މަސްތުވާތަކެތި އެތެރެކުރާ ގިނަ ބިދޭސީންގެ ބޮޑެތި ބަލިތައް ހުންނަ ކަމަށް ޑިފެންސް މިނިސްޓަރު މާރިޔާ ދީދީ ވިދާޅުވެއްއެވެ.

މާރިޔާ މިހެން ވިދާޅުވީ، ވައިގެ މަގުން މަސްތުވާތަކެތި އެތެރެކުރާ ބިދޭސީން ހައްޔަރުނުކޮށް އަނބުރާ ޤައުމަށް ފޮނުވައިލާ ގޮތަށް އެކުލަވައިލި ޤަވާޢިދާ ގުޅޭ ގޮތުން ރައްޔިތުންގެ މަޖިލީހުގެ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) މިއަދު މަޖިލީހުގެ ތަޅުމުގައި ކުރެއްވި ސުވާލަކަށް ޖަވާބު ދެއްވަމުންނެވެ.

މާރިޔާ ވިދާޅުވީ ރާއްޖެއަށް މަސްތުވާތަކެތި އެތެރެކުރާ ބިދޭސީންގެ ތެރެއިން ވަރަށް ގިނަ މީހުންނަކީ ބޮޑެތި ބަލިތައް ތަހައްމަލުކުރާ މީހުން ކަމަށެވެ. އަދި އެމީހުން ހައްޔަރުކޮށް ޖަލުގައި ބައިތިއްބަންޖެހެނީ ދައުލަތުން ވަރަށް ބޮޑު ޚަރަދެއްކޮށްގެން ކަމަށެވެ.

"ރާއްޖެއަށް މަސްތުވާތަކެތި ހިފައިގެން ގިނައިން އަންނަނީ ޓާމިނަލް އިލްނަސަސް ހުރި މީހުން. އެގޮތުން އެއިޑްސްއާއި ކިޑްނީގެ ބޮޑެތި ބަލިހުރި މީހުންނާއި އެކަހަލަ އެތައް ބައެއް މިވަގުތުވެސް އެބަތިބި ޖަލުގައި،" މާރިޔާ ވިދާޅުވިއެވެ.

މަސްތުވާތަކެތީގެ ޤާނޫނަށް ގެނައި އިސްލާހެއްގެ ސަބަބުން، އެފަދަ މީހުންނާ ގުޅޭ ގޮތުން ކޯޓުން ވަކި ގޮތަކަށް ހުކުމްކުރުމުން އެމީހުން އަނބުރާ ފޮނުވައިލެވޭ ގޮތްވެސް އޮންނަ ކަމަށާއި ޖަލުގައި ގިނަ ދުވަސްތަކެއް ހޭދަ ކުރުމަށްފަހު ފޮނުވާލުމަށް މަސައްކަތް ކުރާއިރު އެތައް ދަތިތަކެއް ކުރިމަތިވާ ކަމަށ މާރިޔާ ފާހަގަ ކުރެއްވިއެވެ.