ޅ. ނައިފަރުގައި ގާއިމް ކޮށްފައިވާ ފެނާއި ނަރުދަމާގެ ނިޒާމުގައި ހުރި މައްސަލަތައް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަމާލުކަމަށް އަތުވެއްޖެ ނަމަ ހަމަ ޔަގީނުންވެސް އެމަނިކުފާނު ކީރިތި ކުރައްވާނެ ކަމަށް މާވަށު ދާއިރާގެ މެންބަރު މުހައްމަދު ސަޢީދު ވިދާޅުވެއްޖެއެވެ.
މިއަދު ރައްޔިތުންގެ މަޖިލީހުގެ ޖަލްސާގައި ވަނީ ނައިފަރުގައި ގާއިމް ކޮށްފައިވާ ފެނާއި ނަރުދަމާގެ ނިޒާމުގައި ހުރި މައްސަލަތައް ހައްލު ކޮށްދިނުމަށް ސަރުކާރަށް ގޮވާލައި ނައިފަރު ދާއިރާގެ މެންބަރު އަހުމަދު ޝިޔާމް ހުށަހަޅާފައިވާ ގަރާރުގެ ބަހުސް ކުރިއަށް ގެންގޮސްފައެވެ.
އެ ގަރާރަށް ބަހުސް ކުރައްވަމުން ސަޢީދު ވިދާޅުވީ، ކުރީގެ ރައީސް ޔާމީން އަބްދުލްގައްޔޫމް ގެ ވެރިކަމުގައި 20 ރަށުގެ ނަރުދަމާގެ މަސައްކަތަށް 720 މިލިއަން ކަނޑައަޅާފައި ވުމުން އެ އަދަދު ބޮޑުވެ އެމްޑީޕީގެ މެންބަރުން އެކަމަށް ފާޑުވިދާޅުވެ އެކަން ކުށްވެރިކޮށް އެ އަދަދު މި ސަރުކާރުން މުރާޖަޢާ ކޮށްފައިވާ ކަމަށެވެ.
އެގޮތުން މުރާޖަޢާ ކުރުމަށްފަހު އެ އަދަދު 1.3 ބިލިއަން ރުފިޔާ އަށް އެ އަދަދު އިތުރު ކުރިކަން ސަޢީދު ފާހަގަކުރެއްވިއެވެ.
1.3 ބިލިއަން ރުފިޔާއަށް ނިންމާލިއިރު.. އަޅުގަމޑުމެންނަށް މި އަޑު އިވެނީ ހުރިހާ ރަށެއްގެ ނަރުދަމާތައް ނިންމާލައިފީމޭ. ފެން ވެސް އަޅައި ނިންމައިފިއޭ. އެހެން ނަމަވެސް ދޭތެރޭ ދޭތެރެއިން ގަރާރެއް. ދޭތެރެ ދޭތެރެއިން ސިޓީއެއް، ކަންބޮޑުވުމެއް، ޕެޓިޝަނެއް މި ހުށަހަޅަނީ ތިމަންނަމެން މިރަށަށް އަޅަން އުޅޭ ނަރުދަމާގެ މަސައްކަތް އެމްޕީއެއް ނުވަތަ އެމްޕީއެއް ހިމެނޭ ކުންފުންޏަކަާ ހަވާލުކުރީމޭ... (އެކަމަކު) ކުރިއަށް ނުދާ ވާހަކަ. ހުސް ކޮރަޕްޝަން.
މެންބަރު މުހައްމަދު ސަޢީދު
މިއާއެކު ސައީދު ވިދާޅުވީ ނައިފަރުގެ ފެނުގެ ނިޒާމާއި ނަރުދަމާގެ ނިޒާމުގައި ހުރި ކަމަށް ގަރާރުގައި ފާހަގަކޮށްފައިވާ މައްސަލަތައް ހާމަކޮށްދެއްވާފައެވެ. އެގޮތުން، ފެނުގައި ވަސް ހުރުމާއި، ދަބަރު ކުލަ ހުރުމާއި، ފެން ލީކުވުމާއި، އާރޯ ޕްލާންޓް ގައިވެސް މައްސަލަ ހުރުމާ، ފެން ދޫކުރާ ޕަންޕުގައިވެސް މައްސަލަތައް ހުރުމުގެ އިތުރުން ވެސް ގިނަ ކަންކަން އޭނާ ފާހަގަ ކުރެއްވި އެވެ.
