ދިވެހިރާއްޖޭގައި މިނިވަން ޚާރިޖީ ސިޔާސަތެއް ތަންފީޒުކުރެވޭނީ ލީޑަރުންނަކީ ކެރޭ ބަޔަކަށް ވެގެންކަމަށް ކުރީގެ ރައީސް ޑރ މުހައްމަދު ވަހީދު ހަސަން މަނިކު ވިދާޅުވެއްޖެ އެވެ.
އެމަނިކުފާނު މިފަދައިން ވިދާޅުވެފައިވަނީ ދިވެހިރާއްޖޭގެ ޚާރިޖީ ސިޔާސަތު މިއަދު ބައްޓަންކޮށްފައިވާ ގޮތާއި ގުޅޭގޮތުން ކަންބޮޑުވުން ފާޅުކުރައްވަމުން ޗެނަލް-13 އަށް ދެއްވި އިންޓަވިއުއެއްގައި ވާހަކަދައްކަވަމުން ނެވެ.
ޑރ ވަހީދު ވިދާޅުވީ ދިވެހިރާއްޖެ މިނިވަން ގައުމެއްގެ ގޮތުގައި ދެމިއޮތީ މީގެ ކުރިން ވެރިކަން ކުރެއްވި ބޭފުޅުން އަމާނާތްތެރިކަމާ އެކީގައި ގައުމު މިހާތަނަށް ވާސިލްކޮށްދިނުމަށް ކުރެއްވި މަސައްކަތްޕުޅުތަކުގެ ސަބަބުން ކަމަށެވެ.
ގައުމުތަކުން ރާއްޖެއަށް އެކި މިންވަރުގެ ނުފޫޒުތައް ފޯރުވުމަށް މަސައްކަތް ކުރައްވާފައިވާ ކަމަށާއި، އެހެން ނަމަވެސް މީގެ ކުރިން ވެރިކަން ކުރެއްވި ފަރާތްތައް ވަރަށް ބޮޑަށް ދިވެހިންގެ ކަންކަން އަމިއްލައަށް ނިންމުމަށް އިސްކަންދެއްވިކަމަށް ޑރ ވަހީދު ވިދާޅުވި އެވެ.
އެކަން ފާހަގަކުރައވާ އެމަނިކުފާނު ވިދާޅުވީ މިހާރު ފެންނަމުންދަނީ މިނިވަން ޚާރިޖީ ސިޔާސަތެއް ތަންފީޒުކުރުމަށް މީގެ ކުރީގެ ވެރިކަންތަކުން ކުރެއްވި މަސައްކަތް ވަރަށް ބޮޑަށް ދޫކޮށްލާފައިވާ މަންޒަރުތައް ކަމަށެވެ.
އަދި ޚާރިޖީ ސިޔާސަތެއް މިނިވަންކަމާއި ތަންފީޒު ކުރެއްވޭނީ ލީޑަރުގެ ކިބައިގައި ކެރުންތެރިކަން ހުރެގެންކަން ވެސް ޑރ ވަހީދުގެ ވާހަކައިގައި ފާހަގަކުރެއްވި އެވެ.
"ޚާރިޖީ ސިޔާސަތު އަމިއްލަވަންތަ އެއްޗެއްގެ ގޮތުގައި މިނިވަންކަމާއެކު އެކްސަސައިޒް ކުރުމަކީ އުނދަގޫކަމަށް ވެފަ މި އޮތީ. އެއީ ވެގެންދާނެ ގޮތެއް ނޫން. އަޅުގަނޑުމެން އެބަޖެހޭ މީގެކުރިންވެސް އަޅުގަނޑުމެން ތިބި ފަދައިން އަޅުގަނޑުމެންގެ ހުރިހާ ކަމެއްގައި ވެސް ބަސްކިޔޭ ބަޔަކަށް އަޅުގަނޑުމެން ވާން. އެކަން އެހެން ވާނީ އަޅުގަނޑުމެންގެ ލީޑަރުންގެ ސަޚްސިއްޔަތު އެހެން ހުރެގެން. އަޅުގަނޑުމެންގެ ލީޑަރުންނަކީ އެއީ ކެރޭ ބަޔަކަށް ވެގެން"
ކުރީގެ ރައީސް ޑރ ވަހީދު
ޑރ ވަހީދު ވިދާޅުވީ ރިޔާސީ އިންތިޚާބެއް ރައްޔިތުންގެ ކުރިމަތީގައި އޮތް އިރު ޤައުމުގެ މިނިވަންކަމާއި އިސްތިގުލާލާއި ދޭތެރޭ ރައްޔިތުން ވަރަށް ފުންކޮށް ވިސްނަން ޖެހޭ ކަމަށެވެ.
ރާއްޖޭގެ ސިޔާސީ މަޝްރަހަށް ބަލާއިރު، މިނިވަންކަމާއި އިސްތިގުލާލު ހިމާޔަތްކޮށް މިނިވަން ޚާރިޖީ ސިޔާސަތެއް ރާއްޖޭގައި ގާއިމްކުރެވޭނެ ބަޔަކީ ޕީޕީއެމްކަން ފެންނަން އޮތް ކަމަށާއި، އެ ޕާޓީގެ އެކި ގިންތީގައި ތިއްބެވި ބޭފުޅުންނަށް ބަލާލި ނަމަވެސް ފެނިގެންދަނީ ތައުލީމު ޤާބިލު ބޭފުޅުންކަމަށް ޑރ ވަހީދު ވިދާޅުވި އެވެ.
ގައުމަށް މިހާރު ދިމާވެފައިވާ މައްސަލަތަކުން އަރައިގަންނާނެ ޙައްލުތައް ހޯދުމަށް ގައުމީ ވިސްނުން މިފަހަރު އިސްކުރަން ޖެހޭކަމަށް އެމަނިކުފާނު ވިދާޅުވި އެވެ. އަދި ރައްޔިތުންގެ މައްސަލަތައް ހައްލުކުރުމަށް ޕީޕީއެމް އަކީ ރަނގަޅު ޗޮއިސްއަކަށް ވާނެކަމަށް އެމަނިކުފާނު ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
