ދައުލަތުގެ އެއްވެސް އިދާރާއަކަށް ފިއްލަވައިގެން ނޫޅުއްވާކަމަށް ރައީސް އޮފީހުގެ ކުރީގެ ތަރުޖަމާނު އަދި އިންޑިއާ އެންބަސީގައި ހުޅުޖަހަން ހިތްވަރުދޭ ފަދަ މޭރުމަކުން މީސްމީޑިއާގައި ވާހަކަ ދެއްކި އައްބާސް އާދިލް ރިޒާ ވިދާޅުވެއްޖެއެވެ.

ކްރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން، ކޯޓަށް ހާޒިރު ކުރަން ބޭނުންވެ ހާޒިރު ކުރެވިފައިނުވާ ކަމަށްބުނެ، ބަންދުގައި ބަހައްޓައިގެން ކޯޓަށް ހާޒިރު ކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން އައްބާސް އާދިލް ރިޒާ ހޯދުމަށް ފުލުހުން މިއަދު ވަނީ އިއުލާން ކޮށްފައެވެ.

އެކަމާއ  ގުޅިގެން އޭނާ ނެރުނު ބަޔާނެއްގައި ވިދާޅުވީ، 25 ޑިސެމްބަރު 2022 ވަނަ ދުވަހު ޗެނަލް 13ގެ ހެނދުނުގެ ޕްރޮގްރާމެއް ނިންމާފައި ނުކުތް ތަނާ ފުލުހުން އޭނާ ހައްޔަރުކޮށްގެން ގެންގޮސް ލާ އިންސާނީ އަނިޔާ ކޮށްފައިވާކަމަށެވެ. އަދި އެ މައްސަލަތައް އޭނާގެ ފަރާތުން ހިއުމަންރައިޓްސް ކޮމިޝަނަށް ހުށަހަޅާފައިވާކަމަށާއި ގާނޫނުގައިވާ ގޮތުގެ މަތިން 30 ދުވަހުގެ ތެރޭގައި އެ ކޮމިޝަނުން ތަހްގީގުކޮށް ރިޕޯޓެއް ދޭން އޮތްނަމަވެސް ނަމަވެސް މިއަދާ ހަމައަށް ވެސް އޭނާގެ އެ ހައްގު ނިގުޅައިގަނެވިފައިވާކަމަށް އެ ބުނެފައިވެއެވެ.

Advertisement

މިއާއެކު އައްބާސް ވިދާޅުވީ ކްރިމިނަލް ކޯޓުން އޭނާ ބަންދުގައި ބަހައްޓަން ނުފެންނަކަމަށް ކަނޑައަޅާ މިއަހަރުގެ ޖެނުއަރީ މަހުގެ 13 ވަނަ ދުވަހު ދޫކޮށްލާފައިވާކަމަށާއި ޝަރުތަކަށް ކަނޑައެޅީ 30 ދުވަހުގެ ތެރޭގައި ފުލުހުން އެ މައްސަލަ ތަހްގީގުކޮށް ނިންމުމާ އެ މުއްދަތުގައި ފުލުހުންގެ ތަހްގީގަށް އޭނާ އެއްބާރުލުން ދިނުންކަމަށެވެ.

އަދި އެ މުއްދަތު 13 ފެބުރުއަރީ 2023 އަށް ހަމަވެފައިވާކަމަށާއި އޭނާގެ ބައްޕާގެ ފުރާނައަށް ނުރައްކާވާ އާލާސްކަންފުޅެއްގައި ރާއްޖެއިން ބޭރަށް ފަރުވާ ހޯދުމަށް ދާން ޖެހި އެހީތެރިއެއްގެ ގޮތުގައި އޭނާ ރާއްޖެއިން ބޭރަށް ފުރީ އޭނާގެ މައްޗަށް ރާއްޖޭގެ އެއްވެސް ކޯޓެއްގައި މައްސަލައެއް ހުށަހެޅިފައި އޮތް ވަގުތަކު ނޫންކަމަށްވެސް އައްބާސް އާދިލް ވިދާޅުވެފައިވެއެވެ.

މީގެ އިތުރުން އޭނާ ރާއްޖެއިން ފުރީ ދިވެހިރާއްޖޭގެ އެންމެހާ ގާނޫނާއި ގަވައިދުގެ ތެރޭގައިކަން ސަރުކާރުގެ އިދާރާތަކަށް އެނގެން އޮންނާނެކަމަށާ، އޭނާގެ ޓިކެޓާއި ދަތުރުކުރީ ކޮން އެއާލައިނެއްކަމާއި އޭނާގެ ޑެސްޓިނޭޝަން އޮތީ ކޮން ގައުމަކަށް ކަމާއި މި ވަގުތުވެސް އެނާ ހުރީ ކޮން ގައުމެއްގައިކަމާއި އޭނާގެ ބައްޕާފުޅުގެ ބޭސްފަރުވާ ހޯއްދަވަނީ ކޮން ހޮސްޕިޓަލެއްގައިކަމާއި އެ އެންމެހާ މައުލޫމާތު ދިވެހި ސަރުކާރުގެ އިދާރާތަކުގައި ހުންނާނެކަމަށްވެސް އައްބާސް ވިދާޅުވެފައިވެއެވެ.

އައްްބާސް ވިދާޅުވީ މި ސަރުކާރުން އޭނާ ބަދުނާމުކުރުމުގެ ކެމްޕޭނެއް ހިންގަމުން އެ ގެންދަނީ ކްލަބުހައުސްގައާއި އެ ނޫންވެސް ސޯޝަލް މީޑިއާގައި އިންޑިއާގެ އަޅުވެތިކުރުމުގެ ސިޔާސަތުތަކާއި ދެކޮޅަށް ދައްކަމުންދާ ހޭލުންތެރި ކުރުވުމުގެ އަޑު ކަނޑުވާލުމުގެ ނިޔަތުގައި ކަމަށެވެ. 

އެކަން ކުށްވެރިކުރައްވައި އޭނާ ވިދާޅުވީ އޭނާ އަކީ މިއަދާއި ހަމައަށްވެސް އެއްވެސް ކުށުގެ ރިކޯޑެއް އޮތް މީހެއް ނޫން ކަމަށާ، އަދި ދައުލަތުގެ އެއްވެސް އިދާރާއަކަށް ފިލައިގެން އުޅޭ މީހެއް ނޫން ކަމަށް ވެސް ވިދާޅުވެފައެވެ.