި ތިބިއްޔާ ޤައުމު ފަނާ ކޮށްލެވޭތޯ އުޅުން" ޝަރީފް ވިދާޅުވިއެވެ.

މި ދުވަސް ވަރަކީ ރިޔާސީ އިންތިޚާބު ގާތްވަމުންދާ ދުވަސް ވަރު ކަމުން ސިޔާސީ ފަރާތްތަކުން އެއްބަޔަކު އަނެއްބަޔަކަށް ރައްދުކޮށް މިފަދަ ބަސްތައް ބުނުން ގިނަވެފައިވެއެވެ. އިންތިޚާބު ގާތްވަމުން އަންނައިރު ސިޔާސީ މައިދާނުގައި އަންނަނީ ފޯރި ގަދަވަމުންނެވެ.

އެމްޑީޕީ ގެ ފަރާތުން  މިހާރުގެ ރައީސް އިބްރާހިމް މުޙައްމަދު ޞާލިޙް ވާދަކުރައްވާއިރު ޢަދާލަތާއި ސަން ސިޔާމްގެ އެމްޑީއޭ އޮތީ ރައީސް ޞާލިޙާއި އެކު ކޯލިޝަން ހެދުމަށް ނިންމާފައެވެ.

އިދިކޮޅު ޕީޕީއެމް ޕީއެންސީ ކޯލިޝަނުން ވަނީ ރައީސް ޢަބްދުالله ޔާމީން ޢަބްދުލް ޤައްޔޫމް އަށް ޓިކެޓް ދީފައެވެ. ނަމަވެސް ފާހަގަ ކޮށްލަން ޖެހޭ ކަމަކީ އެމަނިކުފާނު މިވަގުތު ހުންނެވީ 11 އަހަރުގެ ޖަލު ޙުކުމެއް ގައި ޖަލުގައި ކަމަވެ. ކޯލިޝަނާއި އެމަނިކުފާނުގެ ވަކީލުން ދަނީ އެމަނިކުފާނު އިންތިޚާބުގެ ކުރިން މިނިވަން ކުރުމަށް އެތައް މަސައްކަތް ތަކެއް ކުރަމުންނެވެ.

ދަނގެތީ ދާއިރާގެ މެމްބަރު މުހައްމަދް ނާޒިމް (ކާނަލް) އިސްވެ ހުންނަވައި ހިންގަވާ ޕާޓީ އެމްއެންޕީ އިން ކެނޑިޑޭޓެއްގެ ގޮތުގައި މުހައްމަދް ނާޒިމް ނެރުމަށް ވަނީ ނިންމާފައެވެ. ޖުމްހޫރީ ޕާޓީ އިން ރިޔާސީ އިންތިޚާބުގައި ކަންކުރާނެ ގޮތެއް އަދި އިޢްލާނު ކޮށްފައެއް ނުވެއެވެ.

މީގެ އިތުރުން އަމިއްލަ ގޮތުން އިންތިޚާބުގައި ވާދަކުރުމަށް ކުރީގެ ހޯމް މިނިސްޓަރ ކަން ކުރެއްވި ޢުމަރު ނަސީރު ދަނީ ކެމްޕޭނު ކުރައްވަމުންނެވެ. އަދި ކުރީގެ ބަންޑާރަނައިބު މުހައްމަދު މުނައްވަރުވެސް ދަނީ ކެމްޕޭނު ކުރައްވަމުންނެވެ.