އެމްޑީޕީން ވަކިވި 12 މެންބަރުން މަޖިލީހުގެ އެ ޕާޓީގެ ދަފްތަރުން ކެނޑޭނީ ޕާޓީން ވަކިވިކަން މަޖިލީހަށް އަމިއްލަފުޅަށް އެންގެވުމުންކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލީހުގެ މިއަދުގެ ޖަލްސާ ފައްޓަވަމުން ރައީސް މުހައްމަދު ނަޝީދު ވިދާޅުވީ މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކި ކޮށްފައިވާ ކަން އިލެކްޝަންސް ކޮމިޝަން (އީސީ) އިން އަންގާފައިވާ ކަމަށެވެ. އެހެން ނަމަވެސް އެހެން މެންބަރުން މަޖިލީހުގެ ދަފްތަރުން ވަކިކުރާނީ އަމިއްލައަށް އެކަން މަޖިލީހަށް އެންގުމުން ކަމަށާ މަޖިލީހުގެ ގަވާއިދުގައި ވަނީ އެފަދައިން ކަމަށެވެ.
އެއަށްފަހު ޖަލްސާ ކުރިއަށް ދިޔައިރު، ރައީސް ނަޝީދު ވަނީ އެމްޑީޕީން ވަކިވި މެންބަރުންނަށްވެސް އެމްޑީޕީގެ ވަގުތު ދެއްވާފައެވެ. އެކަމާއި ގުޅިގެން ސަރުކާރަށް ތާއީދު ކުރައްވާ މެންބަރުން ނުރުހުން ފާޅުކުރައްވައި، އެ މެންބަރުންނަށް ވަގުތު ދެއްވަނީ ކޮށް އުސޫލަކުންތޯ ވަނީ ސުވާލު ކުރައްވައި މަޖިލީހުގައި އަޑުގަދަ ކުރައްވާފައެވެ.
އެއާއެކު ރައީސް ނަޝީދު ވަނީ، މަޖިލީހުގެ ޤަވާއިދުގެ 36 ވަނަ މާއްދާގައި މެންބަރުން މަޖިލީހުގައި ތަމްސީލު ކުރައްވާ ޕާޓީގެ ދަފްތަރުން ވަކިވާނެގޮތް ބަޔާންކޮށްފައިވާ ކަމަށް ވިދާޅުވެފައެވެ.
ރައްޔިތުންގެ މަޖިލީހުގެ ގަވައިދުގައި ބުނެފައިވަނީ، މެންބަރަކު އެ މެންބަރަކު ނިސްބަތްވާ ޕާޓީން ވަކިވާން ބޭނުންވެއްޖެ ހިނދެއްގައި، އެ ޕާޓީއަށާއި އިލެކްޝަންސް ކޮމިޝަނަށް އަދި ރައްޔިތުންގެ މަޖިލީހުގެ ރައީސަށް ލިޔުމަކުން އެކަން އެ މެންބަރަކު އަންގަންވާނެ ކަމަށެވެ.
އެމްޑީޕީން ވަކިވެފައިވަނީ މެންބަރު އިބްރާހިމް ރަޝީދު (ބޮންޑޭ)، މެންބަރު މުހައްމަދު ރަޝީދު (ބޯދިގު)، މެންބަރު އަހްމަދު ޒާހިރު (ގައްދޫ)، މެންބަރު މުހައްމަދު ވަހީދު (ވައްޑޭ)، މެންބަރު ހަސަން ލަތީފް، މެންބަރު އީވާ އަބްދުالله، މެންބަރު އިލްޔާސް ލަބީބް، މެންބަރު އިމްތިޔާޒް ފަހުމީ، މެންބަރު ޔާސިރު އަބްދުއްލަތީފް، މެންބަރު ހަސަން އަފީފް، މެންބަރު ހުސެއިން ފިރުޝާން އަދި މެންބަރު ހަސަން ޝިޔާންއެވެ.
Advertisement
This content is created and paid for by advertisers and does not involve Voice Journalists