ސައީދު ވާހަކަ ކުރިއަށް ގެންދެވި އިރު ސަރުކާރަށް ތާއީދު ކުރައްވާ އެކި މެންބަރުން ވަނީ ތަކުރާރުކޮށް ނިޒާމީ ނުކުތާ ނަންގަވައި، ސައީދުގެ ވާހަކަ ހުއްޓުވައި ނައިފަރުގެ ފެނުގެ ނިޒާމާއި ނަރުދަމާގެ ނިޒާމުގެ މައްސަލަ ތަކަކީ ރައީސް ޔާމީންގެ ސަރުކާރުން މަސައްކަތް ކުރި އިރު "ފީކަޅާ" ކޮށް ކޮށްފައި ހުރުމުން ދިމާވާ މައްސަލަ ތައް ކަން ފާހަގަކުރައްވައި އެ ސަރުކާރަށް ފާޑުވިދާޅުވެފައެވެ.
އެ މެންބަރުންގެ ވާހަކަތަކަށް ރައްދު ދެއްވަމުން ސައީދު ވަނީ އެ މައްސަލަ އަކީ 6000 އަށްވުރެ ގިނަ ރައްޔިތުންނާއި ގުޅިފައި ހުރި މައްސަލައެއް ކަމަށާ، އެހެން ނަމަވެސް ސަރުކާރަށް ތާއީދު ކުރައްވާ މެންބަރުން އަންނަނީ އެކަމަށްވެސް ފާޑުވިދާޅުވެ ހަޖޫ ޖައްސަވަމުން ކަމަށެވެ. އެހެންނަމަވެސް، އެ މެންބަރުންވެސް އެފަދައިން ކަންކުރުމުގެ ބަދަލުގައި އެ މައްސަލަ ސަރުކާރުގެ ސަމާލުކަމަށް ގެނައުން މާ މުހިންމު ކަމަށް ސައީދު ވިދާޅުވި އެވެ.
"ނިންމާލަމުންވެސް އަޅުގަމޑުމެންގެ ވާދަވެރި ބައެއް މެންބަރުންނަށް ދަންނަވާލަންލ، ތިބޭފުޅުން ތިހާ ފޯރި ހުންނާނެތޯ ތިލަމާލޭ ބްރިޖުގެ ވާހަކަ އަޅުގަނޑުމެން ގަރާރެއް ގޮތަށް ހުށަހަޅާލީމާ. ފެނުން ވޭލެއް ހެން މައްޗަށް ތިލަވާވާހަކަ އަޅުގަމޑުމެން އޮތީދެން ހުށަހަޅަން.."
"އަޅުގަނޑު އެދެން ހުރިހާ މެންބަރުންނަށް. ރައީސުލްޖުމްހޫރިއްޔާގެ ސަމާލުކަމަށް މި މައްސަލަ ގެންނަވަން. ހަމަ ޔަގީނުންވެސް އެމަނިކުފާނު ކީރިތި ކުރައްވާނެ. މީގައި މިހިރަ ހުރިހާ މައްސަލައެއް އެޑްރެސް ކޮށް އެނގިލައްވާނަމަ. ނުވަތަ، މި މައްސަލަ ހައްލުކުރުމަށް ޓީމެއް ފޮނުއްވާނެ."
މެންބަރު މުހައްމަދު ސަޢީދު
އެހެންކަމުން ކަމުން ސައީދު ވަނީ ނައިފަރުގެ އެ މައްސަލަތައް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަމާލު ކަމަށް ގެނެސް ދިނުމަށް ތަކުރާކޮށް މެންބަރުންގެ ކިބައިން އެދިލައްވާފައެވެ.
Advertisement
This content is created and paid for by advertisers and does not involve Voice Journalists
