ސަރުކާރުން އުސޫލުތަކަށް ބަދަލު ގެންނަނީ ކަންކަން ބެލުމަށްފަހުގައިކަމަށާއި، މުޒާހަރާއެއް ކޮށްލާ އިރަށް ބަދަލު ނުގެންނަކަމަށް އެޑިއުކޭޝަން މިނިސްޓަރު ޑރ އައިޝަރު އަލީ ވިދާޅުވެއްޖެއެވެ.
މިނިސްޓަރު ޢާއިޝަތު ޢަލީ މިފަދައިން ވިދާޅުވީ މިއަދުގެ މަޖިލީހުގެ ޖަލްސާގައި މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ކުރެއްވި ސުވާލަކަށް ޖަވާބު ދެއްވަމުންނެވެ.
"އަޅުގަނޑަށް ހަމަ ޔަޤީން އެޑިއުކޭޝަން ދާއިރާގައިވެސް ޕޮލިސީތަކެއް، ވަކި އުސޫލުތަކެއް ހުންނާނެ. އެހެން ނަމަވެސް މި ސަރުކާރުގައި އަޅުގަޑުމެންނަށް ވަރަށް ބޮޑަށް އެބަ ފާހަގަކުރެވޭ، ސްޓޭންޑް ބަދަލުކުރާނެ ވަރަށް އަވަހަށް. އެ އޮންނަ އުސޫލުތައް އެ ހަމަތައް، ފުދޭ ވަރަކަށް އަވަހަށް ބަޔަކު ނުކުމެ، މުޒާހަރާއެއް ކުރިއްޔާ، ނޫހެއްގައި ލިޔެލާއިރަށް ބަދަލު ކުރަމުންދޭ. އެޑިއުކޭޝަން ދާއިރާގައިވެސް އަޅުގަނޑަށް ފާހަގަކުރެވެމުންދޭ، އެޑިއުކޭޝަން ކަންކަމާއި ގުޅޭގޮތުން ބައެއް ޕޭރެންޓުން ނުކުމެ، ނޫނީ ސުކޫލުގެ ދަރިވަރުން ނުކުމެ އިހްތިޖާޖު ކޮށްލާއިރަށް އެހުންނަ ޕޮލިސީ ބަދަލުވާތަން އާދޭ. ކީއްވެގެންތޯ މި ޕޮލިސީ އެހާ އަވަހަށް މި ބަދަލުވަނީ" ޢާޒިމް ސުވާލު ކުރެއްވި އެވެ.
ޢާޒިމްގެ ސުވާލަށް ޖަވާބު ދެއްވަމުން މިނިސްޓަރު ޢާއިޝަތު ޢަލީ ވިދާޅުވީ، އެޑިއުކޭޝަން މިނިސްޓްރީގެ ޕޮލިސީތަކަށް ބަދަލު ގެނައުމުގައި މަރުހަލާތަކެއް ހުންނަކަމަށެވެ.
ފުރަތަމަ، އުސޫލެއްގައި މައްސަލައެއް އުޅޭކަން އަޅުގަމޑުމެންނަށް އެ އުސޫލެއް ތަންފީޒް ކުރާ ހިސާބަކުން އައިއްސިކަމުގައި ވެއްޖެއްޔާ، އަޅުގަނޑުމެންގެ އޮންނާނެ ޓެކްނިކަލް ކޮމިޓީއެއް. ޓެކްނިކަލް ކޮމިޓީން ބަލާފައި، އުސޫލަކަށް ބަދަލެއް ގެންނަންޖެހޭ ހާލަތެއް އޮތްކަމުގައި ވެއްޖެއްޔާ އެ އުސޫލަށް ބަދަލު ގެންނާނެ. ދެން އަނެއްހެން މުޒާހަރާއެއްކޮށްލާއިރަށް، އަޅުގަނޑުމެން އުސޫލުތަކަށް ބަދަލެއް ނުގެންނަން.
މިނިސްޓަރު ވިދާޅުވީ މި ފަހުން އުސޫލުތަކަށް ބަދަލު އައީ ތަޢުލީމާއި ބެހޭ ގާނޫނަށް އައި ބަދަލުތަކާއި ގުޅިގެން ކަމަށެވެ.
Advertisement
This content is created and paid for by advertisers and does not involve Voice Journalists
